تانى قصة معايا فى التوكيل

[Super_Star_h]

السلام عليكم ورحمة الله وبركاته

اولآ انا هنقل كل اللى حصل معايا فى توكيل رينو .. العامرية
انا عربيتى زي ما قولت هنا قبل كده
ان فيها اصوات غريبه وطقطقه فى العربيه
المهم روحت التوكيل
دخلت فى الاستقبال بالعربيه
مهندس كده شيك وشكله محترم جالى
قولتله على ملاحظاتى اللى كتبها عنده فى الورقه
طقطقه فى العربيه واصوات غريبه بتحصل
تكتكة فى الدريكسيون
عضه فى المارشدير
..................
قالى عضة المارشدير حضرتك بتصبر 3 ثوانى وبعدين تجيب مارشدير
قولتله انا ساعات ببقى فى مواقف متحتملش انى افضل اتحايل على الغيار
عشان ميعضش
قالى طيب !
وبعدين قالى اتفضل حضرتك فى الاستراحه
سبت العربيه ودخلت الاستراحه وقعدت شويه
وبعدين لاقيته جاى بورق فى ايده
وقالى انت مبتعملش صيانات
قولتله لا مش بعمل صيانات انا
قالى اومال مين بيعملك صيانه وبتغير زيت فين
قولتله انا بغير زيت بره بس
قالى طب عشان العربيه متخرجش من الضمان اعملها صيانات هنا
قولتله ان شاء الله ربنا يسهل
المهم قولتله المشكله اتحلت قالى اه
وطلع السبب ايه يا باش مهندس ؟
قالى العفشه كانت عايزه تتربط بس
قولتله يعنى الطقطقه راحت
قالى اه
وادانى ايصال الخروج وفيه تكاليف الشغل 100 جنيه
روحت ودفعت المبلغ
وطلعت استنى عربيتى بيقوله بتتغسل !!
المهم العربيه جت هييييييييييييييييييييييه
وحطين فى الارضيه ورقه
وعلى الكرسى مشمع !!
ما علينا بيحللو ال 100 جنيه
اخدت العربيه من عند البوابه وطالع بقى انطلق
المهم على الصحراوى وانا ماشى
السكه وقفت كان فى حادثه
اول ما هديت ووقفت لاقيت صوت الطقطقه زي ما هو !
قولت الله اومال عفشة ايه اللى اتربطت ؟
وهما عملو ايه فى العربيه اساسآ
يعنى انا دفعت 100 جنيه تمن الورقه والكيسه ؟
روحتلهم بقى تانى يوم الصبح
دخلت على الاستقبال
ولاقيت المهندس ماشى كده
قومت مشاورله بصبعى قولتله تعالى
كان لسه هيقولى حاجه
قومت داخل شمال وصوتى بقى عالى
وقولته انا جيت امبارح وقولتلى العربيه بقت كويسه ومشيت لاقيت نفس الموضوع
وبصراحه العربيه متعملش فيها اي حاجه
ولا تربيط عفشه ولا اي بتاع اصلآ
هو ايه اللى بيحصل ده ؟
اخد كل الكلام ده ومنطقش كلمه
المهم على الصوت جى واحد تانى كده رخم ماسك دفتر
قالى في ايه
قولتله العربيه جيت بيها امبارح ودفعت فلوس عشان تتصلح
ومتعملش فيها اي حاجه
قالى طب ومشيت بيها ليه ؟
والله انا كان عندى ثقه فى حضرتكم
قام منادى على مهندس وقالى تعالى جرب معاه
قام جاى المهندس وقولتله تعالى جنبى عشان تسمع
قومت قافل ازاز العربيه وطلعت بيه
وهدى واقف واقف واهدى لغايت ما سمعته الاصوات
قالى تمام اتفضل حضرتك فى الاستراحه وسبنى انا اتعامل
دخلت الاستراحه الفقر دى تانى
قعدت بتاع ساعه تقريبآ
قام جالى الراجل الرخم ده تانى
وقالى اتفضل استلم عربيتك
قالى المهندس جربها خلاص
قولتله انا بقى لسه مجربتهاش
قام قايلى بأسلوب رخم انت مع نفسك انت بقى بالسلامه
انا متنرفز خلقه وكنت عايز اهزقه لانه راجل معملته واسلوبه زفت
قومت قاصر الشر
قولتله حصل ايه فى العربيه
قالى ربطنا العفشه وزيتنا الدبرياج
ربطنا العفشه !
معنى كده ان امبارح اضحك عليا
ما علينا
اخدت العربيه وفضلت اجرب فى التوكيل
واطلع واهدى لغايت ما لاقيت كله تمام مافيش طقطقه فى العربيه
قولت اشوف المارشدير اتهببو عملو في ايه
لاقيته بقى احسن شويه من الاول
يعنى اقف خالص بالعربيه فى اي وقت واجيب مارشدير من غير ما انتظر 3 ثوانى مبيعضش
انما لو العربيه ماشيه وجبت مارشدير هيعض
ما علينا
طلعت على الصحراوى تانى بقى فى الجو الحر ده
وشغلت التكييف وعلى البيت طوالى
اتخنقت
................

[bishoy02010]

ههههههههههههههههههه طيب يعنى المشكله اتحلت ؟؟؟ ولا لسه موجوده وموضوع قاعدة الموتور مش قلت انها بايظة إيه النظام ؟؟؟ وموضوع المارشدير طبيعى جدا انه هيعض لو العربية بتتحرك سنه لقدام

[mmwwaassffyy]

العيب فى العمالة بمراكز الصيانة -------- عايزين ياخذوا فلوس ومايعملوش حاجة (حاجة تقرف)

[w-m-a]

العيب فى العمالة بمراكز الصيانة -------- عايزين ياخذوا فلوس ومايعملوش حاجة (حاجة تقرف)

وهى العماله هتقبض يوميه
لاء طبعا العيب فى التوكيل
فى السياسه العامه للتوكيل
فى الادارة

[hobby10]

طيب هو حضرتك دفعت 100 جنيه على ايه ؟؟

[Super_Star_h]

ههههههههههههههههههه طيب يعنى المشكله اتحلت ؟؟؟ ولا لسه موجوده وموضوع قاعدة الموتور مش قلت انها بايظة إيه النظام ؟؟؟ وموضوع المارشدير طبيعى جدا انه هيعض لو العربية بتتحرك سنه لقدام

ما انا كنت بحسبه العيب شداد ماتور عشان موضوع الطقطقه ده
طبعآ انا مش لاقى اي حلوف ميكانيكى فى البلد بيفهم فى الرينو
اما سألت العفشجى قالى ده شداد ماتور .. طلع حلوف
اما روحت التوكيل بقى عملو كل اللى قولته فوق ده
العفشه كان فيها حاجه
وزيت الدبرياج ولا غيره
الله اعلم
المهم المشكله اتحلت يا بشوى
عارف تعبتك انا كمان معايا كل شويه اسألك عن التوكيل واروحله امتى وبتاع
ربنا يجعلها اخر الاعطال ياااااااااااااااااااارب
معنديش استعداد اروح البتاع ده تانى

[Super_Star_h]

طيب هو حضرتك دفعت 100 جنيه على ايه ؟؟

والله هو ده النظام فى التوكيل
اولآ تقولهم على مشكلتك وتقعد تتطلطع فى الاستراحه
وبعدين يجيلك الباش مهندس الكباره
يديك تصريح الخروج مع تكاليف الاصلاح وتدفع وتخرج تستنى عربيتك اما تيجى من المغسله
وصباحو استغلال

[Super_Star_h]

العيب فى العمالة بمراكز الصيانة -------- عايزين ياخذوا فلوس ومايعملوش حاجة (حاجة تقرف)

بضبط كده شغل سرقه عينى عينك

[ramy_gamal]

بضبط كده شغل سرقه عينى عينك

طيب ماتجرب الميكانيكى اللى انا بتعامل معاة ولد محترم وامين وشغله كويس

[hobby10]

طيب ماتجرب الميكانيكى اللى انا بتعامل معاة ولد محترم وامين وشغله كويس

ده فى اسكندرية ولا القاهرة ؟

[ramy_gamal]

ده فى اسكندرية ولا القاهرة ؟

اسكندريه

[hobby10]

والله هو ده النظام فى التوكيل
اولآ تقولهم على مشكلتك وتقعد تتطلطع فى الاستراحه
وبعدين يجيلك الباش مهندس الكباره
يديك تصريح الخروج مع تكاليف الاصلاح وتدفع وتخرج تستنى عربيتك اما تيجى من المغسله
وصباحو استغلال

ماشى بس بتبقى عارف انت دافع فلوس على ايه .. ايه اللى عملوه والمفروض انك دفعت عليه؟

[Super_Star_h]

طيب ماتجرب الميكانيكى اللى انا بتعامل معاة ولد محترم وامين وشغله كويس

http://www.nilemotors.net/Nile/142936-a.html#post3872571073

لسه كنت بكتب عن الموضوع ده يا باشا
انا من اسكندريه زيك
ياريت عنوان الميكانيكى ده
انا مش لاقى اي حد بيفهم فى العربيه

[zkralla]

معلش يا باشا المهم موضوع الطقطه خلص

تقريبا ده استاذ حمدى للمره الثانيه بس طبعا أنت مش عارف اسمه المره الجايه ابقى اتأكد والناس الى زى ديه مع تخاذل الإداره بيبوظوا سمعه التوكيل

[hobby10]

اسكندريه

حضرتك بتتعامل معاه فى الرينو وضامنه ؟؟
طيب ممكن حضرتك تفيدنا بنمرته ومكانه على اساس لو الواحد احتاجه يعنى ... شكرا