الأزاز الجانبى اتكسر .. حالة سرقــه

[Super_Star_h]

السلام عليكم ورحمة الله وبركاته


النهارده كنت فى مشوار فى سموحه
وركنت العربيه مافيش 5 دقائق بضبط
ورجعت ليها تانى
ببص فى الارض لاقيت حتة ازاز صغيره !!!
قولت ايه اللى جابها دى اكيد لازقت فى الجزمه
ببص على الكرسى اللى جمبى
لاقيت ازاز مدشدش مليون حتـــــه
ببص فى الباب ملقتش الا شوية فتافيت لازقين فى الجناب
ببص على الموبيل بتاعى اللى نسيته تحت فى الحته اللى بعد الطفايه
ملقتوش قولت تبقى دى بفعل فاعل اكييييييييد
كسر الازاز عشان يسرق الموبيل
المهم اتعكننت احلى عكننه
قومت واخد بعضى ورحت للراجل اللى ركبت عنده الازاز الخلفى اول مره
اول ما شافنى قالى اركن اركن
وقبل ما انزل كان ماسك التليفون
وبيسأل فى المخزن على ازاز اللوجان الجابنى موجود ولا لاء
المهم عمل شوية اتصالات كده بزملائه بتوع الازاز برضك وسألهم وبرضو مش موجود
قالى انا عندى اهو فى المحل الازاز الامامى والخلفى
بس الجانبى لا مش موجود
المهم شويه كده واتصل بشركه بتاعة الازاز اللى فى سموحه
بعد السلامات والتحيه للحج
بقولك ايه يا حج معندكش الازاز الجانبى للوجان
قاله موجود ..... خلاص انا جايلك دلوقتى اخده
اخدت الصنايعنى وطلعت بيه على سموحه رحنا جبنا الازاز من هناك ورجعنا
تعالى بقى حل فى الباب كل كلبسات ومافهوش الا مسمارين
واحد تحت الدارع الفضى وواحد جوه الاكره
و4 بتوع سماعات الكاسيت
حل وفك الباب وكله تمام وانا طبعآ عمال اقوله حاسب يا عم حاسب يابا مش من هنا
شد من هنا يا عم دى ملهاش دعوه انت كده هتكسره
المهم فين وفين عقبال ما البلاستيك اتشال
شيل فى الجلد ونضف نضف وشيل فى الازاز المتكسر فى الباب من تحت
وقام جايب الازاز الجديد وركب ركب وقام رابطه فى الماكينه
وهات الباب واكبس اكبس واربط فى المسامير
وهات البلاور وشيل فى الازاز ونضف العربيه وكل تمام
وانتهت المهمه بنجاح
المهم الازاز نوعه نضيف جدآ .. مستورد .. كوبى الاصلى .. مش استثمارى ايجيت التعبان
والازاز فعلآ رؤيته جميله زيه زي اللى فى العربيه بضبط ويمكن انضف
مكتوب على البادج بتاعه e1 والاصلى بتاع العربيه مكتوب عليه e2
هو ده الفرق اللى لاحظته فى البادج بتاعه
يرمز لأيه ده مش هفتى .. الله اعلم
المهم انه اتركب وبقى تمام
الازاز عامل 180 جنيـة بالمصناعيه بكله
وربنا يجعلها اخر الاحزان

[joso]

فداك وربنا يعوض عليك ويجعلها اخر الاحزان ان شاء الله

[mr_sameh]

قدر الله وماشاء فعل

[Dr.Karim Emam]

الحمد لله على كل شيء
و غالبا e1 ده هيكون الإزاز بتاع الهاف أوبشنز بس هو نفس الإزاز بتاع ال e2

[dr-mohamed]

كل سنة وانت طيب
المهم انت بخير
متعرفش دي فدت ايه في طريقها
ربنا يسترها عليك وعلى الجميع يا رب

[shiko85]

مش الــ e تدل على جوده المنتج و انه مطابق لمقاييس و معايير الجوده

[gebreel]

حمد الله على السلامة يا باشا و ربنا يجعلها اخر كل حاجة وحشة

[frhateg]

فداك 100 موبايل يا باشا . المهم حمدا لله علي سلامتك وعلي سلامة لوجي و اعتقد ان ثمنه مناسب جدا و غير مبالغ فيه و اكيد يكون سعره في التوكيل ضعف الثمن اللي ركبته به أو اكثر . وربنا يستر علينا في البلد دي .

[hobby10]

ربنا يعوض عليك والحمد لله انها عديت على خير الحمد لله ........ بس هو فين الراجل ده ممكن تقولنا عنوانه للاستفادة

[Super_Star_h]

انا بقول كده برضو
كويس انها جت فى العربيه والموبيل
الحمد لله على كل شئ
وربنا يسترها معانا جميعآ

[Super_Star_h]

ربنا يعوض عليك والحمد لله انها عديت على خير الحمد لله ........ بس هو فين الراجل ده ممكن تقولنا عنوانه للاستفادة

ده بعد نفق سيدى بشر على اليمين .. جمال عبد الناصر
بس مش تمام على فكره الراجل ده شغله تعبان
ميزته الوحيده انه بيعرف يتصرف لو معندوش ازاز يجبهولك من تحت الارض

[Super_Star_h]

مش الــ e تدل على جوده المنتج و انه مطابق لمقاييس و معايير الجوده

ما انا عايز افهم برضو
لانى مش فاهم بيرمز لأيه بضبط

[Super_Star_h]

الحمد لله على كل شيء
و غالبا e1 ده هيكون الإزاز بتاع الهاف أوبشنز بس هو نفس الإزاز بتاع ال e2

جايز برضو الله اعلم
لو حد معاه هاف اوبشن يقولنا

[MoHaMed HaMeD]

قدر الله وماشاء فعله
بس ده برده يجماعه يعملنا اننا منسبش حاجه ف العربيه غاليه وباينه للاخرين
وربنا يسترها لو عايز تسيبه ف العربيه حطه ف درج او ف الباب كده ميكونش باين

وربنا يخلفك خير ياجميل

[Super_Star_h]

قدر الله وماشاء فعله
بس ده برده يجماعه يعملنا اننا منسبش حاجه ف العربيه غاليه وباينه للاخرين
وربنا يسترها لو عايز تسيبه ف العربيه حطه ف درج او ف الباب كده ميكونش باين

وربنا يخلفك خير ياجميل

ما هى لو العالم تراعى ربنا هتعرف ان الراجل ده مش سارق فلوس
الموبيل ولا سارق فلوس العرييه
ده تعب وشقى
حسبي الله ونعم الوكيل