بنزين80ولا90ولا92؟

[abo_pasem]

السلام عليكم ورحمه الله وبركاته

إزيكوا يا لوجاناويه؟

مره دخلت بنزينه عشان امون
عاده انا بمون بنزين 90 او 92 بس انا لقيت في صف بنزين80 عربيتين لوجان وواحده ميجان وواحده كليو
فسألت عن الموضوع قالولي ان عربيات رينو في مصر بتشتغل بنزين 80 عادي جدا
فرحت ممون بنزين 80 وزيي زي غيري ولقيت العربيه عادي يعني
بس السحب معدش زي الاول ومالقيتش اي تقطيع او دربكه في صوت الموتور

حد عنده فكره عن الموضوع ده؟

وعلي فكره انا قرأت في كتالوج اللوجان انها بتعمل ببنزين عاده وبين قوسين بنزين 80 الموضوع ده صح ولا غلط؟

[MOUSTAFA_SAAD]

المعلومه اللى انت قريتها فى الكتالوج دية فى اى صفحه

[klaw]

طبعا معلومة غلللللللللط انت حتبوظ الانجيكشن بتاع الموتور و على غطا التنك حتلاقى بنزين 90 92 98 ..... مفيييييييييش 80 دى خللى بااااااالك حاجة العربية دى غلية اوىىىىىىىى

[wassim_nasser]

انا عن نفسى لما استلمت فولت 92 .. أي نعم بيتي إتخرب لأنى دفعت يومها 100 جندي بس كفاية احساسك انك محافظ ع العربية ومش مقصر معاها .. ولو كنت لقيت 102 كنت هافول برضه

[Egyzizo]

أنا من ساعة ما جبتها وأنا ماشى صفيحة 80 + صفيحة 92 فى كل تفويلة وعديت دلوقتى عشرين ألف وماشى الحال.

[hysagm]

طبعا معلومة غلللللللللط انت حتبوظ الانجيكشن بتاع الموتور و على غطا التنك حتلاقى بنزين 90 92 98 ..... مفيييييييييش 80 دى خللى بااااااالك حاجة العربية دى غلية اوىىىىىىىى

انت كده كلامك مظبوط ومؤكد بالدليل لان مفيش فى الكتالوج حاجه تمت للبنزين 80بصله وياريت الاداره تحذف الموضوع علشان محدش يقلد صاحبنا ويرجع يقول منهم لله بتوع نايل موتورز ولا ايه

[mazenzyad]

يا ريت متكررهاش تانى ، بنزين 92 فقط المطلوب و فى الطوارىء 90 ، اقرأ غطا التانك .

[waleedfadeel]

1- الرقم العالى للاوكتان (و90و92و95و98) لايعنى ان البنزين نظيف او نقى من الشوائب او الرواسب.
2- نسبة الأوكتان تحدد ازمن بدء اشتعال الوقود داخل غرفة الأحتراق (جزء من الثانيه).
3- كل موتور مصمم على نسبة انضغاط معلومه وبالتالى يحتاج الى نوع الاوكتان المناسب لهذه النسبة ولابد ان يقوم المصمم بتحديد نوع الاوكتان فى الكتالوج حتى يحدث الاشتعال فى الوقت المضبوط والمناسب للموتور .
4- اذا لم يحدث الاشتعال فى الوقت المضبوط وفى اللحظه الزمنيه المصمم عليها الموتور تحدث اجهادات شديدة على سطح المكبس (مما يسبب صفع و تسقيف) واجهادات على ذراع التوصيل البيل و عمود الكرنك.
5- استخدام اى بنزين ذو رقم اوكتان اقل من الموصى به من قبل الشركة المصنعة يقلل من عمر الموتور وذلك لحدوث التسقيف.
6- السيارات القديمه تستخدم بنزين 80 لان موتورها مصمم لذلك.
7- السيارات الحديثة مثل اللوجان من الصعب ان تسمع فيها صوت التسقيف عند استخدام بنزين اقل من الموصى به نظرا لتكنولوجيا العزل الحديثة للمواتير.
8-كل سقفه وتصفيقه داخل الموتور تؤثر على العمر الافتراضى للموتور لانها بخلاف الاجهادات بتعمل نقر داخل اسطوانة الحريق ونقره على نقرة واجهاد على اجهاد يحدث انهيار الموتور.
9- يعنى من الاخر كل مرة تحط فيها بنزين اقل من الموصى به يقل عمر الموتور بتاع العربيه وده السبب ان عربيه موتورها يعمل 100 الف والاخرى يعمل 300 الف كم.
10- كتالوج اللوجان وتعليمات على تانك البنزين من الداخل توصى ببنزين 91 فاعلى.
11- انا بحط بنزين 92 لانه اعلى من 91 الموصى به ولا استخدم بنزين 90 لانه اقل من 91 الموصى به وبالطبع بنزين 80 مرفوض تماما.
ارجو ان اكون قد افدت

[clenceman]

حط بنزين 92
وماتستخسرش عشان ماتخسرش

[clenceman]

وبالنسبة ليا
بحط 92 على طول
ويوم القبض باحط تفويلة 95
أى نعم قطمة وسط بس بجد باحس ان العربية بتفوق

[nour_nrc]

وبالنسبة ليا
بحط 92 على طول
ويوم القبض باحط تفويلة 95
أى نعم قطمة وسط بس بجد باحس ان العربية بتفوق:10d5c8w1107:

+111111111111111111111111

[lena jo]

92only. They told me so at Renault when I bought the car. Don t jeopardize the motor s safety

[abo_pasem]

انت كده كلامك مظبوط ومؤكد بالدليل لان مفيش فى الكتالوج حاجه تمت للبنزين 80بصله وياريت الاداره تحذف الموضوع علشان محدش يقلد صاحبنا ويرجع يقول منهم لله بتوع نايل موتورز ولا ايه

والله المعلومه دي واخدها من المنتدي ده والدليل موجود في اللينك ده
واللي بيوضح البطاقه الفنيه للوجان

http://www.nilemotors.net/Nile/25545-a.html

المحرك:

السعة 1600

التصميم احادى الكامة ب 8 صباب

القدرة القصوى 87 حصان على 5500RPM

العزم الاقصى 128 نيوتن متر على 3000RPM

نسبة الأنضغاط: 9.5

تغذية الوقود: حقن الكترونى متعدد النقاط

نوعية الوقود: عادى (عادة يقصد بها بنزين 80 ، وهم كاتبين فى الموقع الرسمى بتاع رينو ان المحرك مصمم لاستعمال انواع متدنية من الوقود المتوافرة فى دول العالم الثالت)

السرعة القصوى:
175 كيلومتر فى الساعة



آلات الجر:

عدد الغيارات :5 امامى + 1 خلفى

ويبقي كده انا باتكلم صح ولا إييه؟

والموضوع ده موجود في المنتدي والاخ الكريم يطالب الإداره بحذفه
انا مش زعلان ولا حاجه لأن المعلومه دي معروفه من رينو نفسها وادخل سعادتك علي الموقع الرسمي وهتلاقي كلامي مظبوط

[Super_Star_h]

بتسقف بس انت مش سامعها ولسه محستش بيهاا
لما تمشى فى حته مقطوعه كده وتلاقى الصوت بيرن هتسمع التسقيف
نصيحه مش تحطه كتير وورا بعضه
يعنى خلى تفويله 80 وتفولتين تلاته 92
عشان يمشى الحال
ومتسدش الرشاشات والسحب يقل

[abo_pasem]

بتسقف بس انت مش سامعها ولسه محستش بيهاا
لما تمشى فى حته مقطوعه كده وتلاقى الصوت بيرن هتسمع التسقيف
نصيحه مش تحطه كتير وورا بعضه
يعنى خلى تفويله 80 وتفولتين تلاته 92
عشان يمشى الحال
ومتسدش الرشاشات والسحب يقل

علي فكره انا عمري مافولت 80 خالص انا مره واحده بس حطيت 80 و10 لتر بس
أنا مش هجازف بالرشاشات عشان اوفر 10 جنيه في البنزين ولا حاجه الحمد لله مستوره بس المصنع بتاع رينو نفسها بيقول بنزين 80 وإحنا نقوا بنزين 93 او 92 طيب نسمع كلام ميين؟
ماهو برضه حاجه تحير مش كده؟
وعمري ما هاستخسر في عربيتي بنزين حتي لو كان 99 او120 حتي بس الشركه بتقول 80.

وتحياتي