رفع البصمة عاملي قلق!

[wassim_nasser]

الموضوع وما فيه ياجماعة انى لما أخدت لوجي عشان ارخصها .. شلت الغطا عشان اشوف رقم الموتور قام الفنى لزق الورقة وقعد يشخبط بالرصاص عشان يطلع الرقم والرقم حلف ميت يمين مايطلعش .. غيرنا عشرين ورقه والرقم مش عايز يظهر .. جبت شريط لاصق بدل الورقه وبرضه الرقم مش عايز يظهر .. الفنى بتاع رفع البصمه حط حاجه كده شبه الحبر (بيقول عليه منظف) علي البصمه وبرضه الرقم مش ظاهر .. فين وفين علي مانضفتها بمنديل وقعدت اشخبط جامد جبت 3 ارقام بس من ال 5 بتوع الموتور وكنت هابوس علي ايد المهندس عشان يمشى الورق ومشي فعلا بس بقيت قلقان لما اجي اجدد الترخيص اتصرف ازاي .. ياتري حد حصل معاه كده وايه الحل؟

[kar!m]

امال الناس الل ماشية ف البلد دى كلها رفعت البصمة ازاى؟ .. أكيد المشكلة ف الفنى.

[wassim_nasser]

يا باشا أنا حطيت الورقة بنفسى وقعدت اشخبط حسيت المكان اللي عليه الرقم مخرفش أو خشن عشان كده الرقم مش عايز يطلع ومش عارف دي تتحل ازاي

[korkor]

ياعم مش الموضوع مشى وطلعت الرخصه يبقى ربنا يحلها بقى كمان 3 سنين

[zkralla]

انا الفنى طلع شخبطه ولا باين منها اى حاجه
بس الموضوع مشى عادى

[wassim_nasser]

ماهو أنا مكبر دماغي عشان كده بس خايف يخنقوا عليا المرة الجاية وشكلي انا بس اللي حصل معايا كده أو فيه حاجه غلط انا مش فاهمها الله اعلم

[ahmedbakr50]

هوه العيب فى الفنى على ما أظن
عشان أنا لما رخصت نزل إيده زى ما يكون حافظ العربية وشخبط والأرقام ظهره فى الشخبطه

[Dr.Karim Emam]

على فكرة المشكلة دي كانت موجودة أول ما اللوجان نزلت لغاية ما العمال في المرور بقوا يعرفوا يظبطوها ازاي
بس يمكن عشان في سوهاج عدد العربيات اللوجان مش زي القاهرة و الاسكندرية فأكيد لسه معاهم فترة على الموضوع ده

[wassim_nasser]

طب ودي حلها ايه يا دكتور؟ المشكلة ان الحكاية مافهاش فن .. انا اللي رفعتها بنفسى .. بتلزق الورقه وبتقعد تشخبط .. ايه اللي هايقدر يعمله الفنى تانى؟ هل فيه ماده تنضف البصمة ولا حاجه توضح الارقام؟

[MOUSTAFA_SAAD]

هى صعبه فعلا ولما جيت ارخص حلفت ماتطلعشى الا لما الفنى خاد منى 5 جنيه وعشره جنيه للميكانيكى اللى فك الوش الصاج
يعنى هى دية المشكله اساسا وفى الاخربياخدوا الرقم من ورق العربيه لانى لما شوفته لاقيته مستحيل يتقرى يعنى سد خانه وخلاص

[roua2007]

ههههههههههههه

اخيرا لاقيت واحد زي انا طلع عني وكنت ناوي مجبش العربية بسبب البصمة

انا خدت العربية في مرور اكتوبر

وروحت علشان اطلع البصمة مش رادية تظهر فضلما كده يجي ساعة

وفي الاخر بتاع البصمة جاب مراية وعكس الشمس عليها وشاف الرقم بعينة وكانت الكارثة

الرقم مختلف عن الرقم بتاع شهادة البيانات

ورحت مخنوق وكنت عاوز ارجع العربية مش ناوي اشتري خلاص لحد ما راحو بعتولي عربيةة تانية

بس علي العموم الرقم علشان كومبيوتر فهو مقرف حتي مع العربية التانية المهندس فضل يبص كويس ومعرفش لغايت لما قلي خلي بالك منها

بس مفهمتش يعني ايه

المهم انها اترخصت

الحمد لله ويبركللي فيها
ويبارك لكل اللي معاه عربية

[wassim_nasser]

يعنى المشكلة عامة .. ماشاء الله .. يعنى انا حققت براءة اختراع و أوجدت مشكلة جديدة ف لوجى .. فعلا الخير علي قدوم الواردين

[tamer61]

الله ينور يا عم وسيم .... كفايه بقا براءات مشاكل ... قصدي إختراعات وعموما أنا لما جيت ارفع البصمه محدش قالي إن في أي مشكله واجهته و ما أخدتش أكتر من 5 دقائق.

[wassim_nasser]

يابختك يا عم تامر ده انا خلصت الورق كله من 8 و نص ل 9 و نص و موضوع رفع البصمه لوحده قعدت فيه لحداشر و نص .. وربنا يستر المرة الجاية ولو انى مكبر دماغي عشان الترخيص كل 3 سنين

[ABOHAZEM_NEW]

موضوع البصمه ده صعب فعلاً فى اللوجان والكل تقريباً إتعرض له ..
لأن مكان البصمه صعب وربنا سترها معايا وعدت فى الترخيص بعد عذاب ومراضيه للراجل بتاع البصمه بعد ما شخبط على كل الورق اللى معاه نقل الرقم من شهادة البيانات وخلاص
مش عارف ده فى اللوجان بس علشان محفوره بالكمبيوتر (مش عارف يعنى أيه) ولا موجود فى العربيات الجديده التانيه
المهم هى مشكله هتظهر كل ثلاث سنوات إن شاء الله متقللش من العربية أكيد فى الترخيص الجاى لو لينا عمر هيكون شافوا ليها حل
مبروك لكل اللوجانيه .. ربنا يسعدكم بالعربية .. ويكفيكم شرها ..
وتكون مشاويكم دائماً فى الخير .. سواء ببصمه أو من غير