السلام عليكم ياشباب. باركولى

[a7madahly]

باربكولى ياجماعه انا ان شاء الله هستلم اللوجان كمان يومين والحمد لله
. انا عارف قطع غيارها غاليه بس العربيه اما هتنتشر هترخص كتير ان شاء الله
عايز نصايحكم بقا. استلمها ازاى؟؟ واعمل ايه واشيك على ايه

[Dr.Karim Emam]

ألف مبروك و ربنا يتمم علي خير

1-عايز أعرف إيه الاوراق اللى المفروض أستلمها(العربية كاش)
المبايعة + شهادة البيانات + كتالوج العربية + كتالوج الصيانة+ كتالوج الكاسيت
2- إيه الاكسسورات اللى حستلمها معاها زى الدواسات وخلافه
دي علي حسب المعرض ممكن يديك دواسات وممكن لا
3- إزاى أشييك على العربية..ىعنى اشيل اللزق الابيض و ابص تحتيه على الخربشه وخلافه ولا لأ
شييك علي كل حاجة في العربية وجرب المفتاحين بتوعها ولف حواليين العربية وتاكد ان الكاوتش كله نوع واحد بما فيهم الاستبن و جميع الانوار والكاسيت والتكييف والجسم الخارجي للعربية و يستحسن انك تشيل اللزق و تبص تحتيه و إن شاء الله حتلاقي كل حاجة تمام وتاكد من الاستبن والاريال والعدة بتاعة العربية
4- أفتح الكبوت و ابص على اييه بالضبط
كل سوائل العربية فرامل باور مياه تبريد

[a7madahly]

ألف مبروك و ربنا يتمم علي خير

شكرا

[wassim_nasser]

الف مبروك يا بومبو وربنا يديك خيرها و يكفيك شرها .. اهو الدكتور كريم قالك اللي فيها ولمزيد من التفصيل هاقولك تبص علي ايه (حاول ترصهم ف ورقه عشان ماتنساش حاجه وكل ماتطمن علي حاجه تعلم جنبها صح) :

أولا ; الشكل الخارجي .. تشيل أي لزق ابيض وتبص ع الكبوت والشنطه والابواب وتتأكد من الاكصدام والرفارف يكون مفيش أي خدوش .. تتأكد كمان من ان ال 4 ابواب والشنطه بيفتحو و يقفلوا مرتاحين مفيش حاجه بتعلق

ثانيا الدواخل ; الفرش كويس مش متقطع - الحزام والكوالين اللي بيدخل فيها التوك بتاعته -نور الصالون ودرج التابلون - الكرسى بيطلع لقدام و ورا وفوق وتحت وضهره مظبوط - الكاسيت شغال (ابقى خد معاك سى دي أوديو مش mp3 ) - النور عالي و واطي (خلي بالك بيكونوا موطينه ابقا عليه من المفتاح اللي جنب دراع فتح الكبوت) و فوج واشارات وانتظار - التكيف شغال هوا من جميع الفتحات وعلي كل السرعات و ساقع وسخن - السنتر شغال - الإزاز فوق وتحت ال4 - الكلاكس - المساحات بجميع سرعاتها - دور العربية وحس بالدبرياج والغيارات واختبر مشوار البنزين والفرامل - افتح الكبوت واقفله هايطبق احنا هانعدله (حته شعبى)

ثالثا الملحقات (كان الدكتور كريم وضحها) ومن ضمنها الاريال و كتالوج العربية والكاسيت وكتيب الصيانة والعده تتضمن مفتاح العجل هاتلاقيه في الجنب اليمين من الشنطه والكوريك في الجنب الشمال والطفاية (سجاير مش حريق) قدام الفتيس

واخيرا وليس اخرا فول 92 و اظبط ضغط الكاوتشات عشان هاتلاقيه عالي جدا 40 وربنا يجعلها قدم السعد عليك والف مبروك

[abo_pasem]

مبروك يا باشا والوجاناويه زادو واحد مهم جدا

[gebreel]

الف مبروك يا باشا و الوحوش غطوا و زيادة =)

[a7madahly]

الله يبارك فيكو كلكو ويحفظنا من شر الطريق .. امين

[tamer61]

مفيش حاجه أقدر أضيفها غير ........ ألف مبروك و ربنا يباركلك فيها.

[tekoooooo]

مبررررووووووووك وعقبالى
اخر الشهر ان شاء الله