خبطت الكلب والمقص اتكسر

[zemoss]

السلام عليكم

إزيكم يا شباب

معلش لو حد يفدني في المشكله دي.

كنت ماشي على الطريق الصحراوي بالليل وفجأة لقيت كلب بيجري امام العربيه

الصراحه خفت افاديه علشان السرعه وعلى قد ما اقدرت حدفت بالعربيه يمين وضربت فرامل بشويش
لغاية ما وقفت بعد حوالي 100 متر

لاقيت الكوتش لزق في الرفر - يعني رجع للخلف ناحية باب السائق - وطبعا كان مطلع دخان علشان الاحتكاك اللي حصل مع الرفرف ...

عرفت بصعوبه ارده للامام تاني بس طبعا كان بيرجع يخبط في الرفرف لو في مطب او لما بضرب فرامل.

الحمد لله مشيت على سرعة 20 كيلو لغاية ما وصلت البلد وكشفت على العربيه في النص كده عند البنزينه
لاقيت المقص مكسور ولما وصلت البلد كشفت تاني طلع نفس التشخيص

كنت عايز اسال الاقي فين مقص للعجله يكون اصلي وكمان عايز اشتري اكصدام فيبر علشان الإكصدام بتاعي اتاكل والفوج لايت الشمال وقع واليمين مش شغال دلوقتي


ارجو الإفاده

جزاكم الله خيرا

[amriar]

الف مليون سلامه عليك .. الحمد لله انها جت علي قد كدا ..

[تامر.محمد]

الحمد لله على سلامتك و قدر الله ماشاء فعل

[zemoss]

الله يسلمكم

جزاكم الله خيرا

بس يا ريت لو حد يفدني في موضوع قطع الغيار دي

[ahmad333]

ممكن اعرف نوع الكلب الى خبطته وقدر يكسر المقص

[ehab98]

ممكن اعرف نوع الكلب الى خبطته وقدر يكسر المقص

++++++++1

هههههههههههههههههه

[mohamed_selim]

الحمدلله على سلامتك ... الكلب اخطر حاجه لأن عضمه ناشف جدا و كان ممكن يقلبك
مره خبطت كلب على طريق سفر و اخدته فى نص العربيه كسر قواعد الرادياتير و عوج فلتر الزيت و كانت ليله

[mostafabakry]

الف حمدلله علي السلامة و قدر الله و ما شاء فعل وكله فداك

بس انا مستغرب جدا من ان كلب يكسر مقص للدرجة دي

انا لسه عامل حادث بالعربية و كنت ماش فوق ال 100 كم /س و دخلت في حواجز و براميل حديد و حجارة من بتاعة الرصيف و القنطرة اتعوجت و الاكصدام اتشرخ ركية من سلاح الشاسية اتعوجت للداخل و قفشت علي طمبورة كباس التكييف بس المقص الحمدلله سليم
و دا حجر خرسانة

معقولة الكلب يكسر مقص و لا انت ااخدت حجر و انت بتفاديه و مخدتش بالك منه

عموما حمدلله علي سلامتك فيه موضوع في الموضوعات المثبته بيتكلم عن محلات بتبيع قطع غيار اللوجان باسعار كويسة و ان شا الله تلاقي المقص و العربية ترجع زي الاول

[eng_hatmido]

محدش هيفيدك ...خصوصا اللي شغالين في التوكيل ... عشان ايه ... الله اعلم ؟؟؟!!!!!!!

[KHALED AYMAN]

قدر الله و ما شاء فعل
الناس الى بتقلل من مهارات الكلب
انا خدت كلب ..فى نص الاكصدام بفيكترا سى الى هى يعنى المانى و قويه و الكلام ده
جاب اكصدام (الاكصدام دخل الخلاط) و فوج لايت ..الرداتير و السربنتينه بقو حته واحده و بقو على شكل حرف u
والكلب عدى من تحت العربيه خرج من ورا بيهوهو و بيجرى
الكلب عضمه قوى جدا جدا جدا

[akerima]

لو من القاهرة انا اعرف ان فية ناس في التوفيقية متخصصين لوجان وقطع الغيار هناك رخيصة - انا للاسف معرفش تمن المقص كام بس باذن الله مش حتلاقيه غالي لان ليا صديق كان عامل حادث وكان معدي الجزيرة للناحية التانية وغير عفشة كاملة بالقنطرة واتكلف حوالي 1700 ج ودا بالمساعدين واليايات اللي هما بيبقوا اغلي حاجة في العفشة فباذن الله مش حتلاقي المقص غالي ويا ريت تبقي تطمنا بعد ما تصلح العربية

[zemoss]

جزاكم الله خبرا يا شباب

ويا رب منشوفش حاجه وحشه لعربية أي حد فيكم

ان شاء الله هصلحها وهقولكم على النتيجه

دعواتكم

[zemoss]

السلام عليكم

تم شراء الآتي حتى الآن :


مقص شمال من التوكيل ( الصراحه محبتش أخاطر قي حاجه زي كده) .... 645
اكصدام فيبر (فاضي طبعا من غير شبك ولا أي حاجه) ....400
علامه رينو ..... 35
فوج لايت 85 (مش فاكر الماركه بس مش صيني)
شنب شمال (معلش إسمه غريب) علشان الفوج لايت ..... 70

حاسس ان الارقام مبالغ فيها شويه ... قولت افيدكم وان شاء الله هضيف الموضوع بعد ما انتهي من تصليح العربيه في أسعار قطع غيار اللوجان .... ولو لاقيت الاسعار كويسه هضيف إسم ومكان المحل

جزاكم الله خيرا

[akerima]

السلام عليكم

تم شراء الآتي حتى الآن :


مقص شمال من التوكيل ( الصراحه محبتش أخاطر قي حاجه زي كده) .... 645
اكصدام فيبر (فاضي طبعا من غير شبك ولا أي حاجه) ....400
علامه رينو ..... 35
فوج لايت 85 (مش فاكر الماركه بس مش صيني)
شنب شمال (معلش إسمه غريب) علشان الفوج لايت ..... 70

حاسس ان الارقام مبالغ فيها شويه ... قولت افيدكم وان شاء الله هضيف الموضوع بعد ما انتهي من تصليح العربيه في أسعار قطع غيار اللوجان .... ولو لاقيت الاسعار كويسه هضيف إسم ومكان المحل

جزاكم الله خيرا

الحمد لله واهم حاجة حضرتك بخير - قدر الله وماشاء فعل

[ahmad333]

قدر الله و ما شاء فعل
الناس الى بتقلل من مهارات الكلب
انا خدت كلب ..فى نص الاكصدام بفيكترا سى الى هى يعنى المانى و قويه و الكلام ده
جاب اكصدام (الاكصدام دخل الخلاط) و فوج لايت ..الرداتير و السربنتينه بقو حته واحده و بقو على شكل حرف u
والكلب عدى من تحت العربيه خرج من ورا بيهوهو و بيجرى
الكلب عضمه قوى جدا جدا جدا

طب الكلاب الى بشوفها متقطعه ومنداسه دى على الطرق تطلع ايه وبعدين طلع يهوهو والله انا الى هوهو