سؤال الى مالكى سانديرو 2011

[foxtronics]

السلام عليكم جميعا
من فضلكم انا معايا سانديرو 2011 وكنت عايز اعرف هل انا الحاله الوحيده كدا ولا فيه حاجه غلط
لما استلمت الرخصه لقيت مكتوب فيها اسم العربيه لوجان ف طبعا عشان يوم المرور بيبقى اغلس يوم فى السنه ف قررت انى مسألش او ارجع بالرخصه حتى قرب نهايه مدتها والتجديد وطبعا انا خلاص قربت اجدد على شهر 2 كدا نظرا لانى بقسط ومينفعش اجدد اكتر من سنه فى المرة ف قولت اسأل ملاك سانديرو هل اطلب اغير اسمها فى الرخصه ولا هيا كدا مظبوطه وشكرا ليكم جميعا

[ahmedeg1]

أطلب ورق الإفراج الجمركى و شوف اسمها ايه و أعتقد هتلاقى مكتوب لوجان سانديرو

[foxtronics]

متشكر جدا

[mostmoh]

البنك رفض الرخصة لأن مكتوب فيها لوجان ، وطلبو منى أجيب الرخصة ومكتوب فيها سانديرو أو أعمل شهادة بيانات ، ورجعت المرور ودوخونى يومين، وكتبوها على الرخصة بخط اليد سانديرو بجانب كلمة لوجان.

[wassim_nasser]

كانت عندي المشكله دي لما رخصت اللوجان وكنت جايبها 2011 واكتشفت انهم كاتبينها ف الرخصه 2010 .. رحت واخد ورق العربية كله ورحت المرور للي بيراجع الملف راح واخده للظابط وكتبولي ورقه نرجو تصحيح الخطأ و رحت بيها لموظف الكومبيوتر طلعلي رخصه جديدة وأخد القديمة

[ahmedmohamed7]

اول مرة رخصت كان مكتوب فى الرخصة لوجان سانديرو....بعد كده الرخصى ضاعت و عملت بدل فاقد لقيتهم كاتبين رينو سانديرو من غير لوجان :)

[legallypink]

انا عضوة جديدة يا جماعة...و بجد السنديرو عاجبانى جدا...بس الناس و الميكانيكية بالذات بيخوفونى منها و بيقولوا انها مابتتصلحش غير فى التوكيل و ما فيش ميكانيكى بيفهم فيها..الكلام دة صح؟و سعر اعادة البيع بيقولوا بيبقى وحش جدا!!!!!please helpppppp

[foxtronics]

متشكر جدا ليكم يا جماعه على الاهتمام دا وبالنسبه للأخت اللى خايفه من العربيه عشان كلام الناس ودا طبعا حقها انا بقولك ان السانديرو هيا هيا اللوجان مع الاختلاف فى الشكل الخارجى وطبعا معروف مدى انتشار اللوجان وكمان معروف انها مفيهاش شغل معقد وان فيه ميكانيكه كتيييييير جدا بقوا شغالين فيها
بس طبعا فكرى كويس جدا قبل الشراء

[ahmedeg1]

اول مرة رخصت كان مكتوب فى الرخصة لوجان سانديرو....بعد كده الرخصى ضاعت و عملت بدل فاقد لقيتهم كاتبين رينو سانديرو من غير لوجان :)

يا فندم بتوع الفته كتير جدا بلاش تسمعى كلامهم انا بعمل صيانه لعربيتى بنفسى
ممكن تشوفى الموضوع ده و تقريه يمكن يفيدك فى القرار

http://www.nilemotors.net/Nile/249863-a.html

[legallypink]

متشكرة جدا على الرد...انا اصلا ميالة جدا للعربية دى..وان شاء اللة هتوكل على اللة و اشنريها

[ahmedmohamed7]

متشكرة جدا على الرد...انا اصلا ميالة جدا للعربية دى..وان شاء الله هتوكل على الله و اشنريها

فيه اخبار بتقول ان التوكيل فتح باب الحجز للوجان اوتو و للسانديرو ستيب واى اوتو....سعر اللوجان هيكون فى حدود 79000جنية....السانديرو الله اعلم,,,,,الللوجان الاوتو هتنزل بموتور و طبعا فتيس مختلفين..الموتور 1600 سى سى و 16 صباب و 105 حصان...+ الفتيس الستيب ترونيك :)

اتمنى حضرتك تسالى عليها فى التوكيل و تشوفى الى يناسبك و لو لن المؤشرات الاولى بتقول ان العربية اللوجان مع الفتيس الاوتو ادائها اقل من المانول....عامتا من راى الصبر شوية و كل حاجة هتبان ان شاء الله .....بالتوفيق و مبروك مقدما ...

[Egyzizo]

فيه اخبار بتقول ان التوكيل فتح باب الحجز للوجان اوتو و للسانديرو ستيب واى اوتو....سعر اللوجان هيكون فى حدود 79000جنية....السانديرو الله اعلم,,,,,الللوجان الاوتو هتنزل بموتور و طبعا فتيس مختلفين..الموتور 1600 سى سى و 16 صباب و 105 حصان...+ الفتيس الستيب ترونيك :)

اتمنى حضرتك تسالى عليها فى التوكيل و تشوفى الى يناسبك و لو لن المؤشرات الاولى بتقول ان العربية اللوجان مع الفتيس الاوتو ادائها اقل من المانول....عامتا من راى الصبر شوية و كل حاجة هتبان ان شاء الله .....بالتوفيق و مبروك مقدما ...

سانديرو ستيب واى مش نازلة أوتو.
السانديرو العادية نازلية أوتو وسعرهى 82900 جنيه

[ahmedmohamed7]

سانديرو ستيب واى مش نازلة أوتو.
السانديرو العادية نازلية أوتو وسعرهى 82900 جنيه

+1 كلام حضرتك مزبوط....لسه عارف كده من صفحة رينو مصر على الفيس ....شكرا يا فندم على التصحيح