تغيير كاوتش للوجان

[AIRSUPPLY13]

السلام عليكم...

عربيتي عملت 30 الف الحمدلله و راضي جدا عن اختياري للوجان

كنت عاوز اغير الكاوتشات بالرغم من ان ناس بتقولي لسه بدري ...بسفي كاوتشين مش مريحيني نفسيا واحد في حتة سلك صغيرة بارزة و التاني فيه اتر من خابور

عاوز نصيحتكم لو هاغيرهم 2 في 2 اجيب اية ؟ و منين ؟ و بكام ؟

جزاكم الله خيرا

[amr.elsayed]

بص يا باشا انا عن نفسى خبرتى مع تغيير الكاوتش بعافية شوية
بس انصح حضرتك انك تنتظر شوية وتشترى الاربع فرد مرة واحد علشان الكاوتش القديم ما يزودش
تآكل الكاوتش الجديد
لكن لو قررت انك تشترى اتنين بس يبقى على اقل تقدير تجيب نفس نقشة الكاوتش
وربنا يوفقك وانتظر رد باقى الاعضاء

[gebreel]

2 مع 2 هيعملك مشكلة مع ثبات العربية لاختلاف النقشة

الافضل انك تستنى 5000 كمان مثلا و تغيرهم ال 4 مرة واحدة علشان يبقوا كلهم نفس النقشة و نفس العمر و يتغيروا كلهم مع بعض بردو

[Ahmed A Rahman]

استنى لغاية الاربعين وغير الاربعة


لو تمسكت برأيك وغيرت اثنين بس حضرتك حتحط الاثنين الجداد ورا مش قدام زي ما قالت جميع شركات الكاوتش مش زي ما الصنايعية المصريين بيقولوا

اللهم قد بلغت اللهم فاشهد

[frhateg]

استنى لغاية الاربعين وغير الاربعة


لو تمسكت برأيك وغيرت اثنين بس حضرتك حتحط الاثنين الجداد ورا مش قدام زي ما قالت جميع شركات الكاوتش مش زي ما الصنايعية المصريين بيقولوا

اللهم قد بلغت اللهم فاشهد

اعرف طول عمري ان الكاوتش الجديد يركب قدام . ايه الحكمه ان شركات الكاوتش تقول عكس اللي طول عمري اعرفه . ياريت تفسير من الخبراء .

[AIRSUPPLY13]

ringoo
gebreel
Ahmed A Rahman
frhateg

متشكر جدا على ردودكم و نصائحكم .....طيب ان شاء الله ممكن ااجل لغاية ما تتوفر فلوس الخمس فرد مش الاربعة بقى ......السؤال تنصحوني اجيب ماركة ايه و هاتكون في حدود كام

جزاكم الله خيرا

[Egyzizo]

اعرف طول عمري ان الكاوتش الجديد يركب قدام . ايه الحكمه ان شركات الكاوتش تقول عكس اللي طول عمري اعرفه . ياريت تفسير من الخبراء .

ده كان فعلاً المتعارف عليه لغاية التسعينات وعلى مستوى العالم كله مش فى مصر بس.
بس أبحاث الأمان الحديثة لقت العكس : لو هتغير كاوتشين فقط، الجداد يركبوا ورا مش قدام لأن ده بيساهم فى زيادة الأمان. والسبب باختصار لأن الكاوتش القديم هيخللى العربية تعوم وخاصة على الطرق المبلله ، بينما يحافظ الاطار الجديد ذو النقشة السليمة على العربية من غير تعويم.

والسبب بالتفصيل فى الفيديو التالى كما وضحته شركة ميشلان :

Install Two New Tires on the Rear Axle - YouTube

[tamer61]

أنا شخصيا غيرت الأربع كاوتشات بعد 45000 كم وجبت بريدجستون B250 ... مريح وهادى على الطريق والأفضل منه أكيد ال Turanza بريدجستون برضه بس أغلى في السعر . وربنا يوفقك للخير.

[RenaultLover]

بجد وعن تجربة انصحك ببريللي cinturato جامد جدا
الفرق بينه وبين الكومهو زي الفرق بين الشبشب والكوتشي بالظبط
هو حراق شوية بس يستاهل
الفردة بتعمل تقريبا 480
وياريت لو تغير الأربعة علشان الكومهو ده كاوتش تعبان جدا وما يتبكاش عليه

وعلى فكرة انا مهندس برامج وماليش دعوة ببريللي ولا اللي بيوزعوها

وشكرا

[AIRSUPPLY13]

شكرا يا تامر.....بس جبتهم بكام و منين لو سمحت
شكرا يا RenaultLover على و حاحطها في الحسبان

معني كدة يا جماعة ان مافيش توصيات لحاجه محددة زي النقشة او رقم الكاوتش؟؟

[amr.elsayed]

معني كدة يا جماعة ان مافيش توصيات لحاجه محددة زي النقشة او رقم الكاوتش؟؟

هو بينى وبينك فى اوروبا والدول المتقدمة بيهتموا بموضوع النقشة وكلا على حسب استخدامه
طرق مبللة او جليد او سرعات عالية
لكن احنا هنا بنهتم بمقاس الكاوتش بس يكون نفس مقاس الكاوتش 185/65/15
واهتم كمان بتاريخ صنع الكاوتش لان عمره الافتراضى 5 سنين فا ماتجبش كاوتش قديم ويكون تلف من كتر التخزين
وربنا يوفقك

[gebreel]

بص يا باشا خليك مع البريدجستون ممتاز و ممكن الميشلان لأن العربية كانت بتنزل بيه تلاقي فيه نفس النقشة بتاعتنا بس عموما البريدجستون هيريحك و هيقعد معاك مدة كويسة

انا اما جيت اجيب كاوتش للادا نزلت سألت على المقاس ايه اللي موجود فيه و اسعاره و نقشته و بعدين رجعت عملت search على النت و قريت مميزات و عيوب كل نقشة حاطط في اعتباري السعر و في الاخر جيبت Good Year Dura Grip فردة في المية ماسكة نفسها و عن تجربة، صوتها مش هادي للدرجة المهولة بس مقبول و نقشتها مش واسعة علشان متلمش ظلط كثير

قعدت اقارن بين الانواع حوالي اسبوعين و بعدين اتوكلت على الله، موضوع متعب شوية بس هيريحك بعدين و تحس بيه كل ما ها تركب العربية

[zemoss]

السلام عليكم

أنا غيرت الكاوتش (الأربعه ) على 40000

جبت الكومهو

والحمد لله ماشي كويس معايا حتى الآن (أنا دلوقتي عامل حوالي 60000)

بس مجربتش غيره ... يفضل تسأل واحد جرب أكتر من نوع علشان المقارنه تبقى صح

لإن كل واحد بيقدر يقيم النوع اللي جربه وبيسمع عن الباقي فقط

بالنسبه لميعاد التغيير .. لو بتمشي على طرق سريعه يا ريت متجازفش وغير كاوتشاك دلوقتي وخلي الاتنيين اللي مش بايظين معاك احتياطي لأي ظرف

أمّا لو بتمشي فقط داخل المحافظه بسرعه مقبوله يبقى اصبر لغاية ما توصل لــ 40000 كيلو

بالتوفيق وربنا يباركلك فيهم

[zemoss]

سعر فردة الكومهو الكوري h مقاس اللوجان 65-185-15 440 جنيها

يفضل تجيب h مش t

[tamer61]

الفرده كانت عامله حوالي 460 أو 470 مش فاكر بالظبط وجبتهم من عندنا في العاشر من رمضان وكمان الترصيص - النيتروجين و الزوايا مجانا وممكن تدخل على موقع بريدجستون وتشوف النقشه بتاعته و أهم ميزه فيه إنه هادى و كفائته كويسه جدا في الأراضي المبتله .... وحتحس بفرق كبييييير في نعومة العربيه على الأرض.