فاكرين عضة المارشيدير؟!

[Egyzizo]

طبعاً هيفتكرها الأعضاء القدام واللى معاهم موديلات 2009 و 2010 ..
لأنى مش شايف حد دلوقتى بيشتكى منها من أصحاب الموديلات الأحدث.

دلوقتى أنا داخل على صيانة الـ 40 ، ودى قد تكون آخر صيانة مدفوعة ليا قبل انتهاء الضمان (الوقت بيجرى بسرعة ، مع انى حاسس انى شارى العربية امبارح :) )

المهم ، موضوع عضة المارشيدير دى أنا متعايش معاها كويس قوى وأكاد أكون مش باحس بيها لأن طريقة سواقتى طبعت على العربية .. بس برضه بأقول يا واد استفيد من الضمان قبل ما يخلص ، وخليهم يركبوا لك مجموعة البريك اللى بيقولوا عليها ..

مش عارف ايه رأيكم
أعملها واللا بلاش
وياريت اللى عملها يقول لى فى أى فرع من فروع التوكيل؟

[AHMEDmostafa79]

السلام عليكم اولا. نصيحة للة بلا ش تخلي حد يفكلك حاجة في فتيس عربيتك عشان حاجة مش فرقة معك و مع الوقت بتروح

[Ahmed A Rahman]

ياااااااااااااه انا عملتها في العبور يا زيزو من اكتر من سنة ونص

ربنا يسهل وتلاقيها لسه موجودة

بعد 5000 لقيت تنقيط بسيط من الفتيس والعربية مرفوعة (هو مكانش تنقيط هو كان لحوسة زيت على الفتيس من بره)

دخلوها ثاني وغيروا جوان الفتيس

بقالها اكتر من 50 الف كيلو بعدها تمام وعادي

ركبها وريح نفسك

[akerima]

يااااااااااااااااااه يا راجل انت لسة معملتهاش - دا التوكيل كان بيتصل بالكل اصحاب العربيات موديل 2010 وبيتحايل عليهم يودولوا عربياتهم عشان يغيرولهم مجموعة البريك دي

اتصلوا بيا وقالولي تعال غيرها عشان القطعة اتبعتلهم منها ياما اخر السنة اللي فاتت من غير حتي ما اشتكي والعربية ماشاء الله بعدها سحبها اتغير (او انا اتهيالي) وعضة المارشدير دي اختفت تماما

يا ريت تقولهم عليها ربنا يسهل والقطعة اللي بتتغير دي تكون لسة موجوده

[korkor]

مش عارف انا حاسس ان موضوع البريك ده اونطه انا غيرته فى صيانه 5000 فى التوكيل فى العبور ومازالت نفس العضه موجوده بس تاقلمت عليها خلاص

[Egyzizo]

أشكركم على تفاعلكم
هاعمل شوية اتصالات وربنا يعمل اللى فيه الصالح.

[omda8185]

يعني ايه عضه المارشدير دي؟
يعني لما ترمي المارشدير يعمل صوت جامد؟؟

[basem47]

انا روحت توكيل الغردقه اسمه (الجميل) اكتر من مرة ومايعرفوش عنها اي حاجه بس اللى انا متاكد منه انهم مابيفهموش اي حاجه وماعندهمش غير صنايعي واحد لاغير وبجد من زهقى منهم طلعت نفسي من الضمان من 30000 كم وغيرت زيت بره لانهم فعلا حراميه اكتشفت اهم بيحاسبوني على فلتر البنزين وهو مش بيتغير عشان جوه التانك واشتكيتهم للشركه اكتر من مرة ومفيش استجابة ولا سحبوا منهم التوكيل

[blackhorse123]

يعني ايه عضه المارشدير دي؟
يعني لما ترمي المارشدير يعمل صوت جامد؟؟

ايوه يعنى ايه عضه المارشدير حد يفيدنا يااخوانا

[mhms2000]

انا كنت فى القطامية وبالصدفة لقيت قدااامى مين معرض محمد زكى ولقيت لوجان اوتو منورة قدام المعرض قمت رااااااااكن وقلت اتفرج واسال سئلت على السخونية وزنة دواسة البنزين وعضة المرشدير (الى برضه معرفشي يعنى ايه ) قالى كل المشااااكل الى ظهرت فى موديلات 2010 2011 اتحلت تماما فى موديلات 2012 مانيوال واوتو

[wassim_nasser]

انا باحسها مش عضة اوى انما المارشدير بيهرب .. العربية مش بتاخد الغيار من اول مرة .. ودلوقتى ابتديت احسها كمان ف الغيار الخامس

[Egyzizo]

عضة المارشيدير تعنى انك لما تيجى تجيب مارشيدير تحس ان فيه فى نص مشوار عصاية الفتيس عائق بيمنع الفتيس من انه يبات فى مكانه النهائى علشان تبدأ تتحرك مارشيدير .. والعائق ده معناه أكتر انك تحس ان فيه حاجة بتعاكس عصاية الفتيس انها تكمل مشوارها.

والنتيجة يا إما العصاية بتكمل مشوارها للمارشيدير مع الاحساس بغلاسة العضة ، أو ان العضة دى بتمنع الحركة كلها والمارشيدير (يهرب) ، فتحاول تانى تجيب مارشيدير من البداية.

وحلها بسيط وهو انك تدوس دبرياش وتبدأ تجيب المارشيدير بعد 3 ثوانى من الضغط على الدبرياش ، بالطريقة دى مش هتحس بعضة نهائى (يعنى ماتخطفش المارشيدير بمجرد الدوس على الدبرياش).

والتوكيل بيحل المشكلة دى للناس اللى بيشتكوا منها بتركيب قطعة معينة فى الفتيس بتخلي العضة تختفى.

مع ملاحظة ان المشكلة دى كانت موجودة فقط فى موديلات 2010 وبعض سيارات 2011 ، ولم نسمع أحد يشتكى منها بعد ذلك التاريخ.

أنا واحد عندى الموضوع ده ، بس مش عامل لى مشكلة لأن سواقتى هادية ومش باحتاج اخطف المارشيدير ـ فمش باحس بيها ، علشان كده لم الجأ إلى التوكيل لتركيب تلك القطعة.

[mhms2000]

عضة المارشيدير تعنى انك لما تيجى تجيب مارشيدير تحس ان فيه فى نص مشوار عصاية الفتيس عائق بيمنع الفتيس من انه يبات فى مكانه النهائى علشان تبدأ تتحرك مارشيدير .. والعائق ده معناه أكتر انك تحس ان فيه حاجة بتعاكس عصاية الفتيس انها تكمل مشوارها.

والنتيجة يا إما العصاية بتكمل مشوارها للمارشيدير مع الاحساس بغلاسة العضة ، أو ان العضة دى بتمنع الحركة كلها والمارشيدير (يهرب) ، فتحاول تانى تجيب مارشيدير من البداية.

وحلها بسيط وهو انك تدوس دبرياش وتبدأ تجيب المارشيدير بعد 3 ثوانى من الضغط على الدبرياش ، بالطريقة دى مش هتحس بعضة نهائى (يعنى ماتخطفش المارشيدير بمجرد الدوس على الدبرياش).

والتوكيل بيحل المشكلة دى للناس اللى بيشتكوا منها بتركيب قطعة معينة فى الفتيس بتخلي العضة تختفى.

مع ملاحظة ان المشكلة دى كانت موجودة فقط فى موديلات 2010 وبعض سيارات 2011 ، ولم نسمع أحد يشتكى منها بعد ذلك التاريخ.

أنا واحد عندى الموضوع ده ، بس مش عامل لى مشكلة لأن سواقتى هادية ومش باحتاج اخطف المارشيدير ـ فمش باحس بيها ، علشان كده لم الجأ إلى التوكيل لتركيب تلك القطعة.

هيا ديه العضة بقا هههههه دنا كده عندى فى 132 مش عضة انا عندى كلب سعران فى قلب العربية دنا عندى لو الفتيس معضش اقول لا فى حاجه فى الفتيس معضش ليه المراادى

[Egyzizo]

ههههههههههههههه
طب الحمد لله انك غيرت قبل ما الكلب يعضك :)

[mhms2000]

ههههههههههههههه
طب الحمد لله انك غيرت قبل ما الكلب يعضك :)

لا ياعم انا الكلب واخد عليا مش بيعضنى انا وهسيب 132 مع اللوجان عشان بحبها انا اقدر استغنى عناها