خبر حلو وخبر وحش واستفسار

[ragy]

السلام عليكم

ازيكم يا رجاله

اولا عايزكو تبركولي لاني استلمت اللوجان يوم الاثنين الماضي
استلمتها من السبع مصر الجديده
وسافرت بيها اسكندريه وعامل لحد دلوقتي حوالي 920 كيلو

تقييمي المبدئي .. العربيه تمام جداااا
والمفاجأه بقى وانا راجع من اسكندريه الجو كان حر جداااا والشمس قويه
قلت اجرب التكييف (مع اني عارف انو هيعمل رجرجه في العربيه وادائه هيبقى ضعيف وال rpm هيفضل يطلع وينزل )

لكن بسم الله ما شاء الله التكييف كان ممتاز جداا شغلته على 4 لمده 5 دقائق فالدنيا تلجت جبته على3 مستحملتش البرد نزلته على 2 اللي جمبي مستحملش وراح منزله على 1 شويه وشغلناه مروحه مستحملناش الحر شغلناه تاني



نيجي بقى للخبر الوحش

اول ما وصلت من الاسكندريه جيت ادخل العربيه الجراج راحت مخبوطه مني
دي فوق العجله الخلفيه يمين سن بسيطه







طبعا العربيه معداش عليها اسبوع

فمش عارف بقى الخبطه دي تتعمل ازاي وتتكلف كام تقريبا

الاستفسار الاخير

التأميييييييييييين

عايز أأمن على العربيه ايه افضل شركه تأمين وتكون نسبتها معقوله ؟

ويا ريت يكون عندها ورش تصليح

وهل فيه شركات بتأمن بدون نسبه ال 10% في حاله الاصلاح في التوكيل ؟

[ahmedeg1]

يا باشا ما تشغلش بالك خليها تاخد العين و ممكن بشوية كومبوند و سمكرى شاطر يردهالك على البارد و ماترشش حاجه

[DR/WAFEK]

الف مبروك اولا ربنا يديك خيرها ويكفيك شرها ثانيا كبر دماغك وخليها تاخد العين وهى بسيطه ومش مستاهله ردها على البارد وسيبها

[amriar]

اهلا بيك في عالم السيارات في مصر.. كل السيارات علي الحال دا وفعلا بتأخد العين .. خلهيا كدا ماتشغلش بالك بيها و ربنا فداك من حاجه علي الطريق

[profrivo]

مبروك العربية ... و ربنا يكرمنا و اياك ويستر طريقنا كلنا.

موضوع السمكرة الاخوه وفوا و قالوا كل الصح.

التأمين.... بحر طويل و يجب البحث بشدة قبل الاختيار وخليك فى التكافلى.

وكل الشركات لازم بند ال 10% على حد علمى

[blackhorse123]

انا كان عندى خبطه اشد من دى والسمكرى عاملها وردها على البارد واخد 50 جنيها

بس الكلام ده قبل ما العربيه تتعجن فى الحادثه عفا الله الناس جميعا

[Gelgel2004]

الف مبروك يا باشا على العربيه..
خدت الشر و راحت
الف مبروك

[drosamaragab]

الخبر الوحش ده عادي كلنا هذا الرجل

طيب ده انا اشتريت العربيه وقبل ما ترخص ومكنتش جابت 100 كيلو عملت حادثه وهي باللزق الابيض بتاعها

فانوس ورفرف والاكصدام

الحمد لله انك سليم اهم حاجه الصحه طيب ده انا النهارده سواق حمار بيعدي توك توك ومصمم يعديه وانا في وشه وعمال اديله نور وهو شايفني ولا هو هنا وزنق عليه كنت هقع في ترعه الحمد لله الفرامل نجدتني

الف حمدالله على سلامتك

[ragy]

يا باشا ما تشغلش بالك خليها تاخد العين و ممكن بشوية كومبوند و سمكرى شاطر يردهالك على البارد و ماترشش حاجه

يعني اخلي السمكري يردها بس

واجيب الكومبوند ده واعمله بيها .. بس ايه هو الكومبوند ده ؟

[ragy]

الف مبروك اولا ربنا يديك خيرها ويكفيك شرها ثانيا كبر دماغك وخليها تاخد العين وهى بسيطه ومش مستاهله ردها على البارد وسيبها

الله يبارك فيك يا باشا :)

بس انت تقصد اردها واسيبها متجرحه كده ؟

[ragy]

اهلا بيك في عالم السيارات في مصر.. كل السيارات علي الحال دا وفعلا بتأخد العين .. خلهيا كدا ماتشغلش بالك بيها و ربنا فداك من حاجه علي الطريق

سبحان الله فعلا عندك حق
كان فيه عربيه ترله هتخدنا تحتها بس ربنا ستر الحمد

بس انا كنت شفتلك موضوع عن التامين التكافلي
يا ريت تقولي وصلت لايه وتنصحني باي شركه تأميين ؟

[ragy]

مبروك العربية ... و ربنا يكرمنا و اياك ويستر طريقنا كلنا.

موضوع السمكرة الاخوه وفوا و قالوا كل الصح.

التأمين.... بحر طويل و يجب البحث بشدة قبل الاختيار وخليك فى التكافلى.

وكل الشركات لازم بند ال 10% على حد علمى

الله يبارك فيك يا رب
طيب تنصحني باي شركه في التامين التكافلي

[ragy]

انا كان عندى خبطه اشد من دى والسمكرى عاملها وردها على البارد واخد 50 جنيها

بس الكلام ده قبل ما العربيه تتعجن فى الحادثه عفا الله الناس جميعا

اولا الحمد لله اني ربنا نجاك من الحادث

بس السمكري ردهالك ودهنها يعني ولا ايه مش فاهم

[ragy]

gelgel2004

الله يبارك فيك يا باشا :)

drosamaragab

الله يسلمك يا رب وربنا يسترها علينا كلنا

[Android]

الف مبرك على العربية اولا

ثانيا الخبطه بسيطه الحمد لله
ممكن تسيبها لو مش مضايقاك هي مش شكلها وحش اوي وكمان اهو عشان الناس تبطل حسد هههههههههههه

ولو مخنوق منها ممكن سمكري شاطر يردها على البارد ويحط المادة دي مش فاكر اسمها ولا ترش ولا حاجه
بس اهم حاجه سمكري شاطر عشان ميردهاش اي كلام وتلاقي فيها موجه عشان لو اتردت اول مرة وحش هيبقي شكلها زباله وصعب تتعدل بعد كده صح
أهم حاجه خد وقتك انك تدور على سمكري شاطر واكيد الاعضاء هنا هيدلوك على سمكري كويس

وربنا يباركلك فيها ويكفيك شرها ويحميهالك