تنفع اللوجان

[sunsonson]

مساء الفل علي الرجاله كلهم :
انا راكب اوبل فكترا وما ادراك ما الفكترا ينفع اركب رينو لوجان علي اساس انها اوربي بردو ولا هلاقي فرق كبير
علي كلامكو ومواضيعكوا انها رائعه بس حاسس ان مشا كلها كتير سخونيه وشكمان وفتيس واصوات غريبه بتسمعوها ياريت نصيحه لوجه الله عشان انا ناوي اعمل كده بس ياريت عدم الانحياز للسياره الي انتو ركبنها ...انا قولت اخد رئيكم عشان واضح انكم ابتديتو تفهمو العربيه ماشاء الله يعني
وبالنسبه لقطع الغيار الفرانساوي سمعتو مسبقاه انتو عارفين ؟؟؟
ومتشكر جدا لكا واحد هايتشرف وينصحني

[Egyzizo]

حضرتك محتاج حد يكون ركب العربيتين علشان يقدر يفيدك .. أرجو انه يكون موجود

[sunsonson]

حضرتك محتاج حد يكون ركب العربيتين علشان يقدر يفيدك .. أرجو انه يكون موجود

الله ينور عليك بالظبط كده اعمل اه بقي
بصراحه انا بفكر جديا في الموضوع ده بس متردد وخايف اندم

[ahmed_m_ashraf]

شوف ياأستاذي العزيز

كنت قريت موضوع في منتدى آخر عن واحد ساق عربيات كتير وكلها زيرو بتاعت والده وأيام مكان فى الجامعة منها إبيزا ولانسر بومه وأفيو ,لانوس وحتى جرب سواقة بعض عربيات كوري من الموجوده حديثا, وكان بيحكي إنه مكنش بيتمزج من سواقة الكوري وإن أكتر حاجات عجبتو كانت الإبيزا ثم اللانسر, بس خد بالك هو بيتكلم عن متعة القيادة مش الكماليات والرفاهية. ولما قرر إنه يشتري عربيتو الخاصة إختار الوجان بعد مفاضلة طويلة بين عربيات كتير مها الريو والأكسنت أر بي ولانوس وصني, هو إختار اللوجان على أساس إنه حس في سواقتها بنفس الإحساس إللى كان بيلاقيه فى الإبيزا, يعني الطابع الأوروبي.

لاكن بأكد تاني هو بيتكلم عن متعة القيادة مش رفاهية وكماليات.

حضرتك بتدور على إيه؟ متعة قيادة ولا رفاهية وكماليات؟ لو متعه قيادة يبقى ممكن تلاقي طلبك فى اللوجان, بس عشان أنا مجربتش الفيكترا مقدرش أفتيلك فى الموضوع ده, يبقى مفيش غير إن حضرتك تحاول تلاقى حد معرفة أو صديق تجرب منه العربية وتحكم بنفسك.

لو الفاهية والكماليت, اللوجان فيها كل الكماليات الأساسية فى الفئه دي وزياده حته كمان (وساده هوائية للسائق, مالتي فانكشن, كمبيوتر رحلات, فتيس ستبترونيك لو أوتوماتيك, إتساع داخلى مع إن العربية مش كبيرة, إرتفاع ممتاز عن الأرض, وسع ممتاز للشنطة) لاكن أكيد مفيش مقارنة بينها وبين الفيكترا من ناحية الرفاهية وأكيد الفيكترا حتى لو موديل قديم فيها شوية أوبشنز مش موجوده فى اللوجان, فى النهاية إنت بتحكم بين فئه وفئه ثانية.

وفي النهاية الحكم لحضرتك حسب إحتياجاتك من العربية, حضرتك كمان بتقارن بين زيرو ومستعمل ودي ليها حسبة تانية خالص, مثلا أنا بالنسبالي اللوجان الزيرو كسبت في المقارنة بينها وبين اللانسر البومة المستعملة لما كنت بشتري. صحيح لسه نفسي بتهفني على اللانسر وأقول ياريتني جيبتها, لاكن أرجع وأقول لنفسي ياعم إنت راكب زيرو.

[amriar]

هى المقارنه بعيده شويه .. انت ها تجيب اللوجان كاش يعني راكب اوبل قديمه فالقيمه السعريه واحده ولا انت راكب اوبل جديده موديل حديث يعني ؟؟

من ناحيه القياده العربيه متزنه بطيئه في الطلعه والاول والتانى وزنها خفيف بس مش بتعوم الفتيس تقيل بس زيه زي عربيات تانيه و الامكانيات بالنسبه للسعر هايل

[dr_mohamed16]

انا مركبتش فيكتر قبل كده
بس اكيد فيه فرق طبعا ..... كده المقارنة مش عادلة
انا شايف ان حضرتك تشوف حد من صحابك يكون معاه لوجان و جربها بنفسك
ده هيكون احسن حل و بعدها تقدر تحكم

[Johnny82]

انا مركبتش فيكتر قبل كده
بس اكيد فيه فرق طبعا ..... كده المقارنة مش عادلة
انا شايف ان حضرتك تشوف حد من صحابك يكون معاه لوجان و جربها بنفسك
ده هيكون احسن حل و بعدها تقدر تحكم

فعلا مقارنة غير عادلة.
لكن اللوجان لما تتعود عليها هتحبها :)

[sunsonson]

الف شكر علي الردود المفيده
اتكلمتو في نقط مكانتش في بالي اصلا زي الفرق بين الزيرو والجديد وكمان الكماليات كلامكو كلوا جميل
طيب انا مفيش من اصدقائي راكبها مش عارف ليه ممكن يكونو خايفين منها ...........واحد منهم فضل الابترا علي اللوجان بس بصراحه انا بقدر الاوربي جدا بالذات بعد مركبت الفكترا 2000 سي سي مش عايز اقولكم بصراحه حاجه تانيه ثبات اكتر من ابي ام
بس خايف ان اللوجان تكون فئه تانيه علي السعر والامكانيات كمان فا ابقي مخنوق منها طيب هو ممكن اني اروح لمعرض واجربها ولا الموضوع صعب؟؟؟؟؟؟؟؟
شرف انكم رديتو عليا

[amr.elsayed]

فى فرق شاسع
لو حتجيب اللوجان وتقارنها بفيكترا يبقى حتندم جدا بالذات بعد ما قولت 2000 سى سى
الميزة الوحيدة فى اللوجان انك بتعمل صيانات عادية + مافيش تعامل لفترة كبيرة مع ميكانيكية يعنى الميزة الوحيدة بالنسبة لفيكترا انها زيرو
غير كدة مافيش وجه مقارنة ابدا