ستيب واي ولا لوجان؟؟

[becatcho]

ايه رايكوا ستيب واي ولا لوجان انا عاجبني اوي شكل الستيب واي وكمان في abs وده مش موجود في اللوجان بس الي مضايقني فيها حاجتين اولا انها هاف اوبشن كمان انها غليت اوي انا شايفها في كونتاكت كارز ب 81000 ولا اجيب لوجان عشان فول اوبشن ايه رايكوا ياريت الرد؟

[amr.elsayed]

بامانة العربيتين دول المفروض يضربوا فى الخلاط حتطلعلنا عربية فاجرة
بس حضرتك اللى لازم تقرر على حسب متطلباتك من العربية لو الاوبشن الزيادة فى اللوجان غير مهم
فتوكل على الله واشترى الستب واى ... بامانة العربية دى من العربيات اللى بحب شكلها فعلا من العربيات اللى شكلها حلو

[becatcho]

هو افتكر كل الاوبشن الزياده في اللوجان هو بس ان الازاز الي ورا كهرباء غير كدا مفيش اي حاجه صح ولا انا كلامي غلط؟

[Egyzizo]

وكمبيوتر الرحلات.

[becatcho]

هو كمبيوتر الرحلات مش موجود في الستيب واي؟

[amr.elsayed]

دى مواصفات السانديرو ستيب واى وطبعا اهم حاجة فيها ال abs والجنوط الاسبور 15 وطبعا دة غير شكلها التحفة
اغلس حاجة انها زجاج خلفى يدوى والكهربا امامى فقط
ودى المواصفات

[becatcho]

مش مكتوب فيها كمبيوتر رحلات؟

[amr.elsayed]

نيجى للوجان وطبعا بسعر الستيب واى تجيب لوجان اوتوماتيك
الزيادة فى اللوجان زجاج كهربا خلفى .. والمالتى فانكشن وكمبيوتر الرحلات وعلى ما اتذكر بيان فتح الابواب مش موجود فى الستيب واى
دة غير طبعا الفتيس الاوتوماتيك .. العربيتين الحقيقة كل واحدة فيها ميزة مش موجودة فى التانية ويتبقى حضرتك تقارن وتحدد حسب متطلباتك من السيارة

[becatcho]

بس انا اصلا مش حابب اجيب اوتوماتيك انا دي اول عربيه ليا وبفضل الموانويال كمان يعني بيقولوا الاوتوماتيك مش اد كدا في العربيات الي تحت ال 100 الف يعني لو حصله حاجه مصيبه غير ان العربيه لو وقفت خلاص مش بتتزق ولا ليها حل ولا ايه رايك انتا حضرتك معاك لوجان مش كدا عامله ايه معاك؟

[amr.elsayed]

بس انا اصلا مش حابب اجيب اوتوماتيك انا دي اول عربيه ليا وبفضل الموانويال كمان يعني بيقولوا الاوتوماتيك مش اد كدا في العربيات الي تحت ال 100 الف يعني لو حصله حاجه مصيبه غير ان العربيه لو وقفت خلاص مش بتتزق ولا ليها حل ولا ايه رايك انتا حضرتك معاك لوجان مش كدا عامله ايه معاك؟

انا معايا لوجان مانيول 2010 والحمد لله عربية بنت حلال وماعنديش شكوى مؤثرة منها
كلها الملاحظات العادية بتاعت العربية المعروفة للجميع و
..............
انت طالما حابب المانيول فتوكل على الله فى الستب واى واستمتع بالجنوط وال abs وشكل العربية الجميل جدا
لازم انت تحدد اولوياتك الاول علشان دى سياسة تسويقية .. هم فى رينو استحالة يعملوا عربية فيها كل حاجة زى موديل اخر
علشان مافيش عربية توقف حال التانية .. و انا مقدر حيرتك بجد والله
بس اوعى تختار عربية الا وانت مقتنع بيها 100 × 100 بسلبيتها وايجابيتها علشان تقدر تستمتع بيها
وربنا يرشدك للاختيار الافضل

[becatcho]

انتا عارف ان ايه الي مضايقني كان نفسي اجيب جين 2 عربيه فيها كل حاجه بس ناس كتير جدا بتشتكي من التوكيل وقطاع الغيار بتاعها لكن عربيه شكلها احلى وفيها كمان كل الاوبشن

[amr.elsayed]

انتا عارف ان ايه الي مضايقني كان نفسي اجيب جين 2 عربيه فيها كل حاجه بس ناس كتير جدا بتشتكي من التوكيل وقطاع الغيار بتاعها لكن عربيه شكلها احلى وفيها كمان كل الاوبشن

حبيب قلبى ههه علشان كدة محتار وعايز عربية تكون جميلة زى الجين 2 وفى نفس الوقت يكون توكيلها كويس زى رينو
حنعمل ايه بس احنا فى مصر توكيلات العربيات متعبين جدا علشان يعطيك خدمة كويسة شوية لازم يشفط من العربية شوية حجات
حيعطيك عربية من بابها انسى تيجى تقوله خدمة ما بعد البيع ما هو لازم ياخد فلوس قصاد الحاجة اللى حتتعمل
..................
ونصيحتى ليك بوص بصة على قسم بروتون وحاول تعرف اماكن قطع الغيار الاعضاء بيجبوها منين
وحاول تجمع عنها معلومات والجين 2 من العربيات الجميلة جدا شكلا وموضوعا ولكن محتاجة تعرف عنها كل حاجة
واخيرا استخير وتوكل وربنا يرشدك للاختيار الافضل

[becatcho]

بصيت والله واحترت اكتر تلاقي ناس بتشكر جدا في العربيه وناس بتسب وتلعن

[amr.elsayed]

بصيت والله واحترت اكتر تلاقي ناس بتشكر جدا في العربيه وناس بتسب وتلعن

لا دة انت لسة فى اول مرحلة .. دة لسة لما تحجز وتلاقى واحد يقولالعربية فيها كذا والتانى يقول العربية فيها كذا
وتفضل بقى انت فى حيرة تانية تروح تلغى الحجز ولا لا ؟؟؟؟ هههههه
تشترى بقى العربية وتبقى راجع البيت وراضى عن العربية
وتلاقى واحد كاتب ان فى عيب خطير فى العربية اللى انت اشترتها بدم قلبك
تطلع تجرى على العربية علشان تشوف العيب دة موجود ولا لا
واخر مرحلة بقى بتبقى اسمها الهوس هوس تبدأ تدور على اى عيب للعربية او صوت او غلطة صغيرة فى التقفيل مثلا
وتبدأ تفقد استمتاعك بيها .. ونصيحة منى لو اشتريت اى عربية مش اى كلام بيتقال يبقى اساسى حيكون موجود عندك
غير الملاحظات اللى بيجمع عليها كل الناس و بتختلف اهمية وجود الملحوظة من واحد للتانى