أحتاج مشورتكم الكريمة

[Eng. Nagui]

السلام عليكم

أنا كان عندي تساؤل لأني كنت بفكر اشتري لوجان أتوماتيك بس محتار بين ال لوجان و السانديرو الأوتوماتيك لأن شكلها الخارجي مميز أكثر من اللوجان ... و بقارنهم بالشيفروليه أفيو الأوتوماتيك فأرجو منكم المساعدة لأخذ القرار السليم لأني متردد بين الرينو و الشيفروليه ....

و كنت عاوز برده أعرف الفرق بين ال لوجان و السانديرو و أيهما أحسن .... و شكراً

[TheGhostFish]

الأفيو ناس كتير اشتكت منها وسحبها أضعف من اللوجان وأضيق منها في الصالون.
أما اللوجان والسانديرو هما نفس الموتور ونفس كل حاجة باختلاف الشكل الخارجي، والسانديرو شكلها أحسن لكن الشنطة أضيق من اللوجان والكنبة المساحة قدامها أقل بسنتيمترات قليلة من اللوجان.
لو عايز شكل يبقى سانديرو .. لو عايز ناحية عملية يبقى لوجان ومن رأيي الشخصي لوجان.

[dr_mustafa_ali]

الافيو طلعها من حساباتك ... اللوجان والسانديرو فرق شكل وفرق 5000 تقريبا في السعر .. لو هيفرق معاك الشكل هاتها

[yasser3da]

بص يا باشا انا برضه كنت في الحيره دي بين اللوجان والسانديرو ولله الحمد كنت مستبعد اي سياره تانيه بس اخترت اللوجان لانها اوسع في الشنطه والصالون كمان في حاجه مهمه جدا وهي منتشره اكتر في الشارع عن السانديرو ودي ميزه لقطع الغيار ,, واولا وأخيرا شوف اللي يناسبك.

[Eng. Nagui]

أنا ملاحظ في الأونة الأخيرة أنتشار لل سانديرو Step Way و ده معناه أن العربية كويسة على الرغم من عدم وجود بعض الكماليات منها في السانديرو الأوتوماتيك مثل الفرامل ABS+ABD و خاصية فتح الشنطة و التنك من الداخل و الجنوط عادي مش اسبور و على حسب معلوماتي البسيطة أن اللوجان و السانديرو نفس الشاسيه و العفشة و الموتور و فقط الأختلاف في الشكل الخارجي فقط ... فهل هذا صحيح أم لا ؟؟؟ علشان كل ده حيفرق معايا و كمان في أمكانية تواجد قطع الغيار بالأسواق مثلما قال الأستاذ ياسر

و لذلك أرجو التوضيح لأن خبرتي في السيارات ضعيفة شوية

و أرجو التوضيح لماذا رينو أفضل من شيفروليه ؟؟؟؟

و شكراً

أسف طولت عليكم