صوت عالي مع الفرمله البطيئة

[amriar]

السلام عليكم يا احلى شباب..

انا بسمع صوت من العجل بيصرخ علي اخره في الفرمله علي سرعات بطئية يعني ما بين 40 و 20 كيلو متر في الساعه مش اكتر من كدا يعني لو اعلي او اقل مش بسمع دا حتى لو ضربت فرمله جامد .. الصوت مش طول الوقت و مش عارف ايه مصدره

هل هو الكاوتش ولا ضبط زوايا ولا تيل ولا ايه بالضبط..

العربيه موديل 2012 .. عامل 11200 كيلو

شكرا مقدما

[gebreel]

اعمل روتيشن للعجل كل 10000 كيلو

كان عندي زيك كدة و بعد الروتيشن الدنيا ظبطت + الكاوتش سئ

[dr_mustafa_ali]

the same here :S

[ahmedeg1]

متهيألى ان التيل بتاع الفرامل عاوز يتنضف بس ما فيش مانع من الروتيشن بقولك يا جبريل انتا بتعمل الروتيشن و الترصيص فى بريدجستون صح ؟

[gebreel]

متهيألى ان التيل بتاع الفرامل عاوز يتنضف بس ما فيش مانع من الروتيشن بقولك يا جبريل انتا بتعمل الروتيشن و الترصيص فى بريدجستون صح ؟

لو انا فاهم صح اللي الوحوش بيتكلموا عليه هنا هو صوت صريخ الكاوتش اما تيل الفرامل يعمل صوت صفارة مع الفرملة

الروتيشن بعملو في بريدجستون بس الترصيص مجربتهمش فيه بصراحة و مرصصتش في عربيتي لا ال2010 ولا ال2012 لحد دلوقتي ولا مرة الحمد لله بس في عربية والدي رصصت عند اشرفكو اللي في الحي السادس كويس و عند عمرو بدوي اللي في السابع بردو كويس.

[amriar]

انا كنت قريت في المنتدى هنا ان الروتيشن لا يوصى بيه المصتع .. يعني رينو مش بتشجعه .. حد يعرف ليه ؟

[mazenzyad]

انا كنت قريت في المنتدى هنا ان الروتيشن لا يوصى بيه المصتع .. يعني رينو مش بتشجعه .. حد يعرف ليه ؟

ناس نصحونى برضو بان الروتيشن لاطالة عمر الكاوتش فقط و ملوش فايدة تانى. ارجو تأكيد المعلومة دى

[gebreel]

الروتيشن مهم علشان تاكل الكاوتش يبقى واحد في ال4 عجلات ميجيش عليك وقت تلاقي الفردتين اللي قدام تعبانين و اللي ورا كويسين زي ما حصل في ال2010 اللي عندي

الفردتين اللي قدام حالتهم مبقتش قد كدة و اللي ورا حالتهم كويسة

دي تأثر معاك في الفرامل كمان بعد كدة

[buddha]

ظبط زوايا

[dr.hazem]

الروتيشن لاطالة عمر الكاوتش والمحافظه عليه متآكل بشكل متساوي
لانه لما النقشه تبقى6 متاكله مثلا قدام اكتر من ورا بتبقى العربية من ورا اعلى6 ومتزنه وثابته اكتر من قدام وبالبتالي الثبات هيختل والعربية ممكن تعوم

كمان يفضل تدوير الاستبن مع العجلات الباقيه اول باول عشان برضو متبقاش نقشته اعلى من الباقيين وانا مكنتش اعرف الكلام ده ونزلته على25 الف ولقيت الطاره بتترعش على 80 قلت ترصيص وطبعا مطلعش ترصيص انما بسبب النقشه الاعلى

بالنسبة لصريخ الكاوتش اعتقد ان لازم تشيك على ضغط العجل بالاضافه للي الشباب قالوه

تحياتي

[amr.elsayed]

انا كنت بعمل الروتيشن كل 10 بس كنت بجيب العجلة اليمن خلفى فى اليمين امامى ونفس النظام فى الشمال
والكاوتش غيرتو على 40 الف كيلو وواحد بتاع كاوتش اشتراه يعنى لسة حيركب على عربية تانية ويشتغل
دى تجربتى فى الروتيشن

[McLaren2012]

انا كنت بعمل الروتيشن كل 10 بس كنت بجيب العجلة اليمن خلفى فى اليمين امامى ونفس النظام فى الشمال
والكاوتش غيرتو على 40 الف كيلو وواحد بتاع كاوتش اشتراه يعنى لسة حيركب على عربية تانية ويشتغل
دى تجربتى فى الروتيشن

و إشترى الفردة على كام من حضرتك؟

[mido7337]

انا حاسس ان موضوع زحف الكاوتش ده ظهر عندى من بعد ما حطيت النيتروجين والله اعلم

[amriar]

شكرا ليكم يا شباب .. انا روحت ضبطت ضغط الهوا .. كنت بعمل كله علي 30 .. بس لما ضبطها علي 29 قدام و 32 ورا .. فرقت كتير جدا جدا جدا .. في التماسك والاحساس بالمطبات و غيره .. بس الصوت لسه موجود بس مش باستمرار .. ان شاء الله رايح بكره اعمل روتيشن و نتروجين وها اقولكم النتيجه ..

شكرا يا شباب

[amriar]

أزيكم يا أحلى شباب
انا روحت بريدجستون عملت روتيشن و نيتروجين و قولت اتاكد من الزوايا الحمد لله كله تمام والصوت اختفى تماما بس حاسس ان المطبات بقت عنيفه وبتهبد هل دا ليه علاقه بالنتروجين او الروتيشن واتاكد من ايه لان المطبات بقت صعبه جدا