فتيس لوجان اتوماتيك

[علاء سليمان]

السادة الكرام مالكي رينو لوجان اتوماتيك ان شاء الله استلم رينو 2013 اتوماتيك اول ديسمبر وهذة اول سيارة لي فبرجاء شرح التعامل مع الاستيبترونيك هل امشي على d و بس عادي و لا اتعامل ازاي مع الفتيس و اسف للإطالة وشاكر لكم حسن التعاون و جزاكم الله عنى خيراااااا .

[gebreel]

عاوز تطلع قدام تجيب d
عاوز ترجع ورا تجيب r
عاوز تمور العربية تجيب n
عاوز تعشق العربية تجيب p

لازم تدوس فرامل قبل ما تغير

متجيبش r او d الا و العربية واقفة تماما

[علاء سليمان]

يعني ما اشغلش المانيوال خالص ولا اية و اية الاسباب اللي تخليني اشغل المنوال و ازاي طريقة تشغيلة ؟

[avalanshoon]

يعني ما اشغلش المانيوال خالص ولا اية و اية الاسباب اللي تخليني اشغل المنوال و ازاي طريقة تشغيلة ؟

عن تجربة محدودة لي الموضوع مش حكاية انك تمشي على المانيوال القصة في الاستبترونك انك مابتخليش الغيارات تزيد عن الرقم المكتوب قدامك في التابلوة
بمعنى انك لو على رقم 1 العربية مش هتنقل على الغيار الثاني
ولو انك على 2 العربية مش هتنقل على الثالث وهتفضل تبدل بين الاول والثاني
وحتى الان بالنسبة لي لم استعمل الاستبترونك الاوانا طالع من الجراج علشان انحدارة شديد ومحتاج عزم كبير
وبالنسبة لطريقة تشغييلة هي انك بتقف على الـ d وبتجيب الفتيس على الشمال وبعد كده للامام او الخلف علشان تزود او تنقص الرقم

[m_medo]

المانيوال هتستعمله لو انت محتاج العربية تسحب معاك من غير ما تنقل (تدوس على الغيار يعنى) وده انت بتحتاجله فى المطالع الجامدة بالذات وانت محمل العربية.... وكمان لو بتشد مع حد او لو عايز تاخد غرزة جامدة....
اهم حاجة عشان تحافظ على الفتيس لازم تجيب العربية على n قبل اى غيار... لازم دى عشان ماتحملش على الفتيس

[علاء سليمان]

يا رب يجازيكم خير و يبارك لكم عن المعلومات دي و اتمنى لو في اي نصائح كمستخدم جديد لللوجان يبقى كتر خيركم

[nouranwar]

مبروك علي العربية و تستلم علي خير ان شاء الله
بالنسبةانك اول مرة تستخدم الاوتوماتيك امشي في الاول علي ال d لغاية التليين 1000 كم علشان الموتور يبقي مستريح (بينقل في الوقت المناسب) و بعد كده عيش انت بقي :)

[yasser3da]

ألف مبروك وربنا يباركلك فيها ويكفيك شرها... الستبترونيك مش فارق أوي عن تجربة في ملفات السخنه وانا بعدي العربيات ,,العربيه ما شاء الله سحبها قوي بمجرد انك تدوس شويه هتلاقيها فتحت وبدون تأخير.

[علاء سليمان]

أسأل الله لكم الخير كل الخير و بارك الله لكم فيما رزقكم و أسأل الله ان يبسط رزقكم .

[magdyazab]

يا جماعة أنا عايز أسأل يعني لو أنا ماشي عادي على d وعايز أخد غرزة جامدة أجيب الفتيس على استبترونيك على طول؟ وهل أجيبه على 1 ولا 2 ؟!! وهل لازم أكون دايس فرامل و أشيل رجلي من على البنزين الأول أثناء النقل؟؟

[DOCTOReng]

يا جماعة أنا عايز أسأل يعني لو أنا ماشي عادي على d وعايز أخد غرزة جامدة أجيب الفتيس على استبترونيك على طول؟ وهل أجيبه على 1 ولا 2 ؟!! وهل لازم أكون دايس فرامل و أشيل رجلي من على البنزين الأول أثناء النقل؟؟

لو ماشى على d كل ما ستفعله ان تحرك الفتيس للشمال وانت دايس بنزين عادى . فى هذه الحالة النقلة ها تتحدد تلقائى حسب سرعتك قبل تحريك الفتيس وقد تكون 3 أو 4 وليس شرطا أن تكون 1 أو 2 لكن النقلة لن تتغير بعد ذلك الا اذا غيرتها بنفسك أو رجعت الفتيس لليمين أى وضع d.

[gebreel]

يا جماعة أنا عايز أسأل يعني لو أنا ماشي عادي على d وعايز أخد غرزة جامدة أجيب الفتيس على استبترونيك على طول؟ وهل أجيبه على 1 ولا 2 ؟!! وهل لازم أكون دايس فرامل و أشيل رجلي من على البنزين الأول أثناء النقل؟؟

بص يا باشا انت ممكن تنقل من الd للستيبترونيك عادي في اي وقت وانت ماشي بدون فرامل او اي حاجة ثانية

بمجرد ما هتنقل للd هتلاقي الشاشة اتكتب فيها رقم النقلة اللي انت عليها دلوقتي و تقدر تسقط نقلة عادي او تزود في حدود المسموح بيه من الكومبيوتر بمعني انك مينفعش تبقى على 100 مثلا و تطلب تنزل للاول هتلاقي الكومبيوتر رفض الامر بتاعك و مينفعش بردو تبقى لسة طالع و عاوز تنقل رابع و انت على 30 مثلا بردو هيرفض الامر ده

[magdyazab]

شكرا يا جماعة على الردود دي بجد أنا أخيرا فهمت الاستبترونيك وهحاول أجربه في أول فرصة