رجة فى الدريكسيون

[mmh666]

السلام

عندى رجة فى الدريكسيون على سرعات قليلة لانى حاليا مش بعدى الـ 80 عشان الزحمة بس انا مسافر بكره و عاوز احل المشكلة دى النهاردة عشان الموضوع بالنسبالى مخيف لان الدريكسيون بيترج يمين و شمال بشكل غريب و دى اول مرة تحصل

الرجة موجودة و كمان لوسبت الدريكسيون و انا ماشى المفروض ان هوا يبقى ثابت بلاقيه يتهز و يترج يمين و شمال فلازم امسكه عشان يثبت

دا ايه زوايا و ترصيص و لا حاجة تانية؟

جزاكم الله خيرا

[khaledmoniemal]

غالبا ترصييص وغالبا كمان العجل الخلفي خاصة لو اخدت مطب او بدلت عجل

[m_medo]

ترصيص بنسبة كبيرة

[tamer61]

ترصيص علي طول

[dr_mustafa_ali]

ترصيص

[szain]

غالبا محتاج تعمل ترصيص ومفيش مانع برده تشيك على الزوايا..والله أعلم

[mmh666]

حد حصل له الموضوع ده قبل كده الرجة على سرعات قليلة مش العادية اللى بتبقى بعد 110
عامة انا رايح بريدجستون النهاردة ارصص و اربط عفشة و اظبط زوايا يارب المشكلة تتحل بالاجراءات دى

[svneleven]

ترصيص ان شاء الله مش أكتر من كده.

[Ahmed A Rahman]

كل 10 الاف روح بريدجستون
زوايا وترصيص
وحتاخد خصم 50% لو معاك استيكر نايل موتورز

العربية حتفضل معاك مسطرة
انا عامل بالعربية 90000 وكل 10 كنت بعمل كده

[gebreel]

رصص و اظبط زوايا و اتأكد من ان مفيش جنط معووج

[frhateg]

التوكيل في الصيانات الدوريه مش المفروض يرصصوا و يضبطوا الزوايا . و الا لأ

[gebreel]

التوكيل في الصيانات الدوريه مش المفروض يرصصوا و يضبطوا الزوايا . و الا لأ

لا يا باشا الترصيص و الزوايا مش حاجة دورية يعني انا العربية ال2010 و لله الحمد مش محتاج ارصصها و زواياها مظبوطة من يوم ما جبناها + متحاولش تظبط زوايا في التوكيل لأنو غالي السنين و ممكن ميبقاش الفني فاهم قوي في الموضوع زي برة

[mmh666]

أنا روحت بريدجستون امبارح رصصت و ظبطت زوابا و ربطت عفشة و تقريبا المشكلة اتحلت ...هيبان اكتر النهاردة انشاء الله على طريق السفر
شكرا جزيلا يا جماعة على الردود

[svneleven]

أنا روحت بريدجستون امبارح رصصت و ظبطت زوابا و ربطت عفشة و تقريبا المشكلة اتحلت ...هيبان اكتر النهاردة إن شاء الله على طريق السفر
شكرا جزيلا يا جماعة على الردود

طب فين فروع بريدجستون بالظبط؟ أظن شفت واحد علي الصحراوي.

[mmh666]

للأسف المشكلة رجعت تانى ... الغريب ان المشكلة بتبان اوى لحد قبل الـ80 لكن لو اديت الخامس و عديت الـ 80 المشكلة تقريبا بتختفى و مش بحس بحاجة
تفتكروا دا ايه جنط فيه رفة ؟؟ و انا كنت برصص كان فيه فردة من اللى ورا طلعوا 45 على الجهاز و الراجل رصصه هل ده يعتبر فيه رفة و عايز يتظيط؟
و لا ممكن تكون المشكلة فين بالضبط؟ انا خايف لتكون علبة دريكسيون
مستنى ردودكم