حزن الحزن

[abou_mariam]

اليوم و بعد مرور 3 أعوام على السيارة أجدنى فى حالة من ............
1- العلامة اتسرقت منى ( لوجو ) أمامى و خلفى و محتاجين 450 جنيها من التوكيل و دخت عليهم برة التوكيل مش لاقيهم .
2- الكلاكس محتاج ذراع جديد 1200+120=1320 بدون تركيب
3- الكاوتش مش عاجبنى محتاج اغيرة
4- بخاف اخرج بالسيارة تتخبط منى ادفع 20 الف أو أكثر
5- قطع الغيار غير مناسبة لثمن السيارة
و أخيرا قررت البيع و دخلت فى حيرة أشترى ايه .....................
لو حد محتار مثلى يقولى تفكيرة وصل لاية وشكرا

[hugan]

علامه امامي وخلفي
450
ودراع كلاكس انقرض من ايام الفيات 25 و24
1300 جنيه
في عربيه المفترض انها موجههه للدول الفقيره والطبقات محدوده الدخل
هي دي الاعتماديه ولا بلاش

[K.LOTFY]

هو بالنسبه للعلامات ممكن يكونوا فى التوفيقيه وبأرخص من التوكيل بكتير
بالنسبه لدراع الكلاكس ممكن تلاقيه استيراد بارخص من كده
الكاوتش هى العربيه بقالها 3 سنين فكده كده لازم تغيره عشان العمر الافتراضى هات بريدجستون او اى ماركه تانيه انضف من الباروم اللى فيها ده
اى عربيه حتجبها حتلاقى فيها مشاكل ولو لا قدر الله اتخبط حيبقى تصليحها غالى برضه

[S O P H O S]

غالية فعلا !

[amrelzawawy]

والله يا جماعه لو جربتم تروحوا التوكيل لارخص عربيه فى قطع الغيار هتسمعوا ارقام تضحك انا رحت مع صحبى للهيونداى فيرنا توكيلهم اللى فى طريق الاسماعيليه لقيت الدنيا مولعه بداية من التيل ب350 جنيه والطنابير الواحد ب500 جنيه نهاية بالطلمبه ب3000 الاف ده قبل زيادة الدولار وحاجات كثير ان مكنتشى زى اللوجان تكون ازيد... هى الفكره توافر القطع بره التوكيل سواء استيراد او اصلى او تقليد والعربيه توفرت فيها حاجات كثير بره بسبب انها منتشره وواحده واحده مع السيارات تقدم يبتدى يتوفر الاجزاء المعمره زى علبة الدركسيون والبوابه وغيره مع انه بالفعل موتور استيراد وارباع وانصاص للعربيه موجوده فى الحرفيين وصقر قريش

[amrremah]

ميزانيتك كام؟

[monamize4]

رأى الشخصى بيعها و اشترى لانوس مستعملة ,,,,, هى أه واطية شوية ع الارض و الشكل قديم شوية بس قطع الغيار بالتراب و شوية و هتتباع ف السوبر ماركت و بنزين قليل اوى و متهيالى دا الانسب لعربية بالسعر دا المفروض انها اقتصادية ,,,,, بتاع ايه ذراع الكلاكس ب 1320 !!!!!!!!!!!!!!!!!

[georgedada82]

ناس قالت ان دراع الكلاكس بيتباع في النوفيقية او صقر قريش ب 350 جنيه جديد

[georgedada82]

وفي ناس كهربائية بتصلحه عادي جدا ... العلامات بتتباع بره في رنج من 30 ل 50 جنيه قدام او ورا

[yousse_mohamed]

فى الحرفيين والتوفيقية كل حاجتها موجوده.ومنتشرة.وبالنسبه للخدوش والخبطات اى عربيه فى الدنيا معرضه للخدوش والخبطات.معلش يعنى ايه تتخبط تدفع 20الف جنيه؟؟؟؟؟؟؟؟؟؟؟؟؟؟؟؟؟؟

[adel_edrees]

نفسى فى حاجة لما حد ييجى يتكلم عن قطع الغيار يتكلم بالمقارنة بالتوكيل يعنى توكيل يتوكيل دى حاجة الحاجة التانية لوكل واحد باع عربيته علشان دراع الكلاكس باظ كانت العربيات كلها للبيع و على فكرة هو مش دراع كلاكس بس هو دراع نور و كلاكس يعنى المفروض أنه بيبوظ نتيجة العصبية الزائدة فى أستخدام الكلاكس و ده شبيه باللى كان موجود فى البيجو 504 وحش الطريق و أفضل ما أنتجته فرنسا من سيارات و تغيير الكاوتش ده لازم لأن الكاوتش بالذات مش لعبة الحاجة التانية أنك لو فضلت خايف تخرج بيها علشام ما تتخبطش حتتخبط برضه أن ما ساعة ما جبت العربية و هى بتتخبط و هى واقفة و الله العظيم وهى واقفة ياراجل أتكل على اللى خلقنا و أتمتع بيها ولا يهمك

[mohamed1979]

المهم ان الى بيتكلم على الأعتماديه راكب صينى
حاجه تضحك والله

[محمد ابراهيم 1]

مرة دراع النور والكلاكس والإشارات ( هو دراع واحد على فكرة ) فى الرينو رينبو بتاعتى باظ سألت عليه فى التوكيل لقيت ب 500 جنية وكان وقتها عندى بيجو 405 وكان نفس الدراع بيقوم بنفس المهمة رحت سألت عليه فى بيجو لقيته ب 200 أصلى فرنساوى فاليو وبتاع الرينو أبو 500 كان تركى - المهم جبت الفرنساوى بتاع البيجو وركبته على نفس الفيشة ونفس المسامير بدون أى تعديل واشتغل زى الفل لغاية ما بعت العربية بيه - المشكلة الوحيدة إنه كان أطول حوالى 1 سم ومحدش يلاحظة غيرى لأنى عارف القديم - شوف بتاع ال 405 كده

[hugan]

المهم ان الى بيتكلم على الأعتماديه راكب صينى
حاجه تضحك والله

ياباشا
كل اللي يهمنا انك تضحك وتنبسط

[ahmedalaahosny]

بص يابرنس الخلاصة اعمل بعربيتك اللي انت عايزه انت اشتريتها ليه مش عشان تخرج تقضي بيها مشاويرك اخرج بيها اتفسح امشي بيها ع الحيط وبعدين مين اللي قال ان الخبطة ب 20 الف ده انا والدي كان شاري برليانس جالينا كانت مخبطة ومحتاجة رش وسمكرها ورشها وظبط كام حاجة كده ب 8 الاف بص انت تهجم علي الحرفيين تظبط عربيتك هناك وتدلعها بستاير باي حاجة تعجبك عند بتوع الاكسسورات ياراجل ده الوالد كان بيلف علي علامة البريليانس بعد ماشد العربية وف الآخر واحد صاحبوا جابهالوا من الحرفيين ب 70 الاتنين وانت مش لاقي رينو سيبك كده كده هتخسر ف البيع تبيعها وانت مزاجك عنب ولا وانت متعكنن