حادث مروع !!!

[miguel]

السلام عليكم يارجالة !!!
اولا ربنا يسترها علينا جميعا !!! انا عملت حادثة علي الطريق الصحراوي وانقلبت بيا العربية عومت جامد جدا مني وانا علي سرعة 90 \ 100 تقريبا وربنا سترها الحمدلله علي كل حال !! اللي حصل في العربية السقف اتكعم الكابوت والاكصدام الامامي والرفارف و2 فانوس امامي و2 مراية جانبية والبربريز والسربنتينة يعني التكاليف مايقرب من 18000 الي 20000
العربية مؤمن عليها ودي السنة الثالثة ليها وعاملة 25000 كيلو شركة التأمين ممكن تصرف 80% من الاصلاحات
انا محتار م بين خيارين اصلح العربية وارجعها زي الاول وبعد كده ابيعها ولا التأمين ياخد مني العربية مقابل 30% من قيمة العربية فين حين اني لو العربية رجعت تاني وحبيت ابيعها ممكن تجيب كام ؟؟؟

وربنا يسترها علينا كلنا !!!

[Eng_hatemfathy]

انا لسه حاصلى الموقف ده ومن غير تأمين وكنت فى حيره لانى عربيتى عامله 24 الف كيلو ولسه فى الضمان ومكملتش سنتين وااضرار كانت اقل يعنى سقف وباب وزجاج بس ولكن التكاليف كانت زيها تقريبا يعنى فى رينج العشرين الف وكان الخيار انى اصلحها بعشرين وهيطلع عينى شهر ولا شهر ونص واكيد هتخانق مع الصنايعية وفى الاخر ممكن متطلعش صح وهامشى بيها مقريف ولما اجى ابيعها اخسر كمان عشرين بس البيع هيكون بصعوبة لانى هقول على الحادثة
او انى اخسر نص تمنها بالظبط وابيعها حادثة فبصراحة بعتها بنص تمنها واستعوضت ربنا فى الفلوس واشتريت دماغى وضميرى وراحتى ومزاجى فرأيي انك تشوف تاجر حوادث وتبعهاله بعيد عن التأمين والافلام دى لان 30% قليل جدا

[miguel]

تمام كده !! الف سلامة عليك !! وربنا يسلمها !!!
وطب جبت واحده تانية ولا اية ؟؟

[amr.elsayed]

صلحها فى التوكيل على حساب التامين وحتدفع 2000 جنيه وبعد كدة قيم العربية لو شغالة كويس كمل بيها
لو مش راضى عنها بيعها بس ساعتها حتجيبلك اكتر من ال 30 % بتوع التامين وتكون انت الكسبان وفى نفس الوقت مش حتقرف نفسك مع الصنايعية وحتتصلح كويس

[ahmedsrs]

بيع احسن عمرها ماهترجع ذى الاول وهتقرفك قرف السنين

[Eng_hatemfathy]

تمام كده !! الف سلامة عليك !! وربنا يسلمها !!!
وطب جبت واحده تانية ولا اية ؟؟

ربنا كريم ابتلى ورزق -فلله الحمد والمنة رزقت بمال واجلت سداد دين معين وجبت اللى قدامى وتمن البيع وحطيتهم فى كروز زيرو بعدما روحى طلعت فىالبحث عن مستعمل نضيف وصاحبه صادق
للاسف البيع فى مصر مبنى على الغش الا ما رحم ربى وشفت مهازل خلال اسبوعين وفى الاخر توكلت على الله واشتريت كروز

لو هتعرف تبيع دلوقتى لتاجر توكل على الله
انا ممكن اديك تليفون اللى خد عربيتى هوا من المنصورة وشغال فى الحوادث واوصل فيها للى تقدر عليه
او توكل على الله واستفاد بالتأمين وصلح فى التوكيل وبيع بعد كده بتمن قليل وهنكون كسبت 18 الف اللى هما بتوع التأمين ولو اتباعت بعد كده ب 50 الف فانت الكسبان

[wassim_nasser]

مبدأيا حمدلله علي سلامتك و الحمدلله علي كل حال .. انا رأيى من رأي عمرو .. صلح علي حساب التأمين والتوكيل ملزم يرجعها زيرو و حتي لو برة التوكيل فيه ورش كتير ترجعهالك زيرو و انت ف الاخر دافع بالكتير 3 4 تلاف جنيه واهى قاضية مشاويرك و حتي لو حبيت تبيعها بعدين هاتجيب مبلغ مش بطال .. اما لو بعتها حادثه هاتريح دماغك لكن هاتخسر جامد وانا ضد الحل ده لأنى مش شايف منه اي فايده ده غير انك اسعار الزيرو دلوقت غالية

[Dr.Karim Emam]

أولا حمدلله على سلامتك.
ثانيا, صلحها في التوكيل و بعدين شوف ايه الوضع, خصوصا ان التوكيل المفروض عندهم الآليه انهم يرجعوا السقف زي الفبريكه.
انت لو صلحتها في التوكيل حتدفع بالكتير 5000 جنيه و بعدين هيكون معاك عربية تعتبر جديدة لكن لو هتبيع ب 30% مش هتلاقي حاجه مناسبة تركبها بالسعر ده.

[adel_edrees]

معلش أولا حمد الله على السلامة ثانيا صلحها فى التوكيل و ما تبيعهاش خردة ثالثا ما عرفناش أيه السبب فى العومان أنت بتقول 90 - 100 و العربية عامت هل الكاوتش هو السبب و ألا العربية كان فيه مشكلة و ألا العربية بتعوم أصلا و ألا الطريق و ألا أنت دخلت منعطف حاد و قاسى و ما عرفتش تلم نفسك فالعربية عامت جزاك الله خير ما تنسناش بالأجابة لأن السؤال ده ممكن يفرق فى حاجات كتير جدا هل عمود الأتوان و ألا موضوع الكاوتش هو اللى بيفرق و العربية بتاعتك أنت بالذات أصلا فيها مشاكل من ناحية الأتزان وأنت كنت مش منتبه لها طمنا ربنا يخليك

[miguel]

اولا العربية مافيهاش عمود اتزان اصلا ثانيا الكوتش ردئ للغاية والعربية اصلا عامل بيها 24000 ومافيهاش اي مشاكل علي العموم العربية في الورشة وهخليهم يشيكوا علي كل حاجة واعرف السبب بالظبط هي العربية مافيهاش حاجة شوية سمكرة بس لكن العربية من جوة سليمة وتحت كله تمام هغير غطاء الكبوت ورفارف و3 ابواب وسمكرة السقف الحمدلله انها جات علي كده !!! لكن عاوز اعرف لو حبيت ابيعها بعد كده ممكن تجيب كام ؟؟؟

[Eng_hatemfathy]

انا كلمنى التاجر اللى خد عربيتى يسألنى على حاجه وقالى انه خلص العربيه وبقت فوره وبيغسلها علشان يركب الفرش
بصراحة صعبت عليا وصعب عليا الخسارة فيها
صلحها فى التوكيل وقرر بعد كده وبعد التصليح هتعرف تقييمها صح
وربنا معاك -انا مكنش عندى تأمين فالخسارة كانت هتبقى موجوده كده كده الفرق انى هرحل جزء منها اما انت فالتأمين هيسيل عنك بلاوى وربنا يتمهالك على خير

[lozaregypt]

اولا حمد لله علي سلامتك ثانيا البني ادم لايعوض وانت اللي بتعمل الفلوس وربنا يعوض عليك


اعتقد ان راي الراجل المحترم دي سليم بنسبة كبيرة

صلحها فى التوكيل على حساب التامين وحتدفع 2000 جنيه وبعد كدة قيم العربية لو شغالة كويس كمل بيها
لو مش راضى عنها بيعها بس ساعتها حتجيبلك اكتر من ال 30 % بتوع التامين وتكون انت الكسبان وفى نفس الوقت مش حتقرف نفسك مع الصنايعية وحتتصلح كويس

واضافة تعيديل انك مش شرط تصلح في التوكيل
وانك تصلح في مراكز خدمة معتمدة او ورش تبع التامين وسعاتها هتبيعيا مش اقل 85 % من تمنها الحقيقي وان شاء الله ترجع زي الاول


ربنا يكرمك ان شاء الله ل

[adel_edrees]

أنا اللى كنت عايز أعرفه ملابسات الحادثة و ظروفها هل عدم وجود عمود أتزان فيها هو اللى سبب المشكلة و ألا الكاوتش معلش أنا عارف أن ده ممكن يمون غلاسة منى لكن صدقنى أنت كده بتنبه ناس كتير علشان دى أرواح و خصوصا أن السرعة اللى أنت كنت ماش بيها مش كبيرة أوى أهم خاجة أنك تقو للنا العامل البشرى الخطأ فيه كام و العربية الخطا كان كام بمنتهى الموضوعية و الحيادية جزاك الله خيرا و عوضك خير عوض بأحسن منها أن شاء الله

[miguel]

اللي انا اعرفة ان الكوتش اللي فيها سيئ جدا لدرجة انه ممكن مايديش سبات للعربية لان قبل كده كنت ماشي علي 40 وضربت فرامل العربية زحفت بشكل غبي جدا دي حاجة الحاجية التانية ممكن عدم وجود عمود الاتزان برضة مشكلة خصوصا ان العربية عالية فبالتالي عومت جامد
يعني علو العربية ميزة وعيب في نفس الوقت !! يعني ممكن اقولك لو في ملف يبقي اخرك علي 70 او 80
ولااااااااااازم الكوتش اللي فيها يترفي ارجوكم لان ده خطير جدا غيروه باي نوع غير الباروم ده هيكون افضل جدا
وربنا يسترها علينا كلنا !!!

[adel_edrees]

تمام كده ربنا يكرمك يعنى الأولوية زى ما أنا فهمت الكاوتش يتغير و بعدين عمود الأتزان يركب تسلم أيدك و ربنا يحفظك وشكرا