تقرير استلام الرينو سانديرو

[kar!m]

هي فيها ايه بي اس؟

[mohammedmnmz]

ضمانها 3 سنوات او 100 الف كيلو

[mohammedmnmz]

هي فيها ايه بي اس؟

لا مافيهاش بس تقريبا الشكل الجديد فيه

[ahmedelfeky]

الف مبروك وربنا يباركلك فيها...... ده انت غرباوي زي اهو ... نورت قسم رينو

ناوي تعمل صياناتها فين ان شاء الله؟

[Shiemaa]

معلش هي كان في منها اتوماتيك ؟ اصلي اتصلت بالوكيل قالي منزلش منها اتوماتيك هي مانيوال بس ولسه ادامها سنة علي مينزل الاترماتيك

[Refaat33]

الشكل الجديد نازل مانيوال بس لحد دلوقتي , ممكن حضرتك تشوفي الشكل القديم أتوماتك في المعارض أو ممكن حاجه كسر زيرو .

[Shiemaa]

مفيش امل في الاتوماتيك خااالص

مفيش شيب قديم في اي معرض والموجود كله مانيوال انا ياست خلاص

[adel_edrees]

الحمد لله استلمت امبارح الرينو سانديرو من المصرية للسيارات فرع طنطا و ده تقرير عن اللي حصل اثناء الاستلام
1- اولا انا كنت ناوي اكون متشكك لاقصى درجة و اشيك على كل حاجه
2- روحت بدري و في النهار عشان اتابع العربية و هي لسا جاية من المخزن و اشوفهم و هما بغسلوها و بيشيلو من عليها الورق بتاعها عشان مايكنش فيها مشاكل و هما يداروها و قد كان فعلا ان العجل كان فيه شوية صدأ عند المسامير و كده و طبعا كانو عايزين يركبو الصواني على طول و انا اصريت انهم يشوفو الصدأ ده الاول و الحمد لله اتشال على طول بمزيل الصدأ
3- كان معايا ميكانيكي لأني مقتنع ان عين الخبير افضل من عيني في ملاحظة العيوب
4- بصيت كويس على البوهية في كل حته من العربيه يعني فتحت الابواب و بصيت على البوهية بتاعتها من جوه و البوهية جوا الكبوت و في الشنطه
5-بصيت طبعا على العداد و كان عامل 66 كيلو و اظن ان دا مش وحش
6-فتحنا الكبوت و بصيت على كل حاجه الماتور- الزيت- كل السوائل
7- شغلت العربية و سمعت صوت الماتور عالي ولا كويس طبعا شغلت كل انوار العربية من اول الفوانيس انتهاء باللمبة اللي بتنور في شنطة العربية
8- شغلت المساحات و الميه بتاعتها في الزجاج الخلفي و الامامي
9- شغلت التكيف و اتأكدت انه شغال كويس
10-لفيت الدركسيون يمين و شمال كذا مره عشان اتأكد ان مافيش مشاكل ولا تزييق
11- فتحت الابواب كلها عشان اتاكد ان مافيش تزييق ولا مشاكل و انها بتفتح كويس
12- بصيت على الفرش كويس عشان اتأكد ان مافيهوش اي قطع او مشاكل في التنجيد
13- حركت الكراسي قدام و ورا عشان اتأكد انها شغاله
14- جربت الراديو و الكاست و التحكم بتاعهم اللي في الدريكسيون عشان اتأكد ان كل حاجه شغاله و طبعا كان فيه كود الراديو محتاجه عشان يشتغل خليت الراجل اللي معايا يتصل بمركز الخدمه عشان يجيبه و يفتحه
15- بصيت على شنطة العده و الاستبن و اتأكدت من سلامتهم
16- اتأكدت اني اخدت كل الرفايع (ولاعه -طفاية متحركه-دواسات-غطاء- سي دي قرءان هدية- و ميدالي مفاتيح هديه)
17- فتحت الشبابيك و قفلتها كذا مره عشان اطمن عليهم
18- اتأكدت ان المفاتيح كلها شغاله و اتأكدت من السنتر
19- اتأكدت من لمبة الاستوب و من التابلوه انه كله شغال كويس
20- شيكت على الفرامل و فرامل اليد و طبعا حركت الفيتيس كذا مره عشان اتأكد ان مافيهوش مشاكل

ملحوظه في الاخر التقفيل النهائي بتاع العربية اي كلام بس يشفعلها مميزاتها الكتيره منها الارتفاع الكبير عن الارض و التصفيح اللي عند حوض الماتور و كمبيوتر الرحلات و ثباتها

و يا رب تكونو استفدتو من التقرير المتواضع ده

بسم الله ما شاء الله أستلام رائع هذا الأستلام يدرس و لكن لى سؤال هما بتوع المصرية سابوك تعمل كده و أيهاللى كان حيحصل لو لقيت في مشكلة في اى حاجة من الحاجات دى هل كانوا حيرضوا تبدل العربية

[mohammedmnmz]

بسم الله ما شاء الله أستلام رائع هذا الأستلام يدرس و لكن لى سؤال هما بتوع المصرية سابوك تعمل كده و أيهاللى كان حيحصل لو لقيت في مشكلة في اى حاجة من الحاجات دى هل كانوا حيرضوا تبدل العربية

اكيد طابعا سابوني اعمل كل اللي انا عايزه و اكيد ماكانوش يمنعوني لاني بشتري و من حقي اشوف و اشيك على كل اللي انا عايزه
بالنسبة لتغيير العربية بأه اكيد انا كنت هرفض استلم لو فيه اي مشكله في العربية و اكيد مش هاخد عربية معيوبة تحت اي ظرف

[mohammedmnmz]

الف مبروك وربنا يباركلك فيها...... ده انت غرباوي زي اهو ... نورت قسم رينو

ناوي تعمل صياناتها فين ان شاء الله؟

الله يبارك فيك و القسم منور بأهله اكيد
بس انا مش غرباوي والله بس انا من القليوبية اساسا و عايش في قويسنا (تبع المنوفية و على الطريق)
و ناوي اعمل الصيانه في العدوي اللي على الطريق ان شاء الله

[mostafa magdy]

الف مليون مبروك .. ع العربيه
و ربنا يبارك لك فيها ..

[S O P H O S]

الف مــبروووك

[adel_edrees]

الف مــبروووك

[mohammedmnmz]

الله يبارك فيكو يا جماعه

[msdn70]

ألف مبروك وشكرا على التقرير الرائع
على فكره لو كانت سانديرو موجوده وقت لما اشتريت اللوجن كنت إشتريتها بدل اللوجن
ما شاء الله عربيه جميله ربنا يبارك لك فيها ويكفيك شرها يارب.
على فكره أنا لما إشتريت عربيتي جبتها من المصريه فرع القاهره كليه البنات وهما لوحدهم عملولي كل الإختبارات ده أدامي بس ميمنعش إن تقريرك ده أنا بأعتبره مرجع لأي حد عاوز يستلم عربيه جديده

عجبتني أوي إنك واخد ميكانيكي معاك ومال لو رايح تشتري مستعمل حتعمل إيه أستاذ محمد. الزيرو مفروض إنها تم الكشف عليها بلمصنع وأكيد عندهم إداره جوده.