السانديرو بعد 1000 كيلو

[mohammedmnmz]

السلام عليكم و رحمة الله و بركاته
دا تقريري او انطباعي عن الرينو سانديرو بعد ما مشيت بيها 1000 كيلو خلال تلت اسابيع
طبعا العربية ليها مميزات و عيوب زي اي عربية
طيب ايه مميزاتها؟؟؟؟؟؟؟؟
1- العربيه عاااااااااااااااااااااااااااااالية جدا و دي من اهم مميزاتها فعلا انا كذا مره نبأه في العربية خمسه و او سته و باخد اي مطب بالعجلتين و مافيش اي مشاكل دا طبعا بالاضافه للتصفيح اللي عند حوض الماتور اللي مخلي الواحد مستريح جدا من الناحية دي

2- حجم العربية من الخارج صغير ( دا بيساعد في الركن و في الزحمة و حتى على السريع لما تيجي تاخد غرزه ضيقه شويه) و في نفس الوقت العربية واسعه جدااااا من الداخل و بتاخد خمس اشخاص بالغين بكل اريحيه (و ممكن الكنبه الخلفية تاخد سته مزنوقين شوية)

3-الثبات العربية ثابته جدا رغم ارتفاعها و انا كذا مره بكون ماشي بالعربية على السريع و مش حاسس باي حاجه و اجي ابص على العداد الاقيني على ال120 او ال130 و انا حاسس اني ماشي على ال80 مثلا (العربية بيبدأ ثباتها يقل بعد ال140 و انا بصراحه ماجبتش اكتر من ال150 و ساعتها حسيت ان العربية بدأت تخف شويه بس ماكنش فيه مشاكل في التحكم و كنت سايق بايد واحده و عادي جدا)

4- ماتور العربية قوي جدا و ممكن تشد مع اي حد و تعلم عليه كمان

5-التكييف جميل جدا و بخلي العربية تلاجه و مابيأثرش على سحب العربية نهائي

6- كاست العربية و ميزه البلوتوث و امكانية عمل المكالمات عن طريق الكاست دي ميزه جميله جدا مع التحكم الموجود ورا الدركسيون (دي ميزه مش موجوده في الفئه دي نهائي)

7- الشنطه بالنسبه لانها عربية هاتش باك انا شايف انها واسعه و اكثر من كافية خصوصا مع ميزة طي الكنبة الخلفيىه اللي ممكن بيها توسع مساحه الشنطه

8-طبعا شكل العربية الانسيابي مع الكشافات و جنوطها مقاس 15 و الهاتش باك مدي شكل جميل جدا و دا من اهم اسباب شرائي للعربية دي

9-فراملها جميله جدا و بتكلبش في الارض ساعة اللزوم

10- العفشه جميله و ناعمه و مافيهاش مشاكل

طيب العيوب ؟؟؟؟؟؟؟؟؟؟؟؟
1-التقفيل زباااااااله طب حد هيسألني ليه التقفيل زباله اقوله بص على عتب العربية في الابواب الخلفيه هتلاقي اللحام باين طيب بلاش بص على العزل اللي في الشنطه دا مش عزل اساسا طيب حاجه تانيه بص على ضفيرة الكهرباء اللي في الكبوت هتلاقيها ملفوفه ببلاستر (بلاستر يا مؤمن) و غير كده في حاجات تانيه كتير تدل على التقفيل السئ للعربية

2-صوت الماتور عالي حبتين يعني لازم هتبأه سامعه و انت ماشي على طريق

3-الباور تقيل حبتين (رأيي انه مش عيب لان دا بينعكس على الثبات)

4- مكان عجلة الاستبن (تعسيفه سوده ) انت ممكن تفكه و انت واقف عادي بس لازم هتنزل تحت العربية عشان تركبة و غالبا هتحتاج مساعدة صديق و انت بتركبه

5-طبعا بعض الرخامه و اللي هي
- الكلاكس اللي في دراع الاشاره
- مكان زراير الازاز
- مكان زرار السنتر
- الشنطه و تانك البنزين اللي بيفتحو بالمفتاح من الخارج

6- -سحب العربية بيكون ضعيف شوية لغاية ال60 و بعد كده بتنطلق بكل سلاسه

7- لازم تدوووووس على الدبرياج لاخره عشان تعرف تنقل (حته رخمه شوية على السريع)

8- ممكن تسمع اصوات كركبه كده و انت سايق و دا بيرجع لان الشنطه مفتوحه على العربية من جوه و العزل اللي محطوط فيها وحش

9- الازاز الخلفي بيفتح تلتلينه فقط (دا عشان هي عربية عائلية عشان الاطفال بس فيه ناس بتدايق من الحكاية دي)

10- النور اللي بيدل على اني بدي اشاره سواء بدي اشاره يمين او شمال او انتظار السهمين بينورو و دي ساعات بتلخبط الواحد و هو ماشي


الخلاصه
العربية جميله جدا و مريحه و ثابته على الطريق و كافية جدا ( بالنسبالي )لكن فيها شوية رخامه و تقفيل مش ولابد لكن في النهاية انا رأيي الشخصي انها احسن عربية في الفئه دي و سعر الشكل الجديد هيفقدها ميزه مهمة جدا فيها

و يا رب يكون التقرير دا مفيد للناس و اسف على التطويل

و شكرا

[Hany Saad]

الف مبروك...تقرير اكثر من رائع
و فعلاً هى احسن اختيار فى هذه الشريحة السعرية
تحياتى

[omaranes77]

تقرير ممتاز من شخص ممتاز

كب والسعر وعوامل الامان