أروح (محمد زكى) ازاى .. ينوبكم ثواب

[Egyzizo]

عايز بقى أروح أحجز اللوجان عند محمد زكى اللى فى القطامية ، وكنت ناوى النهارده بس احتست فى الطريق ومافهمتش أروح ازاى ، فأجلتها لبكره.

أنا العنوان اللى عندى هو : القطامية ، أول محطة موبيل يساراً عند مدخل مدينة نصر بعد كارفور بـ 3 كيلو ..
ولما كلمتهم فى الشركة قالوا لى تاخد الدائرى فى اتجاه المعادى وتنزل نزلة العين السخنة اللى قبل المعادى.

أنا كده اتلخبطت ، ايش جاب مدينة نصر للمعادى ؟؟

وبعدين حاولت أشوف نزلة العينة السخنة دى عل خريطة النت (هنــا) لقيتها ملعبكة وملخبطة

يا ريت تساعدونى عن الطريق بالتفصيل ..

أنا رايح من المنوفية، يعنى هاخش الدائرى من على طريق مصر اسكندرية الزراعى ..

فيه دخلتين للدائرى من على الزراعى ، الدخلة الأولى ودى رايحة الجيزة .. ماليش دعوة بيها

والدخلة التانية دى اللى رايحة ناحية المطار والمعادى ، دى هاخش فيها

بعد كده أعمل ايه بالتفصيل؟

كتر ألف خيركم مقدماً.

[emam]

شوف ياباشا انته لو جى من الصحراوى هتاخذ الدائرى اتجاه المنيب والمعادى وهتكمل لحد متلاقى كارفور على يمينك هتسيبه وتكمل حوالى 3 كيلو كمان هتلاقى فتحة يمين مكتوب عليها تقريبا العين السخنه والغردقة على ما اعتقد هتنزل فيها وتلف من جنب مصنع الغاز هتلاقى نفق على شمالك هتدخل فيه بعد النفق ب 300 متر تقريبا هتلاقيه على يمينك والف مبروك مقدما ً

[Egyzizo]

شكراً جزيلاً .. أنا مش جاى من الصحراوى .. أنا هاخش الدائرى من على الزراعى .. يبقى هاخش برضه الدخلة اللى بتودى اتجاه المطار - المعادى؟؟


أتوقع ألاقى كارفور بعد ما أمشى قد ايه تقريباً على الدائرى؟

ومدخل العين السخنة هيبقى فعلاً يمين ، يعنى أنزل منه وأنا ماشى فى سكتى عادى ، واللا هو الناحية التانية فهالف وأرجعله؟ أصل مكتوب فى العنوان يساراً.

مصنع الغاز ده مبنى واضح مكتوب عليه اسمه يعنى ، هيقابلنى بعد مشى أد ايه على طريق العين السخنة؟ وهيبقى على يمينى واللا شمالى
وألف جنبه ازاى ؟ يمين واللا شمال

[M.Moustafa]

يا باشا انت هتمشي فعلا في اتجاه المعادي خليك ماشي لحد ما كارفور هيجي على يمينك بعد كام كيلو بالظبط مقدرش افيدك بعد كارفور هتلاقي مودرن اكاديمي على يمينك وبعد كده هتلاقي البافارية على يمينك بعد البافارية مباشرة في نزلة ومكتوب عليها مخرج 9 انزل منها والطريق طبيعي هياخدك على ناحية اليمين وهتلاقي الناس كلها بتلف تاني يوترن هتعمل اليوترن وهتلاقي صينية قدامك ونفق هتنزل من تحت النفق واول ما تطلع منها اخر الشارع هتلاقي محمد زكي على ايدك اليمين

[Beam28]

بعد إذنك يا أستاذ محمد بس توضيح مهم هوه جاي من ناحية الطريق الزراعي في اتجاه المعادي مظبوط بس هوه مش هيوصل اصلا لحد كارفور ولا البافارية ودول هايبقوا على شماله بس بعد مايكون عدى مخرج مدينة نصر اللي بيدخلوا على محمد زكي

[M.Moustafa]

بعد إذنك يا أستاذ محمد بس توضيح مهم هوه جاي من ناحية الطريق الزراعي في اتجاه المعادي مظبوط بس هوه مش هيوصل اصلا لحد كارفور ولا البافارية ودول هايبقوا على شماله بس بعد مايكون عدى مخرج مدينة نصر اللي بيدخلوا على محمد زكي

يا باشا المفروض لو اخد الطلعة الجديدة بتاعت الدائري يبقى هيمشي في الاتجاه اللي شرحته وهوا كلامه انه متجه على طريق المعادي المطار مش العكس عموما هوا ممكن يوضحلنا اكتر ولو كده برضه ممكن اشرحله الطريق بالعكس

[medo99_pc]

طيب ممكن رقم تليفون محمد زكى ؟؟

[osamaos20022]

بص انت تاخد مطلع الدائري اتجاه المطار
هتمشي وتعدي نفق الاسماعليه وتفضل مكمل
هتمشي علي الدائري حوالي 50 كيلو
مش هتوصل كارفور
بعد اكادميه مبارك بشويه هتلاقي منزل السخنه انزل وكمل مع الاسهم الي بتقول مدينه نصر
هتلاقيه هناك

[Beam28]

يا باشا المفروض لو اخد الطلعة الجديدة بتاعت الدائري يبقى هيمشي في الاتجاه اللي شرحته وهوا كلامه انه متجه على طريق المعادي المطار مش العكس عموما هوا ممكن يوضحلنا اكتر ولو كده برضه ممكن اشرحله الطريق بالعكس

آه مظبوط أنا نسيت انهم عملوا وصلة جديدة (وصلة المريوطية) مع إني بامشي عليها كل يوم !! وهوه فعلا لو طلع في اتجاه المعادي (عن طريق المهندسين) يبقى زي ما سعادتك تفضلت ووضحت.. أما لو راح في اتجاه المطار (باتجاه مدينة السلام) فيبقى زي ما انا وضحت

[Beam28]

بص انت تاخد مطلع الدائري اتجاه المطار
هتمشي وتعدي نفق الاسماعليه وتفضل مكمل
هتمشي علي الدائري حوالي 50 كيلو
مش هتوصل كارفور
بعد اكادميه مبارك بشويه هتلاقي منزل السخنه انزل وكمل مع الاسهم الي بتقول مدينه نصر
هتلاقيه هناك

+11111111111111

[Egyzizo]

الحقيقة أنا متشكر جدا جدا على تفاعلكم ..
وبالنسبة لتليفونات محمد زكى فهى 29178022 - 29179600 - 02 23781414
وممكن تكلم على طول أستاذ سمير فى المبيعات على الموبايل بتاعه : 0102901015

أنا باعرف أروح المطار من على الدائرى فدى السكة اللى هامشى فيها
يعنى هاخش الدائري من على مصر/إسكندرية الزراعى ، وهامشى طوالى
وهافوت نزلة المطار اللى قبل النفق ، وهاكمل طوالى ناحية المعادى

الحقيقة أنا ماعرفش موضوع الطلعة الجديدة علشان أنا يدوب باحسس فى السواقة فى القاهرة، فخلونا فى الطوالى

السؤال ..
هل نفق الإسماعيلية هو النفق اللى بعد نزلة المطار مباشرة ؟
يعنى أحسب 50 كيلو بعد النفق ده ، واللا هو نفق تانى؟

وهل منزل العين السخنة هيبقى فى سكتى وأنا ماشى ، يعنى فى الناحية بتاعتى
واللا هالف له الناحية التانية؟

وهل فيه يافطة واضحة واللا حاجة تعرفنى مكان المنزل ده؟

وماذا بعد الخروج من منزل العين السخنة؟ يعنى أرجو توضيح موضوع مصنع الغاز واليو تيرن والحاجات دى

[chato_eg]

سبب اللبس هو إن الطريق الدائرى ده حقيقة هو دائرة
فممكن أول ما تدخل الدائرة تتجه يمين...و ممكن تتجه شمال


إنت ببساطة هتيجى من طريق ( اسكندرية - القاهرة الزراعى )
و هتمشى على الدائرى زى ما إنت متعود كإنك رايح المطار
و هتقابل فى السكة النفق إللى عند مدينة السلام و نزلات لطريق الإسماعيلية و تانية لطريق السويس و كل ده مجرد معالم للطريق...لكن مالكش دعوة بالنزلات دى
إنت هاتفضل ماشى على طول و هتقابل نفق واسع جدا و مرصوف كويس و الناس يتجرى فيه (تانى نفق من ساعة ما طلعت الدائرى لإن الأول ده كان عند مدينة السلام ) و المخرج إللى عنده مكتوب عليه مدينة نصر و الحى العاشر.....
لما تقابل النفق تنزل النفق.....
و هتفضل ماشى على طول لحد ما يقابلك نفق تانى مكتوب عليه التجمع الخامس و يشبه النفق السابق له
برضه هتنزل النفق ده

و بعدين تبقى ماشى على اليمين هادى...علشان بعديه بشوية هتلاقى النزلة إللى إنت عايزها و مكتوب عليها ( القطامية - طريق العين السخنة - مدينة نصر )...
خلى بالك...منزلها مش كبير و واضح علشان كده قلت لك بعد النفق تهدى
و مدينة نصر ليها 3 منازل من على الدائرى على الأقل...
إنت هتنزل من المخرج إللى مكتوب عليه ( القطامية - طريق العين السخنة - مدينة نصر )
بعد ما تنزل هتلاقى محمد زكى فى ميدان و واضح جدا....
المشكلة و إنت راجع برضه من نفس الطريق....المطلع مش مباشر...لازم تمشى فى طريق القطامية و بعدين تأخد U-Turn مالهاش أى ملامح و ترجع تانى المسافة المعتبرة إللى مشيتها علشان تأخد المطلع فى إتجاه طريق السويس و الإسماعيلية
أقول لك حاجة...أطول شوية لكن أضمن كتير جدا
و إنت راجع.....تسيب محمد زكى...و تديله ظهرك و تتجه للطريق الدائرى تانى...و هتلاقى معبر يشبه النفق تحت الدائرى ( ما تطلعوش )...لكن تأخد المطلع إللى قبله مباشرة و مكتوب عليه ( المعادى - حلوان - جيزة - منيب - طريق أسوان - اسكندرية الصحرواى)
تمشى فى الاتجاه ده...لحد ما هتوصل قبل كارفور بشوية صغيرين جدا...هناك فى منزل يمين يؤدى لنفق يخليك تعمل U-Turn على الدائرى و تأخد الاتجاه المظبوط إلى طريق السويس و الاسماعيلية و المرج و المطار و من ثم طريق اسكندرية الزراعى زى ما جيت
تروح و تيجى بالسلامة

[Egyzizo]

دى وصفة سهلــــة ..
دى وصفة هايلة ..

كتر ألف خيركم جميعاً ..

التوقيع : مشروع لوجاناوى :)

[Ahmed Selim]

و إنت راجع.....تسيب محمد زكى...و تديله ظهرك و تتجه للطريق الدائرى تانى...و هتلاقى معبر يشبه النفق تحت الدائرى ( ما تطلعوش )...لكن تأخد المطلع إللى قبله مباشرة و مكتوب عليه ( المعادى - حلوان - جيزة - منيب - طريق أسوان - اسكندرية الصحرواى)
تمشى فى الاتجاه ده...لحد ما هتوصل قبل كارفور بشوية صغيرين جدا...هناك فى منزل يمين يؤدى لنفق يخليك تعمل U-Turn على الدائرى و تأخد الاتجاه المظبوط إلى طريق السويس و الاسماعيلية و المرج و المطار و من ثم طريق اسكندرية الزراعى زى ما جيت
تروح و تيجى بالسلامة

ممكن بدل اللفة دى تعمل الأتى

تدى ضهرك لمحمد ذكى و تتجه للطريق الدائرى......هتلاقى النفق اللى بيودى على طريق العين السخنة.....أنزله.....بعده هتلاقى ميدان.....تدخل منه شمال.....تفضل ماشى لحد ما تلاقى مدخل طريق العين السخنة على يمينك.....كمل على طول هتلاقى u turn لفها و أمشى شوية هتلاقى مطلع على يمينك يطلعك الدائرى فى أتجاه الأسماعيلية والمرج

[A.Saad]

ممكن تحجز من فرع الملك الصالح
اهم على الكورنيش هناك