سيتروين c5 و يا خوفى من عز العرب.....

[Hany Saad]

أصدقائى ملاك السيتروين....أخوكم من قسم الرينو و محتاج مساعدة عاجلة جدا جدا.....

قريبى حجز السيتروين c5 و المفروض إنى رايح معاه بكره ندفع التمن و نستلم......

طبعا العربية روعة و سعرها مش وحش بالنسبة لإمكانياتها و لكن للأسف الحلو مايكملش.....

طبعا إحنا من إسكندرية و قريبى ملوش قوى فى السيارات و قصدنى أساعده فى الشراء......العربية كعربية روعة و لكن يا خوفى من عز العرب و اللى بسمعه....

طبعا أخدنى معاه نشوفها قبل الدفع.....كان فيه مدام مسؤلة المبيعات معلوماتها عن العربية زى بالظبط معلوماتى عن الإنشطار النووى......ميييح.....و تفضلت أنا بشرح السيارة لقريبى و لمسؤلة البيع....

طبعا ده خوفنى جدا و خصوصا كمان إنى عرفت إن مفيش غير عربيتين فقط متباعين فى إسكندرية و إن التوكيل معندوش ستوكات قطع غيار للc5 فى مخازن إسكندرية لضعف البيع....كله فى القاهرة و لكن القاهرة ليس أفضل لأن مبيعات العربية ضعيفة جدا و ده بيخلى التوكيل ( ده لو أصلا كويس ) ميهتمش بالعربية إمال عز العرب هيعمل معانا إيه.....و كمان عرفت إن مفيش غير مهندس واحد فى الإسكندرية هو الوحيد اللى يدوبك بيفك الخط فى الc5 .....طيب و بعدين.....


أنا بفكر أنصح قريبى يصرف نظر عن السيارة خالص بدل ما يشتريها و بعدين يتعذب بيها مع طبعا إعجابى بالسيارة و لكن يا خوفى من عز العرب بعد الشراء......

أفيدونا أفادكم الله و لكم الأجر و الثواب.......

[ashouhdy]

انفد بجلدكككككككككككككككككككككككككككككككككككك

[eng.m7md.ali]

العربية بجد تحفة فنية وخسارة يبقى عز العرب وكيل للسيتروين
قريبي معاه موديل 2003 او 2004 واقل حاجة تتقال عليها انه بجد عربية ركوبة زي المرسيدس بالظبط

[Mohab.Nabil]

اهلا بحضرتك معانا فى قسم ستروين

عز العرب توكيل مش ممتاز زى رينو بس برضه مش سىء اوى

عامة عربيات ستروين مش بتبيع كثير و اتوقع برضه انها مش هتبيع فى المستقبل بالشكل المطلوب و ده مش كله عيب من التوكيل عيب من ثقافة السوق نفسه اللى قفل خلاص من الماركة ديه و كل واحد تقوله سيتروين يقولك وجع قلب و مش مناسبة لمصر و الكلام المحفوظ دا كله

طبعا الـ سى 5 مبيعاتها كانت تقريبا ارقام عشرية فى مصر كلها عشان كانت بتنزل قبل كده 2000 سى سى و كانت بحوالى 400 الف فطبعا محدش هيشترى سيتروين بالمبلغ ده والـ 1600 لسه نازل السنة ديه و طبعا هيحسن مبيعات العربية شوية بس مش هتبقى ممتازة و ده شىء مؤكد يعنى هتبيع بس مش بالشكل الكبير

انا شايف لو قريب حضرتك العربية مش داخلة دماغه اوى يصرف نظر عنها و ممكن يفكر فى باسات بيزلاين مثلا بنفس الثمن و تقريبا نفس الركوبة

بس طبعا هيستغنى عن اوبشن و ستايل انا شايفه اعلى فى السى 5

و قطع الغيار اظن ان ديه مش هتبقى بعيدة عن ديه فى الاسعار و لكن الله اعلم عشان مفتيش

ممكن حضرتك تكلم عز العرب فى القاهرة المركز الرئيسى فى الصحراوى و تفهم بالظبط اسعار قطع الغيار و مدى توافرها

هو من الاخر

مفيش معادلة كاملة يعنى حضرتك هتضحى بحاجة قصاد حاجة تانية

عربية ستايل و اوبشنز و سعر كويس قصاد عدم انتشار و سعر اعادة بيع مش كويس

عربية اقل شوية فى الستايل و الاوبشنز قصاد انتشار و سعر اعادة بيع افضل

محدش يقدر يحكم ايه العيوب اللى يقدر يتحملها و ايه المميزات اللى يفضلها الا اللى بيشترى نفسه

اتمنى انى اكون افدتك بأى شىء

[warfighter2114]

انا اتفق ان توكيل عز العرب مش بالقوه الكافيه زى توكيل غبور او منصور ولكن من رايى الشخصى ابعد عن عربيه ملهاش وكيل قوى لانى خسرت عربيتى الاسبيرانزا m11 فى توكيل تكنوسيرفس ابوالفتوح وقعدت اربع شهور لان قطع الغيار مش متوفره واخرتها اتسرقت ايام الثوره ورافع قضايا خليك فى المضمون

[lad]

ونبى بلالالالالالاشششششششش عز العرب انا اتلدعت منه لدعا تمام وبعت العربية بالخسارة عشان ملهاش قطع غيار ولا بره ولا توكيل ونبى بلاشششششششششششششششششششششششششش