شكر واجب

[hamaka]

يا جماعة أنا عامل الموضوع دا عشان أوجه فيه شكرى للرجالة اللى وقفوا معايا لما اتزنقت و كلمتهم ، أحمد عادل باشا عشان لما كلمتو مابخلش عليا بالنصيحة و دلنى على أكثر الناس احتراماً بشمهندس محمد نبيل اللى أنا صدعتله دماغة بمكالماتى لحد الحمد لله ما مشكلتى اتحلت ، بجد ناس فى منتهى الاحترام و الجدعنة اللى فى الدنيا ، و مش عايز أنسى طبعاً مهاب باشا عادل اللى لو كانت معايا نمرته كنت جريت عليه و كلمته هو كمان عشان عمره ماتأخر عليا فى أى سؤال سألتهوله ، بجد ربنا يكرمكم جميعاً و أتمنى أنى أشوفكم فعلاً و أشكركم وجهاً لوجه.....

[mangawy2012]

ممكن نعرف ايه نوع عربيتك والمشكله اللي قابلتها؟

[Mohab.Nabil]

يا باشا لا شكر على واجب

و طبعا احمد عادل و الاستاذ محمد نبيل اساتذة ماشاء الله فى العربية و فاهمين اكتر منى كتير و مش بيبخلوا على اى حد فى المساعدة و بتعلم منهم كل يوم

و ان شاء الله نتقابل كلنا فى المقابلة الجاية للقسم

و الواحد مقصر الايام ديه بس و الله مزنوق اوى فى الامتحانات ادعولى

[el diesel]

تحياتى لرجالة القسم

[hamaka]

يا باشا لا شكر على واجب

و طبعا احمد عادل و الاستاذ محمد نبيل اساتذة ماشاء الله فى العربية و فاهمين اكتر منى كتير و مش بيبخلوا على اى حد فى المساعدة و بتعلم منهم كل يوم

و ان شاء الله نتقابل كلنا فى المقابلة الجاية للقسم

و الواحد مقصر الايام ديه بس و الله مزنوق اوى فى الامتحانات ادعولى

اه ربنا يكرمهم بصراحة زى ما ساعدونى ، و ان شاء الله أقابلكو كلكم قريب ، و ربنا معاك فى الامتحانات يا باشا و معايا أنا كمان فى امتحاناتى و ألحق أعوض ال 3 أيام اللى راحو منى فى حوار العربية ده...

[A.Adel]

العفو يا باشا :)
ده بس من ذوقك

و الحمد لله إنها طلعت بطارية

[A.Adel]

ممكن نعرف ايه نوع عربيتك والمشكله اللي قابلتها؟

العربية c4
المشكلة إنها مكنتش راضية تدور

[A.Adel]

تحياتى لرجالة القسم

منور القسم يا باشا :)

[hamaka]

ممكن نعرف ايه نوع عربيتك والمشكله اللي قابلتها؟

العربية يا باشا أوتوماتيك موديل 2007 ، المشكلة بدأت لما ركنتها 8 أيام بدون ما أدورها خالص عشان قاعد أذاكر للامتحانات ، جيت فى تاسع يوم أطلع بيها السنتر شغال و نور الصالون تمام و العدادات كاتبة الكيلو متر بس من غير نور طبعاً ، بس جيت أحط المفتاح فى الكونتاكت مفيييييييش ، ظلام تام ، ولا كأنى بعمل حاجة و المفتاح كمان مش بيلف كأن الدركسيون مقفول و الفتيس قافش على ال p و الفرامل محجرة ، أنا قولت دى كدة ممكن تكون بطارية على أساس الفترة اللى العربية اتركنتها ، قمت استلفت سلك من جارى كان نازل الصبح و جبت عربيته جنب عربيتى و بوصل بقى فاكرها هتدور ، بجرب برضه مفيش ، الفار بدأ يلعب و بدأت أحس ان الموضوع كبير ، قولت أقطرها و أوديها على التوكيل خصوصاً ان العربية صيانتها منتظمة هناك مع المالك القديم و انا كملت معاهم من بعده عشان أحافظ على العربية ، بس طبعاً اتصدمت بحكاية قفل الفتيس الأوتو و رفض الفرامل انها تفك الدنيا و العربية راكنة فى وش رصيف مش هينفع الونش يوصلها ،قولت يبقى أحاول للاخر فى حوار البطارية يمكن عربية جارى بطاريتها متأومنيش خصوصاً ان عربيته قديمة ، رحت جبت صبى كهربائى ببطارية (معندوش غير السايلة) ووصلنا و جيت أجرب برضه قتيل مفيش فايدة ، فا قمت فاكك بطاريتى خالص و حطيت بطارية الكهربائى مكانها العدادات نورت و الكونتاكت فك بس جيت أدور الموتور مقامش و سمعت تكة واحدة ، فا قلت بس يبقى عيب بطارية و الواد البلية اللى معايا قال كده برضه ، قاللى خلاص نفكها و نوديها الورشة تتشحن ، فكيناها و روحنا للأسطى بتاعه أول ما شافها راح حاططها على الفولتميتر و قاللى بطاريتك سليمة يا بيه دا عيب كهرباء فى العربية ومرضيش يشحنها و عايز بقى يروح يعيش حياتو في العربية ، قولت ازاى دا بطاريتك اللى باعتهالى فتحت العدادات و الكونتاكت و الفتيس (للأسف نسيت أجيبو على ال n ساعتها) بس مداورتش العربية عشان العربية فيها كمبيوتر و بتسحب كهرباء و كانت مركونة و أنا أصلا جايلك تشحنى البطارية ، قاللى حضرتك تسيبنا نشوف شغلنا بقى فأنا اتجننت و قولتله على جثتى و الله ما هتمد ايدك عليها ، المهم سيبتو و روحت لواحد تانى عشان يشحن البطارية دا بقى ضايع اكتر من اللى قبله و يا دوب حط عليها التست أبو لمبة دا من غير فولتميتر و لا بتاع بقى و قاللى ماهى تمام أهى العيب فى العربية ، هى فييييين ، قولتلو و الله مانتا متحرك أنا هوديها عند اللى بيفهموا فيها راح قايللى براحتك "بس و الله العظيم دا مش عيب بطارية" ، ولا كأنى سمعته طبعاً ، و روحت لواحد تالت حصل نفس الفيلم بتاع الأولانى بس بطاريته هنا بقى مفتحتش العدادات و لا الكونتاكت و برضه حط البطارية على الفولتميتر الفاكس اللى معاهم و قاللى البطارية لوووووز ، قولت بقى كدة لازم أكلم الرجالة هنا ، كلمت أحمد عادل شرحلى شوية حاجات و قاللى الاحتمالات منها البطارية طبعاً و منها الدينامو و قاللى على كام خطوة أعملهم للتجربة عشان اتأكد انو مش دينامو و عملت زى ما قاللى ، و قاللى برضه أكلم بشمهندس ايهاب جلال دا راجل محترم جداً و كان فى التوكيل ، و بشمهندس محمد نبيل و هوا معاه بيجو 307 اللى هى زى السى 4 و من أكتر الناس المحترمة اللى ممكن يساعدونى ، كلمتهم هما الاتنين ، بشمهندس ايهاب قاللى هات العربية قولتله مزنوووووق مش عارف أحركها ، و بشمهندس محمد نبيل دا بقى اللى أنا كلتله دماغو بجد و الراجل معايا للأخر ربنا يكرمه ، قاللى أول حاجة قبل أى كلام بطارية جديدة و نشوف ، و بعتلى موديل البطارية المناسبة للعربية كأمبير ، و نزلت جبتها و جيت أجرب ، مفيييييييش قتيل برضه بس الفرق الزيادة ان الكاسيت قام من غير ماأحط المفتاح فى الكونتاكت أصلاً و دا نفس اللى حصل لما جيت اخد توصيلة تانيا من عند أبويا و خاليته يدور على ار بى ام عالى 5 دقايق قبل ماجرب علماً بأن والدى لسة جايب البطارية بتاعتو من أسبوع بالظبط و فارتا كمان ، جبت اخرى بقى خلاص و مش عارف أعمل ايه و أبويا معايا هوا كمان هيتجنن أكتر منى ، كلمت محمد نبيل باشا استغرب جداً لما قولتله جبت البطارية و مفيش برضه قاللى كده ممكن تكون فيوزات أو سوفتوير بقى طالما انت جبت بطارية جديدة ، و ادانى نمرة بتوع أعطال الطوارئ بتوع بيجو عنده يمكن يرضو يجولى كلمتهم ماجوش طبعاً بس قالولى دى بطارية زى ما الرجالة بتوعنا قالو ، المهم أبويا قاللى كدة مالهاش حل احنا مشين فى فيلم البطارية للاخر و انت برضه مصر انها بطارية احنا نروح نجيب الكهربائى اللى أنا بتعامل معاه يمكن يكون فيوز أو كابلات البطارية و هوا ضامنه انه مش بيمد ايده فى حاجة مايفهمهاش و لما يلاقى حاجة كدة هوا اللى بيقول وديها التوكيل ، قولت ماشى جبنا الراجل ، محترم جداً و مابيفتيش و عنده خبرة فى رينو و بيجو شوية و لما حكيتلو الحكاية قاللى دى بطارية و احتمال محاولاتكو تكون ضربت فيوز ولا حاجة و دا اللى خلى البطارية الجديدة ماتقومش العربية أو تكونو جبتو بطارية بايظة أصلاً ، راح جايب معاه واحدة جديدة كورى كدة مش فاكر اسمها و 70 امبير و شال الجديدة اللى أنا جبتها و أول ما ركب بتاعته هوا ، بجرب ، مفيش برضه ، استنيت شوية كده زى ما قاللى بشمهندس محمد نبيل عشان الموتور يلقط من المفتاح و جربت....أخييييييييييييييييراً قامت من النوم العميق ، بعد 3 أيام من اللف حوالين نفسى بسبب مجموعة صنايعية ضايعيين مش عايزين حتى يشحنو البطارية و يعترفو انهم مش فاهمين حاجة أو عايزين يفتحو لنفسهم شغل و خلاص ، و بسبب شوية سوء حظ برضه ان البطارية الجديدة اللى جبتها طلعت بايظة و دا نادر جداً......ده اللى حصل معايا بالظبط و اسف للاطالة أنا بس حاولت أقول التفاصيل كلها عشان لو حد مبتدئ زى فى العربية دى و اتعرض لنفس الموقف ، يبقى عارف المفروض يعمل ايه و لو اتزنق يسأل مين ، و ربنا يسترها عليكم جميعاً....

[hamaka]

العفو يا باشا :)
ده بس من ذوقك

و الحمد لله إنها طلعت بطارية

الحمد لله يا باشا انها جت على أد كدة و الفضل يرجع بعد ربنا طبعاً للناس اللى لما احتجتهم لقيتهم :)

[MuhamedNabil]

يا جماعة أنا عامل الموضوع دا عشان أوجه فيه شكرى للرجالة اللى وقفوا معايا لما اتزنقت و كلمتهم ، أحمد عادل باشا عشان لما كلمتو مابخلش عليا بالنصيحة و دلنى على أكثر الناس احتراماً بشمهندس محمد نبيل اللى أنا صدعتله دماغة بمكالماتى لحد الحمد لله ما مشكلتى اتحلت ، بجد ناس فى منتهى الاحترام و الجدعنة اللى فى الدنيا ، و مش عايز أنسى طبعاً مهاب باشا عادل اللى لو كانت معايا نمرته كنت جريت عليه و كلمته هو كمان عشان عمره ماتأخر عليا فى أى سؤال سألتهوله ، بجد ربنا يكرمكم جميعاً و أتمنى أنى أشوفكم فعلاً و أشكركم وجهاً لوجه.....

و الله انت مكبر الموضوع :)
بس ده من ذوقك و لانك لا تقل احترام عن الناس الشكرتهم
و انشاء الله يكون لينا لقاء و ربنا يوفقك فى امتحناتك

[hamaka]

و الله انت مكبر الموضوع :)
بس ده من ذوقك و لانك لا تقل احترام عن الناس الشكرتهم
و إن شاء الله يكون لينا لقاء و ربنا يوفقك فى امتحناتك

يا باشا تسلم دا بس من تواضعك انت :) ، و ان شاء الله أشوفكم على خير بعد ما ربنا يكرمنا فى الامتحانات ان شاء الله