رابطه حاجزي الجميله citroen c- elysee

[zooma2009]

انا روحت النهارده فرع العجوزه وحجزت مع الاستاذ جورج خلاص الحمد لله ودفعت 1000 جنيه حجز

وسألته لو عايز اشوف الالوان على الطبيعه قالي تعالي الاحد او الاتنين الجايين وهتلاقي كل الالوان موجوده وقت ما الناس بتستلم

الرابطه زادت واحد كمان اهو يا مسهل هههههههه

الف مبرووكط يا باشا .... والرابطه نورت .... يارب تستلم علي خييير

اعتقد الشامبيين عليها هيبقي تحفه برضه والابيض كمان ملوش حل

[الجنرال]

السلام عليكم ورحمة الله وبركاته

النهاردة كنت فى المعرض فرع العجوزة وشفت العربية هناك واقفة زي الاسد .. بجد عجبتنى جدا جدا

اهم حاجة شدتنى ليها ... طبعا غير الفخامة والشكل الجميل والامكانيات الحلوة (انا كنت متخيل نفسي سايق العربية باصراحة :d )

اهم حاجة شدتنى ليها هي الوسع بتاع الصالون .. بجد انا حسيت ان العربية واسعة قوي قدام وورا .. بجد كان في مسافة كبيرة بين رجلي وبين الكرسي الامامي

لكن بصراحة زي ما في حاجات عجبتنى .. في حاجات بجد قفلتني من العربية .. لكن برضه حاسس انها تستاهل المخاطرة

1- اول حاجة حسيت ان المواد الخام بتاعت تصنيع العربية كانت مش مزبطة قوي .. يعنى حسيتها بلاستيك اكتر من اللازم ... زي مثلا الشبكة الامامية بتاعت العربية حسيت انها بلاستيك اكتر من اللازم وكانت هتتكسر فى ايدي (كنت فاكر ان الكبوت بيتفتح من قدام بالمفتاح زي الفورد قبل ما اعرف ان ليه يد تفتحه من داخل العربية الاول)

2- التقفيل بشكل عام .. حسيت كأن واحد جاب صاج حديد وحشاه حاجات مترتبة كويس .. يعنى مثلا الكبوت بتاع العربية مفيهوش بطانة داخلية من جوه مثلا .. الباب حسيت انه مش بيقفل الا بعد ما تزقه جامد شوية مش مثلا زقه خفيفه وتلاقيه اتقفل كويس (حاولت ثلاث مرات نقفله وفى الرابعة زقيته جامد شوية فقفل كويس) .. ولاحظت ان ده فى باب معين مش كل الابواب مثلا

فانا بشكل عام حاسس ان العربية كويسة ومتينة .. لكن برضه عندي احساس انها كانت محتاجه اهتمام شوية .. مش عارف مجرد احساس مش هعرف اشرحولكوا


انا طبعا مستنيها بفارغ الصبر .. لكن للاسف عندي خبر مش كويس وانا مضايق بسببه .. ان الناس اللى حجزوا وقالولهم الاستلام فى اخر مايو .. احتمال (واحتمال لأ) يتأجل التسليم لحد نص يونيو ... الله اعلم بس ده كلام اتقالي هناك

الله المستعان

[koj@k]

بالنسبة للشبكة :

كل العربيات بتبقى بلاستيك

بالنسبة للبطانة الداخلية للكبوت :

فيه عربيات كتير معدية ال 200 ألف , مفيهاش عزل


لازم تحط في ذهنك إن دي عربية بـ 110-130 ألف
إنت تلاقيك بس اتفرجت على باقي موديلات citroen :)
أنا برده لما اتفرجت عال DS5 وال C4 في المعرض , حسيت إنها مش زيهم
بس لما ركبت rio و صني و الكلام ده , عرفت اد إيه هي كويسة

بالنسبة للباب اللي بيعصلج ده :

ما تنساش إن دي عربية عرض , يعني الباب ده أكيد اتهري ترزيع و فتح وقفل
خصوصا إن العربية عليها اقبال وناس كتير رايحة تتفرج

[الجنرال]

بص انا قلت انه مجرد احساس ... يارب يبقى غلط لما نستلم العربية

عموما انا مكمل ان شاء الله وهاجيبها . انا مهما كان مش هلغي العربية تماما من دماغي بسبب الشبكة ولا الباب الي مش بيتقفل كويس ... ربنا يسهل ان شاء الله

[miceg]

أخشى ما أخشاه يأخي جنراال
القصة ان في ناس بتقبل الريسك وبتجيب العربية بسعر يكاد بيزيد بعد تجربة الناس
بمبلغ مش أقل من 5:10 الاف جنيه
فاللي جازف وفر مبلغ كان هيدفعه بسبب الاقبال الكبير على السيارة
وفنفس الوقت ممكن ياخد مقلب فعربية متعملش عليها ريفيو فعلي نهائي
وانا حاليا معايا صني 2010 اوتو ومريحاني
وفنفس الوقت نفسي اركب حاجة زيرو
وبالذات لما تكون عربية جديدة اول إنتاج
فقدامي اختيارين
سكودا رابيد مشكلتي معاها انها مانوال فقط
ستروين سي اليزيه مشكلتي معاها اني خايف اندم واترحم على الصني

[الجنرال]

في الحالة دي صلي استخارة وتوكل على الله .. ملهاش حل تاني

[megop6m]

على فكرة كنت امبارح في فرع العجوزة وكان في ناس بتستلم العربية قدامي ، يعني الدفعة الأولى في ناس استلمت بالفعل.

[Karim Hegab]

انا حجزت العربيه فى مصر من اسبوع من فرع العجوزه ... و علشان ظروف عملى فى جده حاولت انى اشوف العربيه واختبرها بنفسى ... طبعا انا مقتنع بالعربيه جدا ... و حجزت عن افتناع بيها فعلا ...
انا حجزت اللون الاسود هاى لاين ... طبعا اللون من بره جامد جدا جدا و عليه طبقه مرايا غير عاديه مخلى العربيه فعلا تشدك كاللون اسواد و درجه اللمعان ... العربيه فعلا فخمه و عاليه و تحس ان هيا مش بالسعر ده خالص ...
نيجى من الداخل ... الكرسى بتاع السواق فعلا واسع ومريح تحس انه محتويك ... شغلت العربيه مالهلش حس خالص .... شغلت المكيف ماحستش انه ضاغط على الموتور مع ان العربيه واقفه ... شكلها من الداخل مع السيلفر جميل وشيك ... والمسند مع وسع الكرسى مخليك قاعد مرتاح ... المعرض ورانى هيا مقفله من تحت ازاى وورانى تقفيل الموتور ... الصراحه تحفه ... كان كل كلامنا ميين اللى يروح يجيب تويوتا متقفله فى تايوان و جده ويسب عربيه زى دى ؟!! على العموم العربيه فعلا هاتنتشر بشكل كبير لان فيها مميزات مقابل سعر يعتبر منافس ... غير ان توكيل سترويين فى جده بداء ينافس بالعربيه بشكل كبير ... خصوصا ان اكبر منافس فى السعوديه هيا تويوتا بس التقفيل بتاعها فى جده لكل الموديلات ... وده بداء يظهر فى عيوب التقفيل للعربيات التويوتا خصوصا التقفيل الخارجى ...

[MoHaMed HaMeD]

انا عايز اجيبها بس ع شهر 7 كده بس خايف السعر يزيد ايه الحل بقى

[sohbamody]

الحمد لله حجزت C-Elysee Exclusive اللون الشمبين ومقدم الحجز 1000 جنيه
من عز العرب بس كل الى قالوه قبل متيجى العربيه بأسبوع هنكلمك عشان تجهز الاوراق المطلوبه
الفكره بقى ليه مش عارف حاسس ان العربيه هتتأخر عن معاد التسليم فى اخر شهر يونيو

[Samy90]

انا عايز اعرف بقدر اشتريها بالتقسيط البنكي ولا كاش بس ؟ او فيه نظام تقسيط مباشر من عز العرب ؟
تاني حاجه عايز احجز عالاسبوع الجاي هينفع ولا خلص الحجز فالدفعه بتاعت نص يونيو ؟ شكرا ^^

[asuity]

نرجع تاني لنفس السؤال .. احنا كام واحد الى الان؟

[Honda_lover]

انا عايز اعرف بقدر اشتريها بالتقسيط البنكي ولا كاش بس ؟ او فيه نظام تقسيط مباشر من عز العرب ؟
تاني حاجه عايز احجز عالاسبوع الجاي هينفع ولا خلص الحجز فالدفعه بتاعت نص يونيو ؟ شكرا ^^

ممكن تشتريها بتقسيط بنكي من اي معرض

[Samy90]

انا حجزت اليزيه كمفورت انشالله التسليم فالنص التاني لشهر 6

[asuity]

[QUOTE=Samy90;3875020818]انا حجزت اليزيه كمفورت انشالله التسليم فالنص التاني لشهر 6[/QUOTE

الف الف مبروك يا باشا وتستلم على خير ان شاء الله .. اختيار موفق
ما شاء الله العربية عليها اقبال كبير هي والبيجو 301 وده في صالحنا عشان توافر قطع الغيار