ايهما تختار؟؟ اليزيه ولا 301؟؟

[الجنرال]

ايه رأيكوا؟؟


استنى شهر واخد الاليزيه اللى شكلها عاجبنى قوي .. ولا اخد ال 301 دلوقتى واهو اسم بيجو والتوكيل الجديد (متولي .. وجيه اباظة بخ خلاص) هيزبط العربية وكده ... وفي نفس الوقت الاستلام حالا دلوقتى

ايه رأيكو؟؟

[m_am]

هي ال 301 حضرتك نزلت ؟؟؟ طيب نزلت فين و اسعارها ايه و الفئات الموجوده ايه ؟؟ و حسيت بفارق بينها و بين الأليزيه ؟؟

[الجنرال]

ال301 ليه جاية فى معرض بيجو جنب البيت عندي .. الراجل جايب منها خمسة .. اسعارها:

مانيوال 108 الف
اول فئة اوتو 125 الف
هاي لاين اوتو 135 الف

والاستلام دلوقتى هات الفلوس وشيل يا معلم العربية

مفيش اى فرق نهائي نهائي بتاتا البتة بين الاتنين .. نفس كل حاجة حتى من جوه .. حتى مسند الايد .. كل حاجة بالحرف هيا هيا .. بس اختلاف الشكل الخارجي وانها بيجو

[m_am]

اممممم , بس انت بتقول مش تبع اباظه ؟؟ امال البيجو بقت مع مين ؟؟ و فين المعرض ده حضرتك ؟؟

طيب لما هي نفس كل حاجه مزود في الأوتو 5 الالف ليه ؟؟ اكيد هو عارف ان الأليزيه موجوده بكام و لا بيلعب عن انك مش هتستني حجز ؟؟

[HOSSAM99]

الأتنين واحد لكن توكيل بيجو أفضل بكتير من توكيل تروين و سوق بيجو أعلي (ثقافة شعب ليس إلا)
لكن مع إني بحب بيجو أكثر من ستروين لكن الأليزيه شكلها أحلي شويه (أذواق) لكن في المجمل الأتنين ثفقه رابحه جدا كقيمة و أمان مقابل الفلوس
لو البيجو شكلها عاجب حضرتك توكل علي الله أسم بيجو هو الأصل

[الجنرال]

لا هو بيلعب على اسم العربية نفسه .. بيجو في مصر منتشرة اكتر من السيتروين

[M I D O]

اليزية

[hamaka]

الاتنين ممتازين لكن مع أفضلية للشكل فى الايليزيه (الشكل أذواق فى النهاية)

[الجنرال]

انا ميال اكتر للاليزيه كشكل بصراحة

لكن .. تعالو نقارن بشكل تانى

التوكيل ... انهي احسن فيهم؟؟ (عايزين معلومات اكيدة عن الوكيل الجديد ده)
الصيانة ومراكز الصيانة .. بما ان قطع الغيار هتبقى واحدة فى الاتنين .. يبقى انهي وكيل عنده مراكز صيانة احسن؟؟
كاسم فى السوق .. برضه بما ان العربيتين زي بعض فى كل حاجة حتى فى الشكل والتصميم الداخلي .. يبقى انهي عربية اللى اسمها شغال فى السوق اكتر؟؟

علشان كده .. العقل بيقول البيجو افضل .. لكن القلب مع الشكل الجامد بتاع السيتروين

[hamaka]

و أفضلية للسعر طبعاً ، بس ههتتعكس بنفس المقدار فى اعادة البيع على معايير السوق الحالى (307 مستعملة مثلاً أغلى من السى 4 فى المتوسط ب 5-7 ألاف فى حالة تساوى الحالة و دى عربيات فئة أعلى من 160000 ) الا بقى لو الايليزيه حققت انتشار ساعتها هيبقوا زى بعض فى اعادة البيع

[hamaka]

وكيل بيجو طالما جديد زى ما بتقول يبقى زى البطيخة و هتخاطر ، لو مش مستعجل ممكن تستنالك كام شهر و تتابع مع الناس فى قسم بيجو باستمرار و تقيم أداء التوكيل كويس، لو تمام ممكن تجيب البيجو

[Honda_lover]

عن نفسي بحب الستروين وميال ليها اكتر مع ان الشركة واحدة بس دايما الستروين اعلي فالكماليات من البيجو لنفس الكاتيجوري باستثناء الاليزيه وال 301 باقي الموديلات والكلام ده من زمان ملاحظه

[m_am]

مدام وكيل جديد و الله اعلم امكانياته الفنيه و البشريه عامله ايه , و نفس العربيه بس زياده 5 الاف عشان اسم بيجو اعتقد دي حاجات لصالح الستروين لأن في الأخر كلنا عارفين و متأكدين ان العربيتين تبيكل و ممكن يكونوا خط انتاج واحد في الأخر واحده بيتحط عليها الأسد و التانيه علامه الستروين , فشخصيا افضل حاليا الأليزيه , ربنا يسهل النهارده مواعيدي تظبط و اعرف اروح معرض العجوزه اشوفها و احجز لو في نصيب ان شاء الله

[hamaka]

مدام وكيل جديد و الله اعلم امكانياته الفنيه و البشريه عامله ايه , و نفس العربيه بس زياده 5 الاف عشان اسم بيجو اعتقد دي حاجات لصالح الستروين لأن في الأخر كلنا عارفين و متأكدين ان العربيتين تبيكل و ممكن يكونوا خط انتاج واحد في الأخر واحده بيتحط عليها الأسد و التانيه علامه الستروين , فشخصيا افضل حاليا الأليزيه , ربنا يسهل النهارده مواعيدي تظبط و اعرف اروح معرض العجوزه اشوفها و احجز لو في نصيب ان شاء الله

ده كلام مظبوط جداً ، اللى عايز ينجز دلوقتى فى حاجة منهم يبقى سيتروين ، اللى مش مستعجل و ممكن يستنى يبقى يقرر بعدين بس طبعاً معاه مخاطرة ارتفاع الأسعار..

[Hosam_Optrawy]

طيب هل العربيتين نفس الكماليات والتجهيزات فى الفئتين ؟