التقرير الشامل للستروين C-Elysee بالصور

[islam.3bada]

بسم الله الرحمن الرحيم
(بعتذر مقدما عن اى تقصير او سهو يقد يشوب مضمون التقرير او الصور فى جودتها او المعلومات فى نقصها)

البداية شهر مايو 2013 , رحلة البحث عن سيارة فى الفئة السعرية ما بين 100 الى 140 الف جنيه , الاختيارت واضحة ( اوبترا , نيسان صنى الشكل الجديد , اكسنت , كيا ريو " سيتروين اليزيه / بيجو 301 )

اسبوع من التنقل بين التوكيلات و المعارض للمعاينة و المفاضلة بين السيارات على ارض الواقع مع التسلح باكبر قدر ممكن من المعلومات عن كل سيارة قبل المعاينة بالاضافة الى الخبرات الشخصية فى تجربة بعض السيارات السابق ذكرها ..

بنهاية الاسبوع كانت النتيجة محسومة لصالح الاليزيه و بقوة و بدون تردد .
28/5/2013 حجزت العربية من عز العرب فرع العجوزة بمبلغ 500 جنيه .


مرورا باحداث كثيرة تسببت فى تاخر الاستلام بعضها من طرفى و البعض الاخر من جانب التوكيل .تم الاستلام بحمد الله يوم 2 ديسمبر 2013 فئة الـ exclusive لون فضى. (محدش يستغرب طول فترة الانتظار , الغاوى يستنى .. مفيش عربية تانية قدرت تملى عينى


نبدأ بالشكل الخارجى و بعض البيانات الفنية العامة :







[COLOR="rgb(160, 82, 45)"]استكمالا للشكل الخارجى , العربية بتيجى بجنط 15 الومنيوم ( فئة الهاى لاين ) ده شكله : [/COLOR]


[COLOR="rgb(160, 82, 45)"]بيانات السيارة :[/COLOR]
الطول : 4427 مم
العرض 1748 مم
الارتفاع :1466 مم
الخلوص الارضى : 140 مم فى اقرب نقطة الى الارض
قاعدة العجلات : 2652 مم ( الاكبر فى فئتها بلا منازع )

موتور السيارة 1600 cc بقوة 150 نيوتن /متر عند 4000 لفة /دقيقة و 115 حصان عند 6050 لفة /دقيقة . الموتور تم تصنيعه مطابقا لاشتراطات يورو 5 الخاصة بالانبعاثات .( هو نفس موتور بيجو 307 و ستروين سى 4 بعد تعديل رأس الموتور و الكامات لزيادة القدرة الحصانية )
- سعة التنك 50 لتر .
- 0 - 100 كم / ساعة فى 9.4 ثانية للمنيوال
- 0 - 100 كم / ساعة فى 10.8 ثانية للاتوماتيك



الفتيس : اتوماتيك ستيب ترونيك أربع نقلات مع وضعى الاسبورت مود للقيادة الرياضية ( S) ونظام السير على الاراضى الزلقة و الجليد ( * )








يُتبع.

[islam.3bada]

نيجى بقى للعربية من الداخل :
العربية مريحة فى قعدتها تعطيك احساس بالتمكن من السيارة . زوايا الرؤية جيدة جدااا , جميع الازرار فى متناول اليد و سهل الوضول اليها , يمكن التحكم فى ارتفاع عجلة القيادة
و التحكم فى ارتفاع كرسى السائق يدويا


المرايا الجانبية حجمها مناسب والرؤية بها جيدة جدا و يتم طيها لاعلى




العربية من الداخل واااااااااسعة , بالمعنى الحرفى للكلمة فى الامام و الخلف , و ده مؤشر كويس لجودة التصمصم و حسن استغلال الزوايا و المساحات لان العربية حجمها الخارجى لا يوحى بتلك المساحة




- الشنطة و دى اللى كانت بالنسبة ليا مفاجأة كبيرة الصراحة من وسعها اللافت للنظر اول ما تشوفها 506 لتر أكبر سعة صندوق امتعة فى فئتها و جيرانها و جيران الجيران



-اضائة الشنطة

الشنطة من الداخل بعد طى الكنبة الخلفية:


- الاستبن و بداخله الكوريك , مفتاح العجل , القاطرة و مفتاح فك غطاء مسامير الجنط



امكانية طى المقاعد الخلفية و تقسيمها 1/3 و 2/3 لزيادة مساحة التخزين بالشنطة



- مستوى التقفيل جيد جدا و هو سمة عامة فى السيارة ,كمثال تقفيل ظهر الفانوس الخلفى




يُتبع

[islam.3bada]

تجهيزات السيارة :

- فرامل ABS & EBD
- 2 ايرباج للسائق و الراكب الامامى مع امكانية اغلاق الايرباج للراكب الامامى



مع امكانية غلق ايرباج الراكب الامامى



-كمبيوتر رحلات لحساب المسافة المقطوعة و متوسط السرعة و متوسط استهلاك الوقود و المسافة المتبقية حتى نفاذ تنك الوقود
بالاضافة الى التنبيه بمعاد الصيانة و المسافة المتبقية حتى اول صيانة قادمة





- حساسات ركن خلفية , يظهر على الشاشة عند وضع عصا الفتيس على وضع (R) مكان الحاجز المقترب من العربية اثناء الرجوع مع تنبيه صوتى يعلو كلما قلت المسافة



-ذراع مالتى فانكشن خلف المقود للتحكم فى وظائف الصوت والكاسيت و الرد على المكالمات



- فوج لايت امامى و خلفى ( الفوج الخلفى لمبة واحدة فقط فى الفانوس الشمال )



-مرايات جانبية كهربائية
- التحكم فى مستوى ارتفاع الاضاءة الامامية
- امكانية فتح الشنطة من الداخل و من الريموت



- 4 زجاج كهرباء مع امكانية التحكم فى غلق النوافذ الخلفية


ازرار الزجاج الخلفى



[

يُتبع

[mohamed hussei]

الف مبروك ياباشا علي التقرير والعربية كنت مستني التقرير كان مطلب شعبي

[islam.3bada]

- نور ستوب ثالث علوى



- سنتر لوك
- ايموبليزير
- باور كهرباء
- اريال سقفى
- مفتاح ريموت




- عجلة القيادة مكسوة بالجلد




- مسند يد جلد




- USB
- AUX





- Bluetooth
- كاسيت CD مدمج بالتابلوه + 4 سماعات















يُتبع

[abohend]

تقرير يفتح النفس

تقرير بسم الله ما شاء الله يفتح النفس
مش ينزل كام صورة من عالنت و يقولك تقرير
ألف ألف مليون مبروك-بارك الله لك فيها و جعلها عونا لك على طاعته
في إنتظار البقية
شوقتنا بأسلوبك و جمال تقريرك
بس موضوع السبع شهور ده بالنسبة لي لغز
أنا بقالي شهرين حاجز بيجو 301 و خلاص هيجرالي حاجة
لدرجة بدأت أدور على عربيات في نفس الفئة السعرية بس يكون إستلامها فوري

بس الصراحة فتح نفسي و خلاني أقول (اللي يصبر ينول)

[hossam_elwani]

الف مبروك عليك عربيه مميزه

[islam.3bada]

- تكييف ديجيتال مع اضافة مفتاح A/C Max ليعمل لجعل التكيف يعمل باقصى طاقة ممكنة للكمبروسور و زيادة سرعة المروحة للحد الاقصى للحصول على تبريد سريع للكابينة بضغطة واحدة





- حساسات ركن خلفية = Parking sensor =


-عدادات السيارة




صور عامة للسيارة من الداخل :
- الباب الامامى


- الباب الخلفى


- نور الصالون



- فتحات التكييف الموجهة للزجاج الجانبى لازالة الضباب


- درج التابلوه : مساحة كويسة , عميق جدا للداخل و به مستويين الاعلى للاوراق و المستندات و الاسفل و هو الجزء الاكبر لباقى الاغراض


- الكتالوجات





يُتبع

[islam.3bada]

- ذراع المساحات و به زر التحكم بكمبيوتر الرحلات


- ذراع الاشارات و النور و الفوج لايت










- السماعات الخلفية






- زرار امان للاطفال بالباب الخلفى فى وضع المغلق لا يمكن فتح الابواب الخلفية من الداخل الا بعد الضغط على مفتاع السنتر لوك فى الامام




يُتبع

[islam.3bada]

التجربة و الاداء :


استلمت السيارة من الوكيل عز العرب فرع العجوزة و العداد عامل 32 كم و هى المسافة من فرع ابو رواش الى فرع العجوزة . تنك البنزين كان فااضى مفيهوش ولا شرطة بس لمبة البنزين غير مضاءه. اتحركت للبنزينة و فولت العربية اخدت 43 لتر تقريبا و التفويلة التالية كانت بعد قطع مشافة 470 كم تقريبا , لو استقطعنا الـ32 كم اللى مسجلين بالعداد هيبقى تقريبا التفويلة عملت 430 كم ( منهم 150 كم طرق سفر ) و ده رقم كويس جدا على عربية لسه بتلين . (الارقام تقريبية غير دقيقة لاعتمادى على الذاكرة )

رخصت و اخدت النمر فى نفس اليوم الحمد لله .
و دلوقت الحكم على العربية بعد اول 1000 كم :

- الموتور جيد جدا اداؤه بيقول ان عنده كتير لسه هيقدمه و ده هيبان قدام بعد التفتيح ان شاء الله لكن التسارع جيد جدا صوته لحد 4 RPM معقول .
العربية بتتاخر ثانية كدا فى الكيك داون فى البداية لكن مع استمرار الضغط على الدواسة , ما شاء الله بتتحول , تجميع ممتاز و الفتيس نقلاته سريعة و تدريجها ممتاز و بتحافظ على عزم العربية من غير اهدار كتير منه بين كل نقلة و التانية وده ملاحظ فى هبوط عداد الـ RPM بين كل نقلة و التانية اثناء الكيك داون و دى نقطة تحسب ليه . بالنسبة للاحساس بالنقلة بين الاول و التانى اللى الناس اتكلمت عليه و هسميه احساس بالنقلة مش نتشة لانها لا ترتقى لمستوى انها تكون نتشة هى فقط احساس بالنقلة و بالنسبالى الموضوع يكاد يكون غير ملاحظ لان انا رجلى تقيلة وده مش بيظهر الا لو انت رجلك خفيفة على الدواسة و لا يظهر نهائى اذا نقلت للتانى فى رنج ما بين 2800 لفة الى 3500 لفة فى الدقيقة و ده بيرجع لان الفتيس عزمه عالى و فى المقابل محتاج عزم عالى من الكونور عشان يكون مرتاح فى النقلة .

- الفرامل ممتازة اداؤها كويس جدا و متجاوبة و البدال تحت رجلك تدريجه كويس كعادة فرامل الاوروبى (انا كنت بعانى مع فرامل السيراتو , فرق كبير )


- العفشة و الثبات :
العربية ثباتها كويس , مجربتهاش على سرعات اعلى من 140 لحد الان لكن جربتها فى ملفات ضيقة و مقفولة , اداؤها كويس جدا اقدر اوصفه بانه اداء متزن و العفشة تماسكها كويس و رد فعلها على العربية موزون فى الطرق الغير ممهدة قد تميل الى النشوفية اكتر لكن مضايقش و غير مزعجة و مريحة .

- التكيف معقووول جدا انا جربته ثلاثة مرات لحد الان لكن فى كل مرة كان تبريده كويس و عكس ما جربته يوم ما روحت اتفرج على العربية فى التوكيل اول مرة , العربية اللى جربتها هناك كان تكييفها متواضع اوى معرفش ليه بس عموما اتحسن كتير .

- عزل العربية نقدر نقول انه جيد , مجربتش هيبقى وضعه ايه فى السرعات العالية لكن دلوقتى مرضى تماما محستش بصوت هواء من ناحية باب السائق او بصوت خروشة من الاريال او اى من الاعراض اللى اتكلم عنها بعض ملاك الـ 301 , باستثناء ان صوت الكاوتش على الارض عالى شوية و مسموع الى حد ما وده ممكن يكون لسببين :
الاول انى من ساعة ما استلمت وانا مظبتش ضغط الكاوتش الى الان فا ممكن يكون الضغط زايد وده اللى عامل الصوت ده مع الاسفلت
الثانى و هو ان انا استلمت العربية بكاوتشات جوود يير مش ميشلان زى اول دفعتين و اعتقد و لا اجزم ان اخر دفعة دخلت كلها كده .. وده فى جد ذاته مش مزعلنى لان الميشيلان اللى كان بينزل فيها كان Energy saver وده فرامله كنت مقلق منها و خصوصا ان العربية جنوط 15" مش 16" .
- ملاحظة كدا على جنب الكاوتش عليه شعار " ECO " معنديش معلومات ان كان ده له تأثير على حاجة غير توقير الوقود بس فى المجمل اداؤه فى الفرامل جيد حتى الان
هظبت ضغط الكاوتش و يبقى فى حكم نهائى ان شاء الله .

- الساوند سيستم كويس كا اوبشنز الشاشة اللى فى المنتصف مرضية جدا و فيها شغل كويس معمول و خصوصا مع التحذيرات بتاعة ازالة المفتاح عند فتح الباب و المفتاح بالكونتاكت و عند ترك السيارة على الوضع N بدلا من p


-البلوتوث جميل جدا سهل و عملى فى استخدامه و بيعمل كونكت اتوماتيك بمجرد دخولك العربية لكن يعاب على النظام ككل السماعات اداؤها مش عاجبنى يعنى ممكن نقول مقبول .

- الخامات الداخلية مناسبة و معقولة جدا على الفئة السعرية دى فى عربية بكل الامكانيات دى لكن الصالون الخلفى تحسه مالوش علاقة بالصالون الامامى , الجالس فى الكنبة الخلفية هيحس العربية فقيرة شوية عكس الجالس فى الامام تماما , كانت محتاجة فى الخلف ان مسند اليد او مقبض الباب كان لازم يكون زى مقبض الباب الامامى و يكون فى اماكن تخزين فى الباب الخلفى و نور صالون اضافى خلفى , ان يكون مسند الرأس فى الكنبة بيتحرك و يكون فيها كونسول وسطى ( مسند / حامل اكواب ) عشان تليق بشياكة الجزء الامامى من الصالون .

لكن اجمالا العربية ممتـــــــــــــــــــــــــــــــــــازة كقيمة مقابل سعر و انا متقبل جدا ان فيها حاجات ناقصة لان الكمال لله وحده و لانها مصنفة سيارة اقتصادية فى المقام الاول و انا عارف ده قبل ما اخد قرار الشراء.

تقييمى الحالى بعد اول 1000 كم : راضى تماما عن العربية .
__________________________________________________ _________________

جدول الصيانة الخاص بالسيارة :


أسعار بعض قطع الغيار

(مُقتبس من نايل موتورز )

__________________________________________________ ____________________

ملحوظة ( بعض الصور الخارجية ليست لسيارتى و انما تم الاستعانة بصور من الانترنت , الصور الداخلية هى جميعا لسيارتى )
__________________________________________________ ___________________

للاعضاء اللى حاجزين او اللى لسه هيحجزوا , اللون ده موجود فى اخر دفعة دخلت مصر وهييجى فى الدفعات القادمة ان شاء الله , لون مميز جدا و شيك لو حد حابب يحجزه



__________________________________________________ __________

تم بحمد الله .
تحيات متواصلة للمنتدى و اعضائه الكرام
لحد ما نتقابل فى تقرير اول صيانة ان شاء الله .
__________________________________________________ ____________________________-

[islam.3bada]

يرجى من السادة المشرفين الكرام ادراج المشاركات الخاصة بالتقرير تباعا و ذلك للتسهيل على الاعضاء

شكرا

[islam.3bada]

الف مبروك ياباشا علي التقرير والعربية كنت مستني التقرير كان مطلب شعبي

الله يبارك فيك يا باشا , ان استفدت من الناس هنا كتير و ده جزء من رد الجميل

[islam.3bada]

تقرير بسم الله ما شاء الله يفتح النفس
مش ينزل كام صورة من عالنت و يقولك تقرير
ألف ألف مليون مبروك-بارك الله لك فيها و جعلها عونا لك على طاعته
في إنتظار البقية
شوقتنا بأسلوبك و جمال تقريرك
بس موضوع السبع شهور ده بالنسبة لي لغز
أنا بقالي شهرين حاجز بيجو 301 و خلاص هيجرالي حاجة
لدرجة بدأت أدور على عربيات في نفس الفئة السعرية بس يكون إستلامها فوري

بس الصراحة فتح نفسي و خلاني أقول (اللي يصبر ينول)

بشكرك على الدعاء الجميل
ربنا يبارك فى حضرتك و عقبال ما نباركلك قريب على الـ 301

موضوع الـ 7 شهور ده مش لغز ولا حاجة
1- لان العربية تستاهل
2- لان انا عملت زى حضرتك بعد فترة و ابتديت ادور على حاجة تانية فى نفس الرنج و كل مرة برجع لنقطة الصفر و ان الاليزيه انسب حاجة بالنسبالى و اجملهم فى السعر ده
بالاضافة الى ان انا لو كنت جبت حاجة تانية و شفت الاليزيه قدامى فى الشارع بعد ما اشتريت كان هيبقى نفسى فيها , يبقى كان ليه من الاول و خدت القرار انى انتظر افضل

_ فصبرا جميلا يا باشا و اللى يصبر ينول زى ما انت قولت

تحياتى

[islam.3bada]

الف مبروك عليك عربيه مميزه

ربنا يبارك فيك يا فندم , متشكر لذوقك

على جانب اخر بقى , لو كنت زودت شوية , انا كنت حاطط الكرروز هاى لاين اختيار اول

ربنا يباركلك فيها

[M.Mankola]

بسم الله ما شاء الله على التقرير

تصدق حبييت العربية اللى معايا اكثر من الاول