أول تقرير مبدأى عن السيتروين ds5

[Abo.Moazz]

السلام عليكم ورحمة الله وبركاتة

إن شاء الله هبتدى معاكو تقرير مبدأى عن السيارة الجميلة سيتروين DS5


أعتذر طبعاً عن تواضع التقرير لأن السيارة إلى الآن لم أسير بها سوى 750 كم .. وطبعاً مازالت فى فترة التليين

نبتدى بالمواصفات التقنية للسيارة

طبعاً الموضوع مشروح شرح مفصل فى الموضوع ده ومش هقدر أشرح أكتر من اللى شرحه

http://www.nilemotors.net/Nile/316701-all-new-citroen-ds5.html

والموضوع ده بارك الله لكاتبه كان مرجع أساسى لى وأنا بشترى العربية

نيجى بقى للتاتش بتاعى

بالنسبة لشكل السيارة الخارجى

السيارة شكلها طبعاً وهم ( أقيمها بـ 9 من 10 )
وسبب عدم إعطائى ( 10 من 10 ) هوه عدم وجود حليات نيكل حول الزجاج الجانبى
لكن فى المجمل السيارة لها شكل مختلف تماماً عن أى سيارة أخرى .. من الأمام مقدمة هجومية ضخمة توحى بالفخامة .. ومن الخلف مؤخرة رياضية بحتة مضاف لها أسبويلر خلفى بلمبة ستوب وعدد 2 فتحة شكمان رياضية




الحليات الكروم الموجودة فى الإكصدام الأمامى وعلى جانبى مقدمة السيارة ملهاش حل




الجنوط الأسبور مقاس 18 بوصة منفردة تماماً تعطى إحساس بالفخامة الشديدة



الزجاج الجانبى والخلفى الملون يعطى إحساس هائل بالخصوصية





السيارة من الداخل


بمجرد دخولك للسيارة تشعر بفخامة الخامات المستخدمة بداية من الجلد الذى يغطى جميع أجزاء السيارة من الكراسى للتابلوه لعجلة القيادة


وختاماً بالحليات الألمونيوم الداخلية من الكنسول الوسطى لمقابض الأبواب الدخلية لعجلة القيادة الغير دائرية بالكامل





الكراسى مريحة جداااااااً .. وكرسى السائق مدعم بسخانات ( لم أجربها بعد ) ومزود أيضاً بمساج لتدليك فقرات الظهر ( حاجة آخر دلع )





المساحة الداخلية واسعة جداً ورحبة لا يعيبها إلا إنخفاض سقف السيارة من الخلف ( أنا مينفعش أقعد ورا .. رقبتى هتبقى متنية )
أماكن أزرار التحكم غريب بعض الشئ لكنه يعطى إحساس بالفخامة واللخبطة .. ( لما آجى أفتح الشباك بتلخبط لمده 3 ثوانى علشان أفتكر إن أزرار زجاج النوافذ على اليمين مش الشمال كالمعتاد )




أداء السيارة
كما ذكرت فى أول الموضوع لم أختبر أداء السيارة بالكامل لظروف التليين
لكن عامةً
- السيارة سحبها أكثر من ممتاز ماشاء الله عليها .. جبت بيها ال 120 وعدد لفات الموتور لم يتجاوز ال 2000 لفة فى الدقيقة .. ومكنتش حاسس إنى ماشى أصلاً

- العزل الداخلى ممتاز .. أنت فى الداخل معزول تماماً عن المحيط الخارجى ومعزول أيضاً عن صوت الموتور المرتفع نسبياً ..( أتمنى إنخفاض صوته بعد الصيانة الأولى )

- ثبات السيارة وتماسكها على الطريق لم يختبر بعد .. ولكن أعتقد إنه أكثر من ممتاز ولكنه أقل من ثبات وتماسك الفولفو S80 ( حبيت أجربه عند دخلة الدايرى من طريق مصر السويس دخلت على الملف على سرعة عالية شوية وتعمدت الإمساك بالمقود بيد واحدة وأنا عارف إن الأسفلت غير مستوى قليلاً فى هذا الملف .. فوجئت بتعويم بسيط فى السيارة ... إعادة التحكم فى السيارة طبعاً كان بسهولة ولكنى لم أتوقع تعويم فى سيارة بتلك الفئة .. عايز بس أأكد إنى بقارن التعويم بالسيارات الأخرى السويدى والألمانى والأوروبى عامة .. ولا أقارن بالكورى

- العافشة ناشفة إلى حد ما بالمقارنه أيضاً بالسيارات الأوروبى كالبى إم والفولفو ( وليس بالكورى )
ولكن موضوع قسوة العفشة تناقص إلى حد كبير بعد تظبيط الكاوتش بالنيتروجين على الضغط الصحيح الموصى بيه وهو ( 33 pa ) للكاوتش الأمامى و ( 32 pa ) للكاوتش الخلفى

- السيارة قيادتها سهله جداً لكن أبعادها الخارجية خادعة قليلاً ... مقدمة السيارة غير ظاهرة تماماً أثناء القيادة ... السيارات القادمة فى التقاطاعات قد تخدعك رؤيتها قليلاً

- ركن السيارة أعتقد سيكون صعب جداً لولا تواجد الحساسات والكاميرا الخلفية التى تمكنك من الرؤية فى مجال أكبر بكثير من 180 درجة ( عند خروج السيارة بالخلف أستطيع رؤية القادم من الإتجاهين بطول الشارع )

- نظام الدخول الذكى للسيارة بدون مفتاح فعال بطريقة ممتازة .. يكفى وضع يدك داخل مقبض السيارة فتقوم السيارة بالفتح تلقائياً .. أو لمس مقبض الباب من الخارج ( وأقصد بلمس ... يعنى لمس .. مش ضغط على زرار .. حيث أنه لا توجد أزار ظاهرة بالمقبض الخاصة بالفتح بدون مفتاح )

- الشنطة الخلفيه مساحتها ممتازة وواسعة .. يعيبها عدم وجود مقبض بباب الشنطة لغلقها منه .. حيث أن باب الشنطة الخلفية ثقيل .. فى بداية تعرفى بالسيارة كنت أقوم بغلقة بالطريقة العادية وأفاجئ أنه يغلق بطريقة عنيفة ... وبعد تعودى عليه إكتشفت أنه يجب الإمساك به حتى يقترب من الغلق لمسافة 30 سم ثم تركه ليغلق من تلقاء الوزن

- النظام السمعى فى السيارة ممتاز ... وللناس اللى سألت عن السماعات فى السيارة فالسياره المعده للسوق المصرى لا يوجد بها سماعات DENON كالموجوده بالخارج ... عددها لا أعلمه بصراحه



- نظام e-way الموجود بالكنسول الوسطى يمكنك من إستخدام التليفون والتحكم بالراديو والميديا والتحكم فى الGPS الغير موجود بالسيارة لعدم توافر خرائط للمنطقة



- السيارة بها نقص رهيب وسوء توزيع لأماكن التخزين .. التابلوة ضيق جداً ولا يتسع لشئ ..




مسند الذراع يوجد به مكانين أحدهما مكيف لوضع المشروبات وهوه شديد الإتساع بدرجه مبالغ فيها



والثانى يوجد به مخرج ال usb و aux والمكان مصمم بغباء شديد حيث أنه لا يتسه لوضع تليفونى به .. حيث أننى لو أردت شحن التليفون عن طريق مخرج ال usb على سبيل المثال يجب ترك مسند الذراع مفتوح وهو شئ غير مريح إطلاقاً





مكان تخزين آخر يوجد بالأبواب ومضون بلمبة حمراء شكلها حلو أوى

مكان تخزين صغير جداً تحت الدركسيون ...



- زعلنى أوى إن العربية مفيهاش حساس لضغط الإطارات

ده كده تقييمى المبدأى للعربية ..

وإن شاء الله تقرير تانى كامل عن أداء السيارة بعد اول صيانة

يارب يكون مستوى التقرير متقارب ولو بنسبة قليلة مع تقارير أعضاء المنتدى السابقة

تم بحمد الله

[m7nsh]

ماشاء الله اللهم بارك .. ربنا يبارك لحضرتك فيها و الف مبروك ..
والتقييم احترافى جدا ومنظم ..

[الجنرال]

ما شاء الله تبارك الله

ربنا يباركلك فيها ويحفظهالك ان شاء الله

الف مبروك .. عربية بجد تستاهل ان الواحد يشتريها

لكن السؤال الاهم .. لازم تمشى ببنزين 95؟؟ ولا ممكن تمشي ب 92؟؟

[ENG.MaRk]

ألف مبروك يا باشا ... عربية ملهاش حل لكن حاسس إن سعرها مبالغ فيه أوي

[wella3330]

تقرير جميل لعربية مميزة

ربنا يبارك لك فيها و يكفيك شرها

[yasser100]

ما شاء الله و الف مبروك . عربيه جميله و انا باعتبرها تحفه فنيه من اجمل ما انتج فى 2014 . الذوق و الجمال الفرنساوى كله فيها . بس نصيحه العربيه دى مش بتاعة بهدله و ﻻ اهانه . انا معاك انه حساسات ضغط الهوا مش موجوده دى تغيظ برضه عندى لما اشتريت الفلوينس و رحت اظبط العجل الواد اللى بيظبطه بيقول لى شوفه كده ظبط عندك على الكومبيوتر فى العربيه قلت له اه تمام ههههههه. مش عارف عربيات بالاسعار دى مش بينزلوا فيها الحاجات دى ليه . و الف مبروك و ربنا يكفيك شرها و تاخد خيرها :)

[Abo.Moazz]

ماشاء الله اللهم بارك .. ربنا يبارك لحضرتك فيها و الف مبروك ..
والتقييم احترافى جدا ومنظم ..

جزاك الله كل خير

ما شاء الله تبارك الله

ربنا يباركلك فيها ويحفظهالك ان شاء الله

الف مبروك .. عربية بجد تستاهل ان الواحد يشتريها

لكن السؤال الاهم .. لازم تمشى ببنزين 95؟؟ ولا ممكن تمشي ب 92؟؟

زيها زى العربيات الحديثة .. يفضل بنزين 95
وأعتقد إن بنزين 92 ده أصلاً إتلغى من العالم كله .. عموماً طبعاً أنا بحطلها 92 ومش حاسس بأى مشاكل
وطبعاً التوكيل بتاعها زى أى توكيل بيقول العربية بتمشى بـ 92

ألف مبروك يا باشا ... عربية ملهاش حل لكن حاسس إن سعرها مبالغ فيه أوي

ياسيدى الفاضل هاتلى حاجة فى بلدك سعرها غير مبالغ فيه ... وبالذات فى العربيات
يعنى الكيا السيراتو أم 197 ألف سعرها مناسب ؟؟ ولا الإلنترا ؟؟؟ ولا .. ولا
هاتلى عربية سعرها فى البلد دى مناسب
العربية سعرها بالنسبة لعربيات تانية فى البلد سعرها غير مبالغ فيه ولا حاجة ... إنما بالنسبة لسعر السيارات العالمى يبقى سعرها مبالغ ومبالغ ومبالغ

تقرير جميل لعربية مميزة

ربنا يبارك لك فيها و يكفيك شرها

الله يباركلك ويرزقك بأحسن منها

ما شاء الله و الف مبروك . عربيه جميله و انا باعتبرها تحفه فنيه من اجمل ما انتج فى 2014 . الذوق و الجمال الفرنساوى كله فيها . بس نصيحه العربيه دى مش بتاعة بهدله و ﻻ اهانه . انا معاك انه حساسات ضغط الهوا مش موجوده دى تغيظ برضه عندى لما اشتريت الفلوينس و رحت اظبط العجل الواد اللى بيظبطه بيقول لى شوفه كده ظبط عندك على الكومبيوتر فى العربيه قلت له اه تمام ههههههه. مش عارف عربيات بالاسعار دى مش بينزلوا فيها الحاجات دى ليه . و الف مبروك و ربنا يكفيك شرها و تاخد خيرها :)

بهدله أيه وإهانه أيه بس .. دانا لولا خايف الناس تقول عليه محدث نعمة كنت أجرتلها أربع رجاله يشيلوهالى وأنا رايح وجاى بيها
والعربية فيها حاجات تانيه ناقصة غير حساسات الكاوتش
يعنى السماعات زى ماقلت مابتنزلش زى اللى بره ( DENON )
-وموضوع النافيجيشن ده خنقنى أوى
-وبرده المفروض فيه أوبشن فى النور الأمامى إن العربية بتظبط شدة الإضائة حسب القادم أمامك ..
-نظام الـ ECO
وحاجات تانية كتير مش نازله فى النسخة المصرية
ولو تلاحظ فى الصورة اللى جاية هتلاقى زراير كتير مكانها موجود بس مش موجوده
وقال أيه حاطين مكان تحط فيه الرخص بدل الزراير ...

[yasser100]

الف مبروك و نصيبنا كده فى المواصفات اللى بتنزل لنا مصر على فكره انت عندك eps .تبقا شغله علشان التعويم ده

[J A G U A R]

تقرير اكثر من رائع لعربيه محترمه
ربنا يباركلك فيها ويحفظهالك

[abdulkhaleq]

اولا الف مبروك وربنا يحميها من العين

ثانيا هل الفئه دي اول فئه ولا تاني فئه؟ (عشان عدم تواجد النظام الصوتي)

هل فيه امكانية فرش داخلي بيج او بني بدل الاسود؟

الزجاج الخلفي معتم ولا معالج ضد الشمس فبالتالي لونه اغمق؟ (زي الجيتا كده)

واخيرا هي ولا فولفو s60 ؟؟ خصوصا كاحساس سواقه ؟؟

[m7mdwagih]

ربنا يباركلك فيها فعلا اختيار موفق

[prooo]

الف مبروووووك ماشاء الله ربنا يباركللك فيها ويديك خيرها ....... واخبار التكييف ايه وبيءثر على العربيه ولا لا ......

[lanos2004]

فين الماتور

[Abo.Moazz]

اولا الف مبروك وربنا يحميها من العين

ثانيا هل الفئه دي اول فئه ولا تاني فئه؟ (عشان عدم تواجد النظام الصوتي)

دى تانى فئة الـ sport ( وهوه أيه النظام الصوتى ده ؟ )

هل فيه امكانية فرش داخلي بيج او بني بدل الاسود؟

أسود فقط لا غيرررررررررررررررررررررر

الزجاج الخلفي معتم ولا معالج ضد الشمس فبالتالي لونه اغمق؟ (زي الجيتا كده)

الزجاج الخلفى معتم

واخيرا هي ولا فولفو s60 ؟؟ خصوصا كاحساس سواقه ؟؟

أنا لسه مختبرتش إحساس السواقة الحقيقى للسيتروين لأنى لسه مسحبتش بالعربية جامد
إنما جربت الفولفو الـ S80 .. وموتورها هوه هوه ال s60
وأعتقد إن إحساس سواقة الـ 180 حصان حاجة كده من الخيال
بس تعمل حسابك لو عايز تشترى إن حالياً علشان تستمتع بالفولفو S60 لازم تجيب على الأقل تانى فئة منها اللى بقت ب 338 ألف ... يعنى فرق أكتر من 40 ألف عن السيتروين
بس برده السيتروين ملهاش حل .. أقصى سرعة جبتها بيها كانت 140 تقريباً .. ومحستش إنى ماشى أصلاً

ربنا يباركلك فيها فعلا اختيار موفق

جزاك الله كل خير

الف مبروووووك ماشاء الله ربنا يباركللك فيها ويديك خيرها ....... واخبار التكييف ايه وبيءثر على العربيه ولا لا ......

ولا الهوا ... التكييف تلاجه ... ومفيش أى نوع من أنواع التأثير على أداء العربية نهااااااااااااااااائى

فين الماتور

الموتور أهو ياكبير

[Abo.Moazz]

الف مبروك و نصيبنا كده فى المواصفات اللى بتنزل لنا مصر على فكره انت عندك eps .تبقا شغله علشان التعويم ده

الـ esp فعال علطول أتوماتيك ... حتى لو لغيته لازم يتفعل تانى أتوماتيك عند تشغيل العربية أو عند زيادة سرعتك عن 50 كم / س