معايا فيكترا 97 ... وبفكر فى الاكسارا 2

[Salamas]

السلام عليكم ورحمه الله وبركاته

من 6 أشهر اشتريت أوبل فيكترا 2 ... بس كان فيها شغل كتير ... والصنايعيه مبيفهموش فيها ومطلعه عينى وخاربه بيتى :d

بفكر ابيعها واجيب بفلوسها أكسارا 2 ... طبعا اللى ركب الالمانى مش هيعرف يركب عربيه أقل مستوى منها

فا كنت عايز أسألكم عن الاكسارا 2 .. قطع غيار - صنايعيه فاهمينها ولا لا ... كويسه كثبات وغيره

واهم شىء اخبار ماتورها وفتيسها الاوتوماتيك ايه من ناحيه العيوب .. لانى سامع ان فتيسها غالى جدا

ولو عربيه تكون حالتها نضيفه ( أوتوماتيك ) تكون فى رينج كام

أسف على الاطاله .. وكل عام وأنتم بخير

[Honda_lover]

العربية كعربية ممتازة جدا جدا كثبات وتسارع وفرامل مع انها مفيهاش abs ولكنها قوية فيها 2 ايرباجز مبتحكش في مطبات زي ال 1 التكييف بتاعها ممتاز اوي وبيتلجك وهو علي 2 المحرك 1600 2 كامة مشترك فيها هي والبيجو 307 والستروين c4 قطع الغيار متوفرة جديد اصلي وتقليد واستيراد محدش يشتغل فيها غير متخصص ستروين وبيجو ودول كتير جدا جدا جدا في القاهرة والاسكندرية فقط للاسف مفيش حد في الاقاليم كويس قطع الغيار معمرة جدا وبالنسبة للفتيس الاتوماتيك كويس ومشاكلة مش كتير بشرط الصيانة الدورية له وللعربية بصفة عامة تمنه استيراد 4500 جنيه
نصيحة :
1- العربيات الفرنساوي مينفعش تتركب متبهدلة لازم تكون رقم واحد.
2- لما تشتريها لازم تكشف عليها بالكمبيوتر عند حد متخصص ستروين بيجو وده طبعا باستثناء الكشف العادي بتاع اي عربية صاج وعفشة وكده.
3- لو حد اشتغل فيها مش متخصص ستروين وخاصة الكهرباء تاكد انك هتركب 128 ويمكن الفيات هتكون احسن لانها مش هتعطل
4- الفتيس بيتغيرله الزيت كل 60000 كم والحساسات بتاعته كل 80000 كم سعر الزيت 130ج*4.5 لتر وسعر الحساسين بتوع الضغط 1000 ج
5- سعر العربيات النضيفة منها 45000-55000 علي حسب الحالة ودي اسعار مويل 2003-2004 وبلاش تركب 2002 منها خليك في الموديلين التانين احسن في كل حاجة.