سيتروين اليزيه 2015

[shahinda11]

صباح الخير :)

انا بس كنت عايزة اعرف رايكم فى سيتروين اليزيه 2015

انا نزلت شوفتها امبارح فى بى اوتو هى و البيجو 301

انا شايفة الاتنين زى بعض الاختلاف فى الشكل بس و السيتروين شكلها من جوة شدنى اكتر حبيت يعنى

بالنسبة للسعر: الستروين عاملة 126000 و البيجو 133000

و انا كنت عايزة حاجة متزيدش عن 130000 و تكون الاوبشن و الامان بتعتها كويسين بس بردو مش عايزاها تبهدلنى دى اول عربية هجبها فهل ستروين اختيار كويس بالنسبة لبنت؟


و هل فى حد جابها موديل 2015

و بالنسبة للصيانة و التوكيل و قطع الغيار ايه نظامهم؟

[ENG.MaRk]

عربية كويسة و كمالياتها و أمانها معقولين و أعتقد إنها مناسبة لحضرتك يا فندم لكن توكيلها بعافية شوية لكن هي ككل أحسن من البيجو

[amr011111]

العربيه كويسه بس نادرة يعنى قليل لما بتشوفيها فى الشارع. رغم انها اول لما نزلت كانت بـ 115 الف جنيه وكاوبشن وشكل عربيه محترمه جداً لكن انصحك تجيبى سوزوكى سياز افضل وبالتوفيق

[shahinda11]

عربية كويسة و كمالياتها و أمانها معقولين و أعتقد إنها مناسبة لحضرتك يا فندم لكن توكيلها بعافية شوية لكن هي ككل أحسن من البيجو

يعنى ايه توكيلها بعافية

[shahinda11]

العربيه كويسه بس نادرة يعنى قليل لما بتشوفيها فى الشارع. رغم انها اول لما نزلت كانت بـ 115 الف جنيه وكاوبشن وشكل عربيه محترمه جداً لكن انصحك تجيبى سوزوكى سياز افضل وبالتوفيق

اول مرة اسمع عن سوزوكى سياز دى هشوفها كدة ميرسى جداا :)

[bigwarrior]

انا معايا اليزيه 2014 ومع زوج اختي كمان والعربيه جميله جدا والتوكيل بصراحه كويس وناس محترمه

[ENG.MaRk]

يعنى ايه توكيلها بعافية

يعني توكيلها غلبان و آخره الصيانات الدورية لكن لو ظهرت فيها مشاكل مش هيعرف يعمل حاجة و لكن هي ككل عربية حلوة و مفيش فيها مشاكل :)

[bassem.aly]

السلام عليكم
انا معايا بيجو 301 موديل 2015 عاملة 16000 و الحمد لله كويسه و مفيش مشاكل غير ان التوكيل زحمة و لازم تحجزى قبليها و يوم تكونى فاضية
المهم الاليزية و 301 هما زى بعض باظبط لانهم خارجين من مصنع واحد فى اسبانيا الاختلاف الوحيد فى العلامة و الفوانيس لكل الماتور و الفتيس و الاوبشن و ضفيرة الكهرباء و العفشة و المساعدين زى بعضه
301 موديل 2016 بـ 130000 هاى لاين و الاليزيه 2016 ارخص لقلة الطلب على علامة السيتروين و ليس لسوء العربية
بس فى نقطة البيجو 301 هاى لاين جنوط 16 و الاليزيه هاى لاين جنوط 15
و ربنا يكرمك و يوفقك لما فيه خير لكى.

[scientist9508]

بسم الله الرحمن الرحيم

أختنا الفاضله شاهنده

أشهد أننى لم أسمع شكاوى من ملاك السيتروين سى إيليزيه سزى أن نقلات الفيتيس الأوتوماتيك غير منتظمه و لكننى قرأت أكثرمن مره عن شكاوى فى منتهى الخطوره من ملاك البيجو 301 آخرهم هذه الشكوى المصوره و المنشوره على هذا المنتدى

http://www.nilemotors.net/Nile/459295-301.html

و أكرر أننى لم أسمع أى شكاوى مماثله من ملاك السيتروين سى إيليزه و لكن بما إن السيارتين خارجتين من نفس المصنع و أن كلاهما سيارة واحده مع إختلاف العلامه التجاريه فأنصحك أن تعيدى تقييم الموقف.

و أنصحك أن تضعى سيارات أخرى فى إعتبارك مثل السوزوكى سياز و البروتون بيرسونا أو الجين 2 و الرينو سانديرو أو لوجان

هداك الله لأرشد أمرك و أقومه

السلام عليكم و رحمة الله و بركاته

[ehabomar1987]

الكيا ريو الخليجي اول فئة اوتو ب 124 الف فكري فيها

[arc_sherif_81]

الاثنين زي بعض
بس البيجو هتبقي افضل في الانتشار و بالتالي اعاده البيع

[arc_sherif_81]

البيجو 130000 مش 133000