موتور جديد

[Ahmed Mubarak]

السلام عليكم
اخوانى الاعزاء انا شكلى كدة رايح فى موتور
فى الاول كنت رايح شغل فى العاشر من رمضان المهم العربية سخنت وكدة سبتها شوية وزوت مياة وكدة المهم المروحة مش عايزة تشتغل خال لكن شغالة مع التكيف
المهم سايسة العربية لحد ما وصلت الحرفيين عند محمد ابراهيم الميكانيكى وطلبت منة تغيير الشجرة بتاعة المياة لانها كانت بتنقط بقط بسيطة المهم بص على الموتور وقالى احتمال يبقى جوان وش السلندر وقالى ان غطاء قربة المياة بايظ دا رقم واحد
رقم اتنين ان الفتيس بايظ وعايز اغيرة
تمن الاتنين دول بالمصناعية حوالى 2000 جند

المكنة الاستيراد 1600 انجيكشن 75 حصان بالفتيس بالكنترول بمكنة الباور وكمبروسر التكيف بحوالة من 2700 الى 3000 ( كلة بيتكلم فى 3000 بس وقت التنفيذ الفلوس ليها سحر)

اروح فى مكنة استيراد وابقى ابيع اللى باقى من الموتور براحتى (الدينمو - مكنة الباور - كمبروسور التكييف- اى حاجة باقية فى الموتور ) ولا اصلح

برجاء الافادة لان العربية عطلانة عند الميكانيكى وانا عايز انجز وااقولة صلح او اسقط مكنة

على فكرة الدنيا لسة بخير وانا عطلان عند العبور قبل ماروح للميكانيكى لقيت عربية لانسر اصفر فى اسود وكان فيها اتنين شباب بصراحة رجالة تمام ذى جميع الاخوة فى المنتدى وقفوا وعرضوا المساعدة بجد مش عزومة مركبية بجد انا بحييهم على الحركة دى واتمنى ان دا يبقى سلوكنا كلنا لانه احيانا الواحد بيبقى فى عرض اى حد يساعدة فى المواقف اللى ذى دى

جزاهم وجزاكم الله خيرا

[crazylambada]

بص غير و توكل على الله بس جوان وش السلندر مبيستهلش انك تغير المكنه
و عاوز بقى من حضرتك طلب اسالي الفتيس لوحده عامل كام الله يخليك علشان انا محتاج واحد 1600 بدل ال1300 بتاعي
و المانيوال عامل كام و الاتوماتيك عامل كام

[Ahmed Mubarak]

بص يا با شا
الفتيس المانيوال بيعمل حوالى 550 الى 600 فتيس فقط
ولو هتاخد معاة اسطوانة وديسك وتركيبهم يبقى 1000 جندى
قبل وش السلندر كنت هغيير الفتيس ولما سالت دى كانت الاجابة
ولما حاولت اسال عن الاتوماتيك كل الناس بتقولى فكك منة المانيول افضل

[crazylambada]

بس خلي بالك علشان المكنه ديه انا مسقطها عندي
فيها امبولايزر علشان تتم دوره الدواره للمكنه و ده بيبقى موجود جوا التابلوهمش مع الضفيره
علشان لو اشتريت المكنه تاخد بالك
و متشكرين جدا لحضرتك

[ehab_mansour]

هوممكن تكون مشكلتك مش محتاجه تغيير ماكينة بس للأسف جهل الصنايعية أوقات بيخليك تتكلف في الصيانة نصف ثمن الماكينة الجديدة او أكثر وعشان عندك مشكلة في الفتيس ومش هتتحل غير بالتغيير وعشان كمان عندك الماكينة كربيراتير وبتستهلك بنزين كتيييييير ...... ومشاكل تانية كتيييييييير انت عارفها
فأنصحك بالتغيير أفضل ونصيحة لوجه الله دور علي محرك1400 2 كامة ال 75 حصان هيكون أفضل لأن سمعت من بعض الأخوة هنا ان ال 1400 قطع غياره متوفرة وكتييييييير عن ال 1600 و هيديك نفس الهورس باور مع استهلاك معقول للبنزين بس خلي بالك تجيب المحرك كامل بالتكييف والباور والكنترول والضفيرة وربنا ويوفقك وأنصحك تحاول تسأل او تبع رسالة خاصة للأخ محمد مصطفي تسأله تشوره لأنه لسه مسقط قريبا الماكينة دي في عربيته البولو وهو أخ عزيز مش هيتأخر عليك أبدا في اي حاجه واسمه m.mostafa80 في قسم فولكس وبرضه استني رأي الاخ ibiza هو من أكثر الشخصيات اللي قابلتها هنا سقطت مواتير في بولو وابيزا ويفهم كويس في الموضوع ده والله المستعان

وما تنساش الأول تتأكد انت محتاج ايه تاني لأنك ممكن تحتاج مثلا تغير عدادات كمان وطلمبة بنزبن و عفشة تناسب المحرك الجديد او فرامل ...كده ..... فخلي بالك ادرس الموضوع جيدا عشان ما تتدبسش القصة مش قصة محرك فقط فيه حاجات تانية بتحتاج تغيرها عشان تاخد نتايج مضبوطة من التسقيط

[alzelafy]

يا باشا متدخلش نفسك فى متاهات و تغيير مواتير و كلام من دة غير جوان وش السلندر و هاتلك فتيس لو فتيسك بايظ و لم الدور و شغل المروحه تانى بتاعه التبريد هتلاقى الحساس بتاعها بايظ هو ب 45 جنيه و الفتيس ب 600 جنيه الموضوع مش مستاهل موتور

[Ahmed Mubarak]

شاكر للرد والنصائح
استاذ alzelafy
الفكرة ان انا مصاريف التصليح تساوى تقريبا مصاريف تسقيط مكنة
الفتيس 600
اسطوانة وديسك 350
وش سلندر ( الوش عندى قفع من السخونةذى ما الميكانيكى قال انا مفهمش بس اثق الميكانيكى) 600
المصناعية 300 الى 350
الاجمالى فى حدود 1900 جنية تذيد او تقل
بخلاف ان هناك تأكل فى فى جزء انا مش فاكر اسمة اية بس هحاول اوصفة ( بعد فك وش السلندر فى اربع فتحات دائرية بداخلها اربع اسطوانات تتحرك لاعلى واسفل المهم ان فى اتنين منهم تحت واتنين فى النص فوق الميكنيكى قلى بص وقعد يحركهم وقلى ان المفروض ميتحركوش وميبقاش فيهم بوش وقلى حط ايدك على على اعلى الفتحة من الداخل قلى فى شفة المفروض ان الفتحة بالكامل تكون فى مستوى الشفة وان هناك تأكل فحرام نصلح وندفع قد اللى اقدر اجيب بية مكنة)


الاستاذ ايهاب

الحمد لله انا استقريت على المكنة ال 1600 انجكشن وجيبتها هى بالفتيس مانيول بالضفيرة بالكنترول بطرمبة البنزين يالدينمو بالامبوليزراو طقم تدوير ولكن بدون مكنة الباور وكمبروسر التكييف لتقليل المصاريف شويةغير ان اللى عندى شغالين كويس الحمد لله يعنى جيبت المكنة بكل مايلزم لتسقيطها على 94 ودا كلة عمل معايا 2800 جنية هل دا سعر كويس ولا لأ
بصراحة انا كنت هسقط ال 1400 ذى ما حضرتك نصحتنى بس كان فى واحد هناك عند الميكانيكى وكان مسقط المكنة دى وجاب اخرها وكان بيسقط نفس المكنة تانى وقاللى ان المكنة اداها اكثر من رائع وقطع غيارها متوفرة وموفرة فى البنزين ولو عايز تشد تشد مع التخين وقعد يشكر فيها وقللى ان بيسافر بالعربية كتير قوى بحكم الشغل وهو دا اللى بيخلية يغير مكن كتير
المهم الحمد اللة الميكانيكى هيسقط المكنة النهاردة وهتروح للكهربائى يعنى بالكتير الاتنين او الثلاثاء واستلم العربية والموتور القديم ان شاء الله

[ehab_mansour]

ربنا يوفقك وتنتهي علي خير وتستمتع بعربيتك
بصراحة سعر أكثر من رائع بس كنت غير التكييف والباور كمان عشان تبقي تسقيطة في الجون بس علي قد كده كويس جدا وربنا يوفقك بس أكيد عايز أشوفك ان شاء الله بعد ما تخلص عشان اتفرج علي الشغل واهو نتعرف علي بعض وأجرب 1600 علي الابيزا بالمرة ده بعد إذنك طبعا

[Ahmed Mubarak]

اكيد يا استاذ ايهاب ان شاء الله بعد ما استلم هكلم حضرتك واقبلك لو ممكن رقم حضرتك على الخاص

[Ahmed Mubarak]

السلام عليكم
ان شاء الله احتمال كبير استلم العربية النهاردة بعد تسقيط الموتور
اية اللى مفروض اعملة واشيك علية يريت لوحد يفيدنى لانها اول تجربة فى التسقيط
واذاى اجرب العربية (يعنى اقرص على الموتور ولابراحة ذى التليين)
انا ناوى اكبس الموتور فى البنزينة وبعد كدة هاعدى على الاستاذ ايهاب اخد راية واخلية يجرب ويشوف الدنيا فيها اية
يريت تفيدونى
جزاكم الله خيرا

[crazylambada]

بص مبدائيا تشوف شيكلك على السيور و البوجيهات شوفها بنفسك
شوف المكنه بتسرب زيت و لا لأ
متشيدش بالمكنه غير بعد ما تسخن الاول و اديها حاجه في حاجه
مبدائيا المكنه \يه هي اللي عندي فلو ضغط بنزين غلط حتفرك معاك على الاول و التاني من غير دبرياج
حتعجبك جدا وربنا يوفقك :)
اه جيب منظف كبراتير و خليه ينضفلك البوابه و الرشاشات بالمره و شوف فلاتر الهواء و البنزين يتغيروا و يا سلام لو تجيب فلتر سبور يبقى في الجون
و ابقى طمن بقى

[Ahmed Mubarak]

ان شاء الله هطمنك بسينفع الفلتر الاسبور اللى كان راكب عندى على المكنة القديمة ولا لا

[fadynabil]

مبروك ع التغيير وإنشاءالله تطلع تمام .. بس ياريت تاخد بالك من كل حاجة في الأسبوع الأول وكل يوم تشوف قياس الزيت ..

وكمان تشوف لو في تسريب من أي حته زي ما الشباب سبقتني وقالت

وخد بالك من أي صوت غريب في المكنه و ربنا يوفقك وتطلع مظبوطه ١٠٠٠ الــ ١٠٠٠

و ١٠٠٠٠ مبروك

[ehab_mansour]

ربنا يوفقك أستاذ أحمد وتنتهي علي خير بس من رأيي ان اهم حاجه تاخد بالك منها كويس جدا هو مستوي الزيت وتتاكد انه لاينقص وكمان كفاءة دورة التبريد للسيارة ولا تنقص ايضا مستوي المياة داخلها واستهلاك البنزين تتأكد انه مناسب لقدرة المحرك اللي انت مسقطه وتحاول تقيس كبس الموتور وحاول ايضا تكشف علي المحرك كمبيوتر عشان تتأكد من عمل الكنترول الحساسات بكفاءة وان مافيش مشاكل ..... من الاخر تتأكد ان كل حاجه تخص المحرك تعمل بكفاءة ولا يوجد بها مشاكل وبعد كده تعمل سيرفس كامل للعربية وتنظف بوابة الانجيكشن وعيش حياتك

[crazylambada]

لو انجكشن ممكن تغيره الماسوره بس علشان توصله للاكصطدام بس