عداد ال ار بي ام

[tarekdesign]

سلامة عليكم اولا وشكرا للنصيحة مقدما

عندي عربية ابيزا ٩٨ و ١٠٠٠ سي سي المشكلة ان عداد ال ار بي ام بيطلع وينزل في السلنسية وايضا ام بكون مدي العربية غيار ومش دايس بنزين .

مش عارف احل الموضوع دة ازاي ؟

ولو سمحتم اوصفولي كهربائي كويس ومحترم يكون قريب من شبرا

وجزاكم اللة كل خير

[batros]

بيطلع وينزل والعربية بتبطل ولا بتفضل شغالة

[ehab_mansour]

وعليكم السلام ورحمة الله وبركاته
حضرتك ياريت تقلنا ايه أخر صيانات عملتها للعربية وهل بتعمل الصيانة الدورية في ميعادها ( فلاتر وبوجيهات وتنظيف البوابة ) ولا لأ ؟
ايه أخبار السحب واستهلاك البنزين ؟
الموضوع ده ظهر معاك من امتا بالضبط وايه أخبار الدوارة في الصباح الباكر هل العربية بتدور طبيعي ولا ايه اللي بيحصل ؟
عايزين رد عن الأسئلة دي وبعدين ربنا يسهل في الحل

[lionshico]

الموضوع ده حصل معايا ومحدش عرف يعمل فية حاجة لغاية لما رحت التوكيل وغيرت الcontrol

[tarekdesign]

متشكر جدا علي الرد السريع
اولا العربية بتعمل الحركة دي ومش بتبطل وذي ما قلت بيتعملها اما بكون علي السلانسية او مع الغيار
انا موظب علي عمل الصيانة وسحب العربية كويس اما بالنسبة للدوارة في الصبح فممتازة
الموضوع دة ظهر اما كنت عند مياكنيكي وفك العمة ونظف الانجيكشن بالسبراي بعد كدة ظهر الموضوع دة علي طول وفي سعتها وبالنسبة لاستهلاك البنزين بصراحة انا شايف ان كويس ومفهوش مشكلة

[ehab_mansour]

تمام طالما انت نظفت بوابة الانجيكشن ومعملتش basic setting يبقي العربية محتاجه يتعملها كده وده عن طريق توصيل كنترول العربية بجهاز فحص او كمبيوتر عليه برنامج العربية ويتعملها اعداة ضبط للاعدادات بعد التنظيف وان شاء الله تتظبط
لو ما ظبتش يبقي تروح لمركز صيانة يكون عنده قطع غيار استيراد للمحرك ده وتغير البوابة لو اتحلت المشكلة يبقي تمام لو ما اتحلتش يبقي تركب البوابة تاني وتغير الكنترول .
بصراحة انا عندي نفس العيب ومتعايش مع العربية كده لأنه مش عامل مشكلة معايا خالص فمكبر دماغي

عايز اقلك اني فكرت في كل الحلول الممكنه للموضوع ده وقريت كتيييييير في كاتالوج صيانة خاص بنفس موديل المحرك ده ولم اجد خطوات للحل غير اللي قلتلك عليها دي ........

[tarekdesign]

صديقي ehab_mansour عاوز اقولك ان فعلا الموضوع دة مش عامل مشاكل معايا بس بصراحة بحب ان عربيتي تكون مظبوطة ، وبالنسبة للموضوع الجهاز دة تخيل ان رحت الحرفين وانا ساكن في الرماية في الهرم وقبلت واحد معروف هناك اسمة محمد جولف وقلي ان الجهاز دة كل ال حيعملة انة هيصفر الاخطاء ال في العربية مش بيعمل اعادة ظبط، المهم ان مستريحتش للشخص دة وخاصة ان متكبر اوي وحسيت اني بكلم مع دكتور عالمي

[ehab_mansour]

صديقي ehab_mansour عاوز اقولك ان فعلا الموضوع دة مش عامل مشاكل معايا بس بصراحة بحب ان عربيتي تكون مظبوطة ، وبالنسبة للموضوع الجهاز دة تخيل ان رحت الحرفين وانا ساكن في الرماية في الهرم وقبلت واحد معروف هناك اسمة محمد جولف وقلي ان الجهاز دة كل ال حيعملة انة هيصفر الاخطاء ال في العربية مش بيعمل اعادة ظبط، المهم ان مستريحتش للشخص دة وخاصة ان متكبر اوي وحسيت اني بكلم مع دكتور عالمي

اخي الفاضل
الأستاذ اللي قلك ان الجهاز اخره مسح الأخطاء فقط ده يا مش عارف حاجه وبيفتي يا يكون الجهاز اللي عنده أخره كده لأن أجهزة الفحص انواع كثيرة ولكن الأفضل هو الكابل المعتمد من فولكس والبرنامج الخاص به وده بيعمل كل اللي انت عايزه في كنترول العربية وبيعمل ضبط اعدادات بالموديل لأني شفت ده بنفسي وربنا يوفقك
وده موقع الشركة اللي عندها الكابل والبرنامج Ross-Tech: Home
تقدر تشوف حد تاني بيفهم تتعامل معه يا تكبر دماغك لأني زيك كده مش بحب يكون فيه عيب في عربيتي بس كثرة الاشتغالات والفتي من قبل الميكانيكية عامة الا من رحم ربي خلاني اكبر دماغي .
والله المستعان

[tarekdesign]

يا ريت لو تعرف واحد تقولى ،،،،، وجزاك اللة خير

[ehab_mansour]

يا ريت لو تعرف واحد تقولى ،،،،، وجزاك اللة خير

بصراحة ما اعرفش لأني مش بتعامل مع مراكز صيانة هنا في القاهرة كل شغلي بعمله في المنصورة
لكن اللي أعرفه من خلال تجارب الزملاء هنا في المنتدي ان أشهر واحسن مركز صيانة لمجموعة فولكس هو مركز محمد سمير وهاني عصمت من شارع جسر السويس خلف حديقة بدر تعدي المزلقان هتلاقيه علي اليمين مباشرة لكنه غالي شوية بس فاهم علي حسب قول الناس .وهيحللك المشكلة ان شاء الله
ولا تنسي توافينا بالأخبار لو وصلت لحاجه للمصلحة العامة للأعضاء وجزاك الله خيرا

[tarekdesign]

اللة يفتح عليك .... متشكر لزروقك

[tarekdesign]

متشكر جدا لمساعدتك و عاوز رايك في ان اجيب تكيف للعربية بتاعتي مع العلم ان العربية ٩٨ و ١٠٠٠ cc ومش متركب فيها تكيف اساسا وبصراحة استقريت علي ان اجيب استيراد من عند واحد كويس اسمة محمود في وكالة البلح بس خايف اركبة يتعب المتور ويققل سحب العربية فتنصحني اركب ولا استحمل الولعة ال في شهور الصيف ،،، ارجوا النصيحة لوجة اللة ،،، مع جزيل الشكر

[ehab_mansour]

متشكر جدا لمساعدتك و عاوز رايك في ان اجيب تكيف للعربية بتاعتي مع العلم ان العربية ٩٨ و ١٠٠٠ cc ومش متركب فيها تكيف اساسا وبصراحة استقريت علي ان اجيب استيراد من عند واحد كويس اسمة محمود في وكالة البلح بس خايف اركبة يتعب المتور ويققل سحب العربية فتنصحني اركب ولا استحمل الولعة ال في شهور الصيف ،،، ارجوا النصيحة لوجة اللة ،،، مع جزيل الشكر

شوف يا استاذ طارق انا في نفس حيرتك دي وبصراحة شايف ان تركيب تكييف هيقارب في التكلفة من تسقيط موتور استيراد بمشتملاته واقوي من اللي عندك يعني رأيي تستني لما اللي عندك يتعب وتسقط كامل احسن و لأن كمان اكيد التكييف هيتعب الموتور اللي راكب عندك لأنه في الأساس بقاله كتيييييييير شغال يعني عندي مثلا عربيتي عاملة 270 الف كيلو حتي الأن هركب عليه تكييف لسه ؟؟؟؟؟ ده رغم انه وبفضل الله مازال بحالته لكن ما ينفعش احمل عليه زيادة دلوقتي .
وبعدين خلي بالك ان تركيب تكييف عندك هيحتاج حاجات كتيير مثلا انك تفك التابلوه عشان السربنتينه وهيحتاج تعديلات كتير ووجع دماغ وللأسف مش هتلاقي في مصر اللي يعملك الشغل ده علي نظافة زي الفبريكة وهتلاقي عك ولخبطة لذلك أنصحك بحاجتين ودول هما اصح شيء في القصة دي :-
1- تشوف نصف كامل بمشتملاته كلها بكل صغيرة وكبيرة وتنقله في عربيتك او تنقل كل اللي تحتاجه (الموتور كاملا بالتكييف والباور وعلبة الدركسيون الباور بالكنترول ب ...... ) كده يبقي انت بتشتغل صح واللي يتبقي تخليه عندك او تبيعه
2- تبيع العربية دي وتدور علي موديل أعلي منها كامل بكل شيء وحالة كويسة وفرق السعر بينهم هتاخد بيه كماليات وموديل اعلي وأنضف

دي وجهة نظري الشخصية وربنا يوفقك وقلي ايه رأيك يمكن يكون عندك وجهة نظر أفضل... في انتظارك

[windofchange]

الله ينور يا بشمهندس ايهاب متفق معاك 100 ال100 وفعلا الأفضل تجيب موتور 1400 بالتكييف افضل او 1600 لأنو هيستحمل التكييف وش هيهلك الموتور ومحمود اللي في الوكالة متهيألي قاللك هيفكلك الكومبريسور من موتور 1000 استيراد ودي ميزة ان الكومبريسور مش بلدي(البلدي بيدمر الموتور عن تجربة لو هتاخد روح معاه وهو بيفكه من مكنة 1000 عشان تطمن) بس لو هتيجي عالكمبريسور بس من غير تغيير حاجة يعني لو انت عندك راكب بالفعل سربنتينه وكويل وخراطيم تكييف وكلو ناقص عالكومبريسور بس ده في حالة انك هتغير الموتور بعد كده بحاجة اعلي او زي مقال ايهاب لو حبيت تبيع العربية خالص لأن مع ان الكومبريسور اصلي بس هيهلك الموتور لأنو مصمم يديك اقصي استفادة مالبنزين ومش هيستحمل حمل الكومبريسور عليه بالتوفيق ياباشا

[windofchange]

صحيح بالنسبة لتظبيط العداد عندك في الحرفيين رشاد وتامر محل اسمه الكربه انت بس اسأل عن رشاد الكهربائي عنده الجهاز والوصلة بتاعت تظبيط الكنترول واحب اقول ان قريت قبل كده ان تنظيف البوابة والعربية باردة مش سخنة بالإسبراي الخاص ورشاد لو رايق بيشتغل من بعد 12 بالليل وتامر الصبح بس خللي باللك من الصنايعيه وراقبهم لأن ممكن يبوظو حاجة خليك مع الأسطوات رشاد وتامر