إستفسار بخصوص عفشة إيبيزا 94

[egman]

السلام عليكم ورحمة الله وبركاته

انا كنت عايز اعرف الاتى بخصوص عفشة الايبيزا موديل 94 :

1- مكونات العفشة الامامية إسم كل قطعه فيها ؟

2- واى من مكوناتها بيكون موجود جديد واخر استيراد ؟

3- وسعر كل قطعة فى العفشة الأمامية ؟

4- نفس الشيء للعفشة الخلفية مكونتها وسعر كا حاجة فيها ؟

الف شكر ليكم يا شباب وجزاكم الله كل الخير ........

[egman]

ما زلت فى انتظار الاجابة الى هيتحدد معها اية الى هغيرة فيها ....

[ibiza50]

صديقى egman

بعد السلام و التحية

انا هحاول ارد عليك فى حدود علمى و اتمنى انى اقدر اساعدك


نبداء بالعفشة الخلفيه

• المساعدين ودول من قطع الغيار ذات العمر الطويل وتغيرهم فى حالة تلفهم و التلف نوعين اما انهم ينشفوا ( يحجر ) او يخفوا اكتر من اللازم
• السست و دول مبيتغيروش نهائى إلا فى اضيق الحدود اما لكسر او تلف من اى نوع وبيكونوا متركبين مع المساعدين
• جلب ودى مكانها فوق المساعد وبتتركب فى جسم العربيه و بتكون الوسيط ما بين جسم العربيه و المساعد و السسته
• الدنجل الخلفى وده بيكون جزء من الحديد الصلب مثبت فى شاسيه العربيه وفى العجل الخلفى و المساعدين و هو على شكل حرف H
• المسامير و الجلب الخلفية و دى اللى بتربط العفشه كلها مع بعض
• بلى العجل و الطنابير و مساطر الفرامل وخلافه

العفشة الاماميه

• جهاز الاتزان (ميزان) وده مثبت فى شاسيه العربيه من تحت و اطرافه مثبته فى المقصات وفائدته انه بيزيد من تماسك السياره فى مختلف ظروف القياده ومختلف الطرق - مش فى كل الموديلات-
• المقصات المقص ثلاثى التثبيت طرف فى العجل و طرفين فى القنطرة الاماميه
• جلب المقص وبيكونو اثنين واحده على شكل قرص و اخرى اسطوانيه (ويمكن اصلاحهم و تغيرهم)
• بيضة المقص و مثبته فى طرف المقص الثالث و العجلة و يمكن تبديلها اذا تلفت
• علبة الدركسيون مثبته على القنطره ومنها الباور و العادة
• صليبة علبة الدركسيون
• بارات و بيض علبة الدركسيون
• المساعدين الاماميه و مثبت عليها بعض الاجزاء من البلاستيك و الفلين لمنع تسرب الاتربه و الرمال
• بطاحات ومكانها اعلى المساعدين ومتصله بهيكل السياره و بداخل البطاحات يوجد رومان بلى
• السوست الاماميه
• بعض المسامير للتثبيت
• شمعدان العجل او (جنب) بداخلة رمان البلى
• الطنابير و التيل و خلافة
• قنطره اماميه لاتؤثر على العفشه و انما لتثبيت الجزء الامامى للمحرك

كل الاشياء منها الجديد و منها المستعمل
بالنسبه للاسعار معنديش قيم دقيقه اقدر اقولهالك ولكنها مش غاليه اوى و انا افضل المستعمل لو حالته كويسة لان الجديد الاصلى غالى جدا و الجديد الرخيص بيكون تقليد و اى كلام و لا يتحمل و ده عن تجربتى
ارجو ان اكون افادتك كما ارجو ان اكون لم انس شىء
مح تحياتى محمد مصطفى

[banky]

كلام جميل والله شكرا على الإفادة

[egman]

أ/ محمد مصطفى

جزاك الله كل الخير عنا وعن الشرح الوافي ده انا بشكر حضرتك جدا جدا جدا على اهتمامك بيا وبالموضوع الف شكر ليك يا باشا .

سوال بسيط يا باشا :

العفشجي الى بيشتغل فى عفشة الايبيزا لازم يكون عفشجي ايبيزا برده ولا اى عفشجي يكون كويس ممكن يشتغل عادى ؟

طيب اية الاجزاء الى ممكن تتغير بصورة دورية قريبة فى العفشة نتيجة لشوارعنا الجميلة الناعمة الانسيبابية خاصاً وانى اليويمن دول بحس بكل زلطه او طوبة تحت العربية وبترجرجها ؟

تحياتى لك حسين الصواف

[tareksakr]

مش شرط عفشجي معين المهم يكون نضيف يكشفلك علي العفشة ويقولك ايه اللي محتاج يتغير انا لسه مغير حاجات في العفشة رحت اظبط زوايا الفني قاللي ان جلب وبيض المقص بايظين +العلبة فيها بوش + بيض الطرف عاوز يتغير روحت اشتريت 2 جلبة سواج من فتح الباب شارع السودان 60 جنيه + 2بيضة مقص 120 جنيه + 2 بارة طرف 150 +علبة دركسيون مايلي 280 جنيه دي الحاجات اللي اشتريتها + انا كنت مغير من 4 شهور 2 مساعد أمامي استيراد من عند وليد اللبودي في الحرفيين 250 جنيه بالسوست بتاعتهم بالبطاحات ودلوقت العفشة بقت ممتازة

[egman]

انا من فترة كشفت عليها قالى انها محتاجه طقم جلب و2 بيضة مقص ...

هل الحاجات ده هتفرق بعد التغيير فى المشي والدنيا هتبقى كويسة فى المطبات والكلام ده الواحد دلوقتى لو واخد طوبة تحت العجلة بيحس ان العربية بترقص ومفككة هل دول السبب فى كده الجلب والبيض ؟

[bmwe46]

الافضل انك تروح لمتخصص فى الفولكس او السيات وه افضل من العفشجى العام المتخصص افضل لانه بيجيب من الاخر مش هيدوخك و يجرب فيك و فى العربيه