لكل عشاق ابيزا طلب تسعير ابيزا94 كوبيه

[i_need_u2320]

السلام عليكم ورحمه الله وبركاته


ازيكم يا اعضاء المنتدى الكرام

ديه المشاركه الاوله ليا بس الصراحه متابع المنتدى بقالى كتير واحب انى اشكر ادارة المنتدى على هذا الموقع واعضائه الكرام على مجهودهم وتعاونهم الطيب

انا قدامى عربيه سيات ابيزا 1994 1300cc كوبيه العربيه مفيهاش اى كماليات خالص غير كاسيت والتكيف مش نافع جنوط عاديه محتاجه لكاوتش جديد فيها شويه خدوش على حسب الكلام
فابريقه جوه برة رشه اجزاء مفيهاش اى شغل خالص العربيه ديه مطلوب فيها 28000
عاوز حد خبير في الابيزا يتمنها بما يرضي الله مع العلم انى مش من هواه تغير العربيات عاوز عربيه شبابى وكمان شبابى في مصاريقها تعيش معايا وتستحمل سفر ومتكونش فاتحه بوقها انصحونى اعمل ايه اخدها ولاة ولو اشتريها على كام واكشف عليها فين مع العلم ان العربيه بتاعت ظابط عاوز حد يفدنى للاهميه
واسف على الاطاله

[ahmedmoza]

لو العربية زى ما انت بتقول فبريكة جوا خلصها ع 25 هيبقى تمام و لو عاوز ميكانيكى محترم بيفهم فى الابيزا فى واحد فى شارع جسر السويس و انت رايح ع اشارة روكسى جنب بنزيمة التعاون اسمة سيد و برضة روح ارفعها فى البنزما

[i_need_u2320]

متشكر يا احمد على الرد ربنا يكرمك
طب الفرق بينها وبين عربيه 4 ابواب في حدود كام مثلا ؟

[Mohamed.Ramah]

ممكن حضرتك تسال هنا : http://www.nilemotors.net/Nile/163941-a.html

وان شاء الله يفيدك والله الموفق

[i_need_u2320]

متشكر يا محمد على الرابط
هعمل موضوع هناك وربنا يسهل

[ahmedali]

انا كنت جايب السنة اللى فاتت في شهر 6 عربيتى وكانت عربية حالة متور وعفشه كويسة جدا وفيها 4 ازاز كهربا وسنتر وانذار وكاسيت سونى اكسبلويد وسمعات سونى وفرش جلد وجنوط اسبور وكوتشات تيوبلس وكنت جايبها بي 31 الف انا شايف ان 28 على عربية كوبي ومافيهاش اى كماليات 28 الف كتير عليها وحاول انك تجيب عربية نضيفة وحالتها حلوة وتكون 4 باب عشان حتى في بيعها تكون مطلوبة حتى لو هتاخدها زيادة عن سعرها الف ولا حاجه بس تكون واخد حاجه ما تقرفكش

[waelms3]

يعنى الكوبية بتبدا من 25 الى 28 وبما ان فيها شغل يبقى اخرها 25 و كمان فكر لان الكوبية تقيلة فى بيعها شوية غير الاربعة باب

[i_need_u2320]

ahmedali ربنا يباركللك فيها ياباشا ويديللك خيرها ويكفيك شرها
انا كمان بقول كتير على عربيه زى دي وللاسف مش عارف القي حاجه نضيفه وبسعر كويس
علشان زى مانتا قولت مش عاوز عربيه تقرفنى لانى مش فاضي لميكانيكيا ووجع دماغ بس ديه
عربيه فايت عليها 16 سنه ده الطبيعي انها تكون فاتحه بوقها ولاة ايه نظامها
انا بصراحه محتاار جداا

[i_need_u2320]

waelms3 على فكرة انا كنت بقول العربيه مفيهاش شغل بالعكس دى محتاجه لشغل
كل كماليتها كاسيت وتكيفها مش نافع ومحتاجه لكاوتش المفروض حقه يتخصم : ) وكمان مش مجنطه
بس اكيد انت واحمد عندكوا حق العربيه الكوبيه بيعها تقيل وانا كمان مش عاوزها كوبيه :) انا شيلت العربية ديه من دماغى مش مرتحلها اصلا :(

[ahmedali]

كده تفكيرك صح دور على عربية تانية ونصيحة بلاش سوق مدينة نصر ده سوق زفت انا اسف في اللفظ بس بجد اغلبهم تجار ونصب وحجات كتيره كده ما تفهمهاش ويقولك سعر العربية بتاعتك هشتريها بالتراب عشان هو يبيعها بالغالى دور انت في مواقع الانترنت وخصوصا كونتاكت كار انا جايب عربيتى عن طريقه وليا اصحاب بردو جابو عربياتهم عن طريقو والحمد لله طلعو كويسين اوى بس طبعا لازم تكشف عليهم وخد عربية تكون عفشة ومتور وشاسيه تمام اما الحجات الخارجية دى مش مهم لو فيها شوية دوكو و كده وربنا يوفئك باذن الله وتلاقي عربية احلى من عربيتنا كمان بكتير صحيح وهات عربية متجنطه لان سعر الجنوط جديد غالى فالافضل تجبها بجنوط علطول

[i_need_u2320]

فعلا عندك حق سوق مدينه نصر مش اوى وكله تجار ربنا يكرمنا بحاجه كويسه من على النت
ومتشكر يا باشا على النصايح الجامده ديه