نفسى مرة حد يرد عليه لوجه الله تعالى !

[ahmed_x545]

السلام عليكم جميعا . دى رابع مشاركه ليه ومحدش بيرد على اسئلتى خالص. مش عارف ليه ؟ مع ان فى ناس بتسال اسئله بسيطه وبلاقى ناس كتير اوى مجاوبه عليهم ! المهم انا عندى استفسار لاهل المعرفه من اخواتى اللى فى المنتدى لعل وعسى حد يرد عليه . الحمد لله جددت عربيتى كوردوبا 96 لكن من كتر الميه بتاعه البوهيجى السنتر بقى يعلق لما اجى اقفل الباب الرئيسى ميقفلش غير الباب دة بس وباقى البيبان مفتوحه مع العلم ان هوة سنتر هوا مش كهربا وكمان الازاز الامامى كهربا بقى يطلع بصعوبه جدا وسعات ميرداش يطلع خالص ونزلت شارع دمشق قالولى احسن حل لو مش هيتصلح انك تجيب كسوة بابين بتوع ابيزا او كوردوبا بالسنتر بتاعهم و بالماتور بتاع الازاز الكهربا . يا ريت لو حد يعرف مكان اصلح فيه او اجيب منه استيراد نضيف ...

[snakeson2]

انا هسألك سوال السنتر دة انت مركبة ولا الاصلي بتاعها؟
وبعدين احسن كهربائي يشتغل في الموضوع دة او يفيدك حتي بالازم عملة هوة تامر ورشاد الي في الحرفيين
وموضوع المية دة حصل ازاي؟

[soficom]

على فكره انا معرفش حل لمشكلتك بس انشاء الله تتوصل لاجابه بس انا قلت ادعيلك

[عبد الرحمن اسامه]

مش عارف اساعدك والله

[ehab_mansour]

السلام عليكم أخي الفاضل
لازم تعرف ان لو حد يعرف حل لمشكلة انت طرحتها مش هيبخل عليك نهائيا بالحل لوجه الله تعالي زي ما عهدت ذلك دائما من أعضاء منتدي نايل موتورز اللي اتعلمت منهم من اول لما كنت ما اعرفش اي شيء نهائيا وحتي لما تعلمت القليل انا وغيري بنرد دائما فيما نستطيع ان نجتهد فيه ونعلم عنه ولو قليلا لكن الرد علي الفاضي وبدون علم غلط ولا ينصح بيه نهائيا

بخصوص مشكلتك
1- ياريت تراجع بنفسك لو تعرف علي وصلات الهواء والكهرباء للسنتر وتتأكد ان مافيش حاجه مقطوعه او بتعلق
2- بالنسبة لثقل حركة الزجاج الكهرباء فده بيحدث دائما لسببين الأول هو تراكم الأتربة والأوساخ علي جانبي مساحات الزجاج الداخلية والخارجية وده اعتقد هو السبب الرئيسي لأنك بتقول لسه مجدد العربية يبقي اكيد بتاع الدوكو وسخها بشكل مش طبيعي والحل انك تفك الجريدة الفبر الداخلية والخارجية اللي جنب الزجاج واللي راكبه علي صاج الباب واللي بتمنع نزل ماء المطر المتراكم علي زجاج السيارة من الخارج الي داخل الباب وعلي فكرة دي بتتشال بالشد لأعلي وبتتركب ضغط تاني في مكانها
ولما تشيلها هتلاقيها مليانه أوساخ وأتربة وبلاوي نظفها واغسلها بالماء كويس وركبها تاني هتلاقي الدنيا بقت زي الفل
والسبب التاني لثقل الزجاج هو ضعف وصلات الكهرباء الخاصة بالزجاج ودي هتحلها بانك تفك فيشة ماكينة الزجاج وتتأكد انها نظيفة من اي رطوبة او جنزرة بسبب وقوع مياة عليها وتركبها تاني بس انصحك تبدأ بالحل الأول لأنه اعتقد هو السبب الأكبر

وتحت أمرك وفي انتظار ردك لمتابعة المشكلة وحلها ان شاء الله

[ahmed_x545]

انا متشكر ليكم جدا جدا جدا انكم رديتو على اسئلتى . وانا لسه جديد فى موضوع العربيات علشان كدة بستفاد من اى تعليق بيتحط حتى ولو كان بسيط . السنتر والزجاج والكهربا بتوع الفبريكه بتاعه العربيه .وبعد اذن سناك هوة عنوان تامر ورشاد فين فى الحرفين . وبشكر الاستاذ ايهاب جدا جدا على ردة الوافى ويا رب يجعلوا فى ميزان حسناتكم جميعا . اخوكم احمد

[cOrn]

حضرتك ساكن فين ؟

[ahmed_x545]

السيدة زينب

[cOrn]

لو حضرتك تعرف تيجى الهرم فى اى يوم فى واحد فى الهرم اسمه عادل فى منطقة اسمها المطبعة و فى شارع المطبعة الرئيسى اول لما توصل الشارع اسأل على عادل بتاع السنتر , و روحله و هو هيعملك كل حاجة فى السنتر بتاع العربية و كله يبقى تمام انشاء الله

[ahmed_x545]

شكرا ليك جدااااااااااااااااااااااااا

[cOrn]

شكرا ليك جدااااااااااااااااااااااااا

شكر على واجب يا باشا , ويبقى قولنا اية الاخبار لما تروح