ركبت فتيس استيراد وربنا ستر

[egman]

السلام عليكم ورحمة الله وبركاته

انا بعد ما قاسيت من طقم الدبرياج وقمت بتغييره وكانت بتواجهنى مشكلة فى اختلاف الغيرات المهم الحمد لله لما ربنا هدانى لميكانيكي متخصص ضبطلي موضوع الغيارات ده وفضلت قدامنا موضوع الزيت الى بينقط المهم هو طلع طلع زيت بينزل من الفتيس .

وعملنا الاتى :

1. فك الفتيس للكشف عليه .
   
2. وجدنا كسر فى حلة الفتيس .
   
3. صوت طقطقه كبيرة عند لف كرونة الفتيس ده غير انى الفتيس كان فيه ونة على الغيار الخامس من زمان .
   
4. حلة الفتيس كلها زيت .

والتصليح كان كالاتى :

1. تركيب فتيس استيراد بتاع مكنة 1400 سي سي وانا عربيتى 1300 سي سي هل ده متناسب معايا ؟
   
2. تم نقع الاسطوانة فى البنزين لتنظيفها من الزيت لمده يوم كام .
   
3. تم تركيب الطقم مرة اخرى والفتيس الاستيراد .

النتيجة :

الحمد لله الغيارات كلها بدون صوت ولا يوجد اى صوت عند النقل والتجميع بقى جميل والسرعه رجعت بقت تمام والحمد لله .


المفارقات فى الموضوع :

• وانا مروح بعد ما جربت العربية الغيارات خلفت معايا يعنى ما فيش مارشدير ولا اول ما فيش غير تانى .
  
• المهم رجعت تانى فى نفس الوقت ومشيت على التالت بتاع العربية وكان عامل ريحة شياط لانى بطلع علية وبمشي عليه وكان لازم اعتقد انى اريح على الدبرياج علشان اعرف اطلع العربية من الثبات ولا اية رايكم .
  
• المهم لما وصلت قالى هو بعد المشي العصايه او التيش او الرباط ريحت المهم ربط على الغيارات تانى ما خدش دقايق وكله بقى تمام الحمد لله .

الملاحظة :
ركنت العربية عند البيت حوالى 3 ايام وسافرت ولما رجعت لاقيت دواسة الفرامل والدبرياج بيروحوا يمين وشمال وتحس ان الاتنين مرتيطين ببعض لما اجى اكبس اوى فرامل الاقى دواسة الدبرياج بتعلى لفوق وبيتحركوا من مكانهم يمين وشمال لما بدوس عليهم وانا حاسس انهم مش فى مكانهم الاصلى هما شغالين تمام بس فيهم حركة يمين وشمال لما اجى ادوس اكنهم مش مربوطين وانهم ماثرين على بعض بس تاثير فى البدلات بس مش فى وظيفتهم يا ترى ده من ايه !!!!!!!؟؟؟؟



تم تعديل العنوان بواسطتى
15ب

[egman]

انا اسف يا جماعه جدا انا اقصد فى العنوان ركبت فتيس استيراد وربنا يستر علشان انا شكلى كده بفول على نفسي

[ehab_mansour]

خير الحمد لله
ورجاء من الادارة تعديل العنوان

الحمد لله علي سلامتك بعد ضبط العربية وان شاء الله كله هيكون تمام واللي وصلك لكل ده هو الميكانيكي الأول ربنا يهديه
موضوع الدواسات ده هتخلي الميكانيكي يبصلك عليها هتكون عايزه تتظبط في مكانها كويس وممكن يكون فكها و لم يتم تثبيتها صح وبسيطة ان شاء الله
بخصوص فتيس 1400 بدلا من 1300 فهو هيريح الموتور اكثر ولكن هتلاقي فيه فرق في السحب والسرعات
بمعني ان السحب المفروض هيقل بسيط والسرعات مع الغيارات هتزيد بنسبة بسيطة ايضأ لاختلاف نسب الغيارات بين الفتيس ال 1300 وبين ال 1400 ولكن ده مش مشكلة عادي لاضطرارك لتركيبه
ياريت تقلنا نسب السرعات مع الغيارات وعدد لفات الموتور حاليا كام
وجزاك الله خيرا

[egman]

ابهاب باشا ازي حضرتك والله ليك وحشة بس انا اليويمن الى فاتوا كنت مع العربية بتفسح عند الميكانيكي :)

نسب السرعات :

1. الغيار الاول على الـ 3000 بيجيب 30 بس طبعا مش بمشي عليه كده دنا وانا بجرب بس بعد كده بنقل على 20 مثلا .
   
2. الغيار التانى على الــ 3500 بيجيب 50 .
   
3. الغيار التالت على 4000 بيجيب 80 بس مش بعمل كده كتير ده تجربه وبس لكن على 3000 بجيب 60 وعلى 3500 بيجيب 70 .
   
4. الغيار الرابع على 3000 بيجب 80 وعلى 3500 او 3700 بيجيب 100 .
   
5. الغيار الخامس على 3500 بيجيب 120 بس ومجربتش اكتر من كده .

طيب وبخصوص الدواسات :

انا افتكرت انى لاقيت صامولة ووردة معدن تحت الدواسات اول ما جيت اركب العربية وطبعا احتفظت بيهم وبعد كده اكتسفت الحركة بتاعتهم ده .

• طيب ليا سوال هل البدلات ده بتتغير انا اقصد الجزء الى بندوس عليه سواء بنزين او فرامل او دبرياج بيتغيروا ولا اية النظام وهل فيهم جديد ولا استيراد وسعره فى حدود كام واسمهم اية ؟
  
• عايز اعرف نبذة بسيطة عن تركيبة بيكونوا متوصلين فى اية وبيركبوا ازاى ؟
  
• وهل فعلا ليهم اماكن معينة لتثبيتهم وحارات لازم كل دواسة بتبات فيها ولا لأ ؟

ملحوظة :
هل تقل دواسة الدبرياج ده بيكون عيب سلك ولا اية بالضبط ؟

طيب وهو كان اقترح عليا الميكانكي انى اغير نوع السلك واجيب بتاع البولو لانه قالى علية انه اتوماتيك بيظبط نفسه لوحده لا بيحتاج حد يرفع ولا يوطى الدواسة بس مش فاكر اسم السلك اية بالضبط اعتقد مش عارف حاجة اسمها سنتريك مش فاكر اوى هو حتى شكله غيرب مش زي العادى ابو 70 جنية وقالى انه سعره غالى بيعمل حوالى 300 اية رايك فى الموضوع ده يا باشا ؟
لان الموضوع ده قد اية معكنن عليا !!!!!

[ehab_mansour]

طبعا النسب دي ممتازة عن الأصل اللي هو كان زي عندي 120 كم علي الخامس عند 4000 لفة بس ايه أخبار السحب معاك ؟ والتكلفة كانت كام ؟
بخصوص الدواسات فأنا مش عارف هل بتتغير ولا لأ بس اكيد موجوده وطبعا كل واحده لها مكان وبيت بتتثبت فيه
موضوع ثقل دواسة الدبرياج مالهوش علاقة بالدواسة نفسها في اغلب الأحيان بيكون سلك الدبرياج هو اللي بايظ وفعلا السلك الأوتوماتيك ده سمعت انه كويس وأفضل من العادي لكن م جربتش
وربنا يوفقك

[egman]

والله يا باشا السحب الحمد لله زي الفل بس ممكن يكون جودة السحب لانى انا كمان لسة مغير طقم الدبرياج كله لو تفتكر فممكن يكون ده يكون له تاثير برده .

بس قولى رايك اية يا باشا لما مشيت على الغيار التالت بس حوالى نصف ساعه هل ده يحرق الاسطوانة او يبوظ حاجة علما بان الطقم ما مشيتش عليه اسبوعين على بعض ؟

المصنعية :

1. الراجل راح معايا الحرفيين بعربيته نشتري الفتيس
   
2. حل وتركيب الفتيس الجديد .
   
3. تنظيف الاسطوانة .
   
4. غسل الفتيس بالكمبروسور والبنزين قبل التركيب .
   
5. تغيير صواميل الكولبن .
   
6. تغيير زيت الفتيس للفتيس الجديد .

وعلى فكرة هما قريبين جدا من حضرتك عارف هما الورشة بتاعتهم موجودة فى اول احمد عصمت لو تعرف فى محل على جسر السويس اسمه الشرقاوى لقطع الغيار عن احمد عصمت قبل البنزينة بتاعته موبيل الورشة فى الشارع ده الى على ناصية بتاعه قطع الغيار وعلى فكرة هما اتنين شباب زي الفل وما شاء الله عليهم ادب واخلاق وفهم فى شغلهم لاقصي درجة ولو تحب نتقابل انا وحضرتك مرة ونعدى عليهم لو تحب وتتعرف عليهم انا ممكن اروحلهم بكره علشان اثبت الدواسات ده مكانها .
وهما متخصصين فى الفولكس والسيات والجولف بس .

كله عمل 370 جنية

[egman]

تحياتى والف شكر للإدارة على سرعه الإستجابة وتعديل العنوان .

[ehab_mansour]

الله المستعان
والفتيس عمل كام بالضبط
ربنا يسهل بس انا مشكلتي ان مافيش وقت لازم اخد اجازة عشان اعرف اعمل حاجه وربنا يسهلها واتشرف بمقابلة حضرتك ان شاء الله
وانا كده عرفت مكانهم لو احتاجت حاجه اروحلهم ان شاء الله
جزاك الله خيرا

[egman]

الفتيس عمل بالضبط 450 جنية من الحرفيين وان شاء الله يكون فيه نصيب واقابل حضرتك

[windofchange]

مبروك التصليح يا ايجيمان ازيك يا بشمهندس ان شاء الله تكون بخير ماشاء الله ماقصرت........بص يا ايجي الدواسات بتباع استيراد مااعتقدش في جديد...وهي عندي موجود في طقم دواسات في البيت زيادة لو تحب نعرف سعرهم كام فالحرفيين ومش هنختلف انا غيرتهم مش عشان بايظين لأ انا لما سقطت الموتور خدت معاه حاجاته من رادياتير وعفشة وخدت الدواسات بالمرة لكن القديمة كانت حالتها كويسة ان شاء الله اعمل موضوع عن قطع الغيار اللي طلعت من الموتور ال1000 سي سي من عفشة وماشابه صحيح وعندي سلك دبرياج حالته عادي كويسة بدوس عليه بيفصل هو ماله السلك بتاعك؟ كمان السلك اللي بتقول عليه بيقولوا بيرجلش نفسه بنفسه اوتوماتيك وده مركبه عندي حاليا

[egman]

طيب بما ان حضرتك مركب السلك الاتوماتيك يا ريت تقولى رايك فيه اية وفى الاداء بتاعه وهل الدواسة بتاعه الدبرياج فعلا بقت ناعمة وخفيفة ؟

ويا ريت تقولى حضرتك جبت السلك الاتوماتيك ده منين وبكام فلوس ؟

[windofchange]

معرفش سعره لوحده لأني جبته مع كذا حاجة تانية والدواسة عادية زي السلك القديم حته انو بيرجلش نفسه لوحده دي اللي ان مش فاهمها.....وسلك الدبرياج عندك اعتقد عايز صيانة من تزيت لتغيير حاجات فيه

[Mohamed.Ramah]

مبرووووووووووووك التصليح وشكرا على نقل تجربتك

[egman]

انا امبارح حصل معايا موقف فى الجون :

1. وانا خارج من الشغل على الميكانيكي علشان اكشف على البدلات بتاعت الدبرياج والفرامل .
   
2. وانا ماشي بالعربية وبهدى علشان مطب قدامى وتقاطع وكده لقيت دواسة الفرامل فى الارض ومفككوكة والحمد لله الحمد لله انى ما كنتش على سرعه كبيرة وقفت العربية بالهاند بريك لقيته بتسحف شويه رحت واخد غيار لانى كنت ممور العربية ورفعت رجلى من على الدبرياج علشان العربية توقف والحمد لله وقفت تماماً وركنتها .
   
3. اتصلت بالميكانيكى الراجل جالى الحمد لله وقالى ان المسمار الى ماسك دواسة الدبرياج والفرامل مش موجود وقع وفى جزء فيبر كده مكسور شوفته تحت الدواسة .
   
4. المهم لصم الدنيا وساق العربية للورشة واشتريت طقم بدلات وركبتها بدلات الفرامل والدبرياج منها وخدنا منها الى كان ناقص عندى والحمد لله الدنيا اتظبت ويا رب تكون اخر الاعطال لحسن انا استويت يا رجالة والحمد لله على كل شي .....

[ayman2000ghazy]

عايز اركب فتيش اتوماتيك لموتور 1400 سى سى متسقط فى ابيزا 99
ممكن تتحول اوتوماتيك؟ ولو ممكن يتكلف كام؟ و فى مشاكل ولا لا ؟