بخصوص زجاج الإيبيزا والمساحات

[egman]

السلام عليكم ورحمة الله وبركاته

انا كنت عايز اعرف شوية حاجات خاصة بزجاج الايبيزا موديل 94 والمساحات :

1. فين الاقي مكان بيبع الزجاج الامامي للعربية (البربريز) لانه عندى كان فيه شرخ هو بسيط وعالجته بس كنت عايز اسأل علشان لو حبيت اغيره عند مين فى حد معين وهيكون سعره كام والشرخ الصغير ده بعد ما عالجته بقى رفيع جدا بس باين هل ده ياثر اثناء الترخيص ؟
   
   
2. اما بالنسبة للمساحات انا المساحه الخلفية مش موجوده فهل هى بتتباع جديدة ولا استيراد والاقيها عند مين وبكام وهل عدم وجودها ياثر على حاجة اثناء الفحص والترخيص لانى داخل على الفحص الاسبوع القادم ان شاء الله ؟
   
   
3. كمان يوجد فى الزجاج الخلفى زي فامية على حروف الزجاج من الداخل او بمعنى ادق متحدد بيه الزجاج وهو رفيع مش كبير ما فيش 5 سم هل ده برده هيكون فية تلكيك فى الفحص ولا الزجاج اصلا بيكون كده وهو عليه خطوط صفراء كده رفيعه بالعرض ؟
   
   
4. أما حوار الترخيص ده بقى هيكون فى مرور مدينة نصر يا ترى اية اخبار المرور ده رخم ولا منظم ولا اية انا على فكرة هنقل ملكية وتجديد رخصة وفحص ولو حد عند فكرة عن اى ملاحظات اخدها فى الاعتبار وانا هناك يقولى عليها جزاكم الله خيرا او الاجراءات اية بالضبط من اول ما ادخل ؟
   
   
5. ومثبت على الخرصه شركة التامين اسمها رويال هل لازم انى عند التجديد اعمل التامين عند نفس الشركة ولا ممكن اغيرها وهل التغيير ده يقابله اى اجراء زياده او ورقة زيادة عند التجديد ولا عادى الموضوع ممكن يتغير واختيارى عادى ؟

جزاكم الله كل الخير ............

[ehab_mansour]

وعليكم السلام ورحمة الله وبركاته

1- بخصوص شرخ الزجاج فده أعتقد انه عادي في المرور وإلا لو مهندس الفحص غلس عليك وبخصوص السعر فهو 370 او 380 تقريبا بالتركيب وده عند مصانع دكتور جريش في العاشر ودول أفضل مكان في السعر والتركيب أقل من 50 الي 100 جنيه عن اي مكان أخر لأنه هو اللي بيصنع الزجاج ولو حابب تروحلهم قلي وانا اقلك تعمل ايه .
2- المساحة الخلفية مافيش حد بيعلق عليها في المرور اهم حاجه تكون المساحات الأمامية تمام وشغاله ولو حبيت تشتريها ممكن تلاقيها استيراد لكن هتلف عليها كتييييييييير
3-لأ اللي في الزجاج الخلفي ده عادي هو بيتصنع كده أصلا وهما في المرور عارفين
4- ما اعرفش حاجه عن مرور مدينة نصر ولكن لو سجلت العربية باسمك خلاص يبقي هتاخد العقد وهتروح علي المرور هتشتري طفاية لو مافيش عندك واحده وتجيب شهادة مخالفات وتدخل المرور تشتري ملف فحص وتفحص وبعدين تروح ترخص علي شباك ترخيص الملاكي
وربنا معاك عشان يوم المرور ده عذاب
5- بخصوص التأمين اي شركة موجوده هناك هتاخد منها تأمين اجباري علي حسب عدد سنوات الترخيص ومش شرط اسمها ايه اي حاجه

وربنا يوفقك وتخلص من القصة دي علي خير

[egman]

المهندس / ايهاب منصور

الف شكر ليك يا باشا والله وحشتنا فى الكام يوم الى المنتدى كان فية مشكلة فيهم دول ...

طيب انا لو عدى موضوع الشرخ ده من المرور مش مشكلة هطنش التغير دلوقتى لكن من باب العلم بالشي لو حبيت اغيره عندهم واروحلهم قولى اعمل اية وهل يا ترى بيكون مكتوب على الزجاج اى بيانات تعرفنى ان ده الزجاج المناسب لنوع عربيتى ؟

وجزاكم الله كل الخير ،،

[ehab_mansour]

ربنا يكرمك والله حضرتك وكل الأعضاء وحشتوني اكتر بس حتي الأن ما عرفتش اسم حضرتك خاصة اني داخل علي شراء شقة بمدينة نصر وعايز حد يساعدني
المهم لو عايز هتروح مصانع دكتور جريش اللي في مدينة العاشر من رمضان (طريق مصر اسماعيلية الصحراوي ولما تقرب من العاشر تعدي اول كوبري وتدخل من جنب تاني كوبري وبعدين تدخل يمين هتسيب اول شمال وتدخل تاني شمال وبعديها تدخل اول شمال هتلاقيهم في وشك ) وتسأل علي قسم التركيبات وهتدخل وهما هيقومو بالمطلوب كله وهيقولولك تعمل ايه وهما عندهم نفس الزجاج بالضبط اللي عندك علي حسب نوع وموديل العربية
وربنا يوفقك واي خدمه تحت أمرك

[egman]

يا باشا انا اخوك حسين الصواف وساكن فى مدينة نصر فى التجمع الاول ولو حبيت انى اكون معاك فى اى حاجة وخاصا فى التجمع الاول انا اعرف ناس كتير هناك وانا تحت امرك ونتمنى نخدمك طبعا وهبعتلك رقم موبايلى على الخاص .

بقولك يا باشا هو انا هنقل العربية مرور مدينة نصر تمام والرخصة بتاعه العربية من مرور النزهة هل فى اجراء هيحصل معايا فى مدينة نصر يخلينى ارجع تانى على مرور النزهة علشان اعمله زي ما قرات فى مواضيع كثيرة موضوع عمل مطابقة للبصمة هل ده اجراء يجب انى ارجع للمرور القديم علشان اعمله طيب وهل فيه اى اجراء تانى يخلينى اروح المرور القديم بتاع النزهة علشان اعمله ؟

علما بانى قد انهيت موضوع شهادة المخالفات كالتالى :

رحت مرور النزهة الى طالعه منه رخصة العربية و ادونى ورقة اروح بيها مرور الدراسة تحديدا نيابة المعادى الى فى مرور الدراسة علشان اجيب المخالفات على النمر القديمة (العربية اصلا عليها ارقام الجديدة الى هى حروف وارقام ) وجبت المخالفات من الدراسة على النمر القديمة ورحت على النزهة خلصت الشهادة على النمر الجديدة الى على العربية وهى معاياي الان ...

والسؤال هنا هل برده لو طلب منى موضوع البصمة او اى اجراء تانى يتطلب منى انى اروح المرور بتاع النزهة الى طالعه من الرخصة انى ممكن اروح تانى مرور الدراسة واللفه ده ولا مرور الدراسة ده كان بس علشان لو فية مخالفات على الارقام القديمة بتاعه العربية .

او بمعنى اوضح لو طلب منى مطابقة بصمة ساعتها يطلع من النزهة ولا الدراسة ؟

[egman]

وهل لازم فعلا ادفع رشوة لمهندس الفحص ولا اية لانى بسمع كده وبيكون فى حدود كام ومين تانى ممكن ياخد رشوة علشان ما يوقفش الورق ؟

[ehab_mansour]

شوف يا أخ حسين انت كده مش محتاج غير انك تروح المرور تفحص ولو احتاجت مطابقة بصمة ده بيكون في المرور اللي فيه ملف العربية وهو مرور النزهة بالنسبالك وعلي فكرة مطابقة البصمة ده علي حسب مزاج المرور يعني ممكن يطلبه او لأ
بخصوص الرشوة فانت هتضطر انك تدفع تقريبا لكل الناس بداية من العامل اللي بياخد البصمة 5 او 10 جنيه والمهندس اللي هيمضي20 واللي بيفحص العادم 10 وبعد كده علي الشباك اللي هيخلص الورق 20 وبعد كده للي هيركب النمر 10 مثلا والحاجات دي انت وشطارتك لو تقدر ما تدفعش حاجه يبقي تمام ولكن لو مضطر هتعمل ايه هما عليهم الذنب والله المستعان ربنا يعافينا منهم ويهديهم

[windofchange]

حمدلله عالسلامة ياايهاب........ليك وحشة عسي ان تكون فاحسن حال.....والله بالنسبة للمساحة هي بتتباع استيراد وقليلة عاملة 100 جنيه ومينفعش يفكهاللك من شنطة ممكن لو محتاج تجيب شنطة كاملة بالمساحه والعواكس لو غاوي يعني مثلا لاقدر الله حصل حاجة للزجاج الخلفي وباب الشنطة فيه سمكرة تجيب باب شنطة بمشتملاته علي ماافتكر ب250 جنيه ازيد او اقل....وفي عند بتوع الأكسسوار بيركبلك واحدة عمولة رخيصة وبتأدي الغرض وبالتوفيق فالمرور

[ehab_mansour]

الله يسلمك ويكرمك ايهاب باشا بس كده باب الشنطة رخيص جدا لو ب 250 ؟؟؟

[windofchange]

بس السعر ده من غير العواكس اللي مكتوب عليها سيات ايبيزا.......العواكس لوحدها غالية ب150 الشفاف الأحمر العادي تقريبا والاسود بتاع ايبيزا gti يعملو 300 لوحده يعني اغلي من باب الشنطة نفسه ههههههه وفي ابواب ب سبويللر واكيد دي سعرها غير اللي من غير السبويللر وكمان ممكن تلاقي ابواب من غير علامة السيات حرف ال s دي لو لقيتها فاضية كده تبقي ارخص من 250 لأن العلامة ب50 جنيه لوحدها علي مااتذكر وده كان كورس مصغر عن شنطة الايبيزا ههههههه

الاسعار ده اللي فاكره بس ممكن تكون زيادة شويه او اقل وبتختلف من تاجر للتاني

[egman]

انا متشكر ليكم جدا جدا يا رجاله على المجهود ده معايا واليكم قصتى امبارح مع المرور :

1. انا المفروض مرور مينة نصر لانى رخصة القياده والعنوان يتبع مرور مدينة نصر روحت الساعه 8.30 صباحاً مرور مدينة نصر .
   
   
2. اول ما وقفت عينى ضربت كده لقيت طابور قرب يخرج بره المرور قلت حلو بانت من اولها على الرغم من ان هو ده بس الى زحمة والمرور كان رايق والحركة سلسه جدا المهم روحت اجيب النماذج هات البطاقة يا استاذ او الرخصة اديتوه الاتنين قالى لا اقرا الاعلان ده .
   
   
3. مكتوب ان كل ساكنى القاهرة الجديدة والتجمعات والرحاب وبدر والشروق ومدينتى تم عمل وحده مرور باسم وحده مرور الشروق ادارة حلون علشان تخدم الناس هناك وتقلل الضغط فى مدينة نصر فين بقى مكنها هى فى مدينة الشروق مدخل 2 طبعا مشوار فى الجون خاصا انى لو عارف كده وانا فى بيتى كان بقى سهل لانى فى التجمع الاول جنبي على طول طريق السويس .
   
   
4. المهم توكلت على الله وروحت المرور الدنيا هناك صحراء وما فيش مخلوق على الشباك وتنظيم هايل غير طبيعيى وكل ما تخلص حاجة من شباك يقولك تورح فين وتعمل اية بدايامن شباك النماذج والتفاصيل كالتالى :
   
   
5. شراء نماذج تجديد وفحص وصل الطفاية 21 جنية .
   
   
6. رفع البصمه 5 جنية علشان يشوفها .
   
   
7. شراء المثلث وشنطة الاسعافات 75 جنية .
   
   
8. الطفاية 121 جنية .
   
   
9. التامين الاجبارى لمده سنة 111 جنية .
   
   
10. ملف واقرارين استلام النمر والتسليم 2 جنية .
    
    
11. ده الحاجات الى اول ما خلت عملتها اشتريت نماذج والطفاية والتامين والشنطة وخلافه وبعد كده .
    
    
12. روحت لمهندس الفحص الرخصة لو سمحت أديته الرخصه وتحتها 20 جنية وصباح الفل يا باشا كتب وخلص كل حاجة على كبوت عربية تانية
    
    
13. طلب منى وصل الطفاية ووصل شنطة الاسعافات والمثلث خنمهم وقال اتفضل على الشباك قدم الورق .
    
    
14. روحت قدمت الورق الموظف بيقولى اتفضل شاي يا باشا قلتله ده واجب عليا انا قلى كلك نظر اديته 20 جنية ادانى ورقة اروح ادف بيها الضريبة كانت 340 جنية قالى ادغع وتعالى تانى روحت دفعت فى الخزنه وسيبت الـ 10 جنية الباقى .
    
    
15. رجعتله ادانى ورقه وقالى روح بقى فك النمر ووديها تسلمها روحت فكتها بـ 5 جنية وسلمتها فى الشباك التسليم بـ 5 جنية .
    
    
16. ورجعت للموظف خد منى الوصلات ده وقالى ارتاح حوالى نص ساعه واخد الرخصة وقالى تورح تجيب بيها النمر الجديدة وكان معايا اذن صرف دفعت برده حلاوة النمر 5 جنية وانا باخدها من المخزن .
    
    
17. روحت ركبتها بـ 5 جنية .

• بس يا رجاله والحمد لله ديت الحكاية وادينى اهوه واقف قدامك لسة صاحى من امبارح الساع 2عصرا لما رجعت من المرور لحد دلوقتى
  
• لكن هو عموما الدنيا هناك فاضية تماما ما كنش فية 20 عربية هناك يمكن 15 وشبابيك كتيره تعملك نفس الغرض وشباكين خزنه والحمد لله عديت على خير .

[ehab_mansour]

الف مبروك الترخيص ونقل الملكية
بس انت كده رخصت سنتن مش كده ؟ لأن ضريبة 340 جنيه دي لسنتين بس ازاي بقي دفعت تأمين سنة واحده و 111 جنيه ؟ لأنه المفروض 130 جنيه لسنتين
علي العموم بالتوفيق وربنا يباركلك فيها

[egman]

والله يا ايهاب باشا هى سنة الى رخصتها يمكن علشان فى نقل ملكية الموضوع بيزيد مش عارف الله اعلم !!!