إستفســـار عن ضعف موتور الإيبيــزا موديلات 200 -2001-2002

[doglas]

اخوانى الأعضاء

هذه أول مرو أكتب في هذا المنتدى الرائع ، و أتمنى ان نتواصل دائما

أبحث منذ فترة عند سيارة سيات إبيزا موديل 2000 او 2001 او 2002 و لكن تكون 1400 سي سي ، وقد وجدت طبعا من هذا الموديل 1000 سي سي فقط
و لكن منذ بضعة أشهر وجدتها ( ال 1400 سي سي ) و كان طالب والله مبلغ مغري جدا لأنه كان محتاج فلوس ، كان طالب 50000 جنيه فقط ، و حالة السيارة رائعة
و لكن للأسف مكنش معايا فلوسها وقتها
من كتر الزهق فكرت أجيب ال 1000 سي سي و خلاص ، و قلت الاول اجربها من واحد صاحبى معاه العربية دى ، بس اول ما جبت بيها سرعة 120 لقيت ال RBM نط لفوق و صوت الموتور كان عالى جدا ، طبعا عشان عربية ضعيفة

فهل يوجد من أهل الخبرة يقوللى على ظروف العربية ال 1000 سي سي دى ايه و بالذات مع التكييف ؟ و كمان عايز اعرف ليه مش موجودة كتير ال 1400 منها و لو حد يعرف واحدة معروضة للبيع يقوللى

و لكم جزيل الشكر

[Omar M]

محرك الابيزا 1000 cc هو نفس محرك البولو 50hp وهو من وجهة نظرى ضعيف على وزن السيارة و حجم البودى و هى استجابتها بطييئة على الأول و الثانى بس بعد كدة أدائها جيد جدا
ما عنديش تكييف فا مقدرش أفيدك

[hazem_khidr]

من وجهة نظرى ضعيف على وزن السيارة و حجم البودى و هى استجابتها بطييئة على الأول و الثانى بس بعد كدة أدائها جيد جدا

اي عربيه الماني استجابه الاول و التاني بتوعها مش سريعه حتي اللانوس(كوري لكن الموتور من اوبل) نفس الحكايه بالضبط.
انا مجرب الابيزا ال 1000 سي سي قبل كده .تكييفها حلو جدا و استهلاك البنزين حلو بصراحه لكن ما يدفعش فيها 50 الف و هو دا تمنها في السوق لكن كتير,
رايي انك تشوف عربيه اوبل كورسا موديل قبل 98 موتورها 1300 سي سي و عربيه شديده و تمنها مش حيزيد عن 40 الف دا لما تكون فابريكه بره و جوه و حالتها شاذه.
انما من المستحيل انك تلاقي ابيزا 1400 و لو لقيتها حتلاقي اللي راكبها شاب و مبهدلها احلي بهدله

[doglas]

شكرا على الردود يا جماعة
بس انا العربية اللى لاقتها دى كانت والله بحالة ممتازة لكن النصيب بقى
بس يعنى في رأيكم إنى الواحد ممكن يجيجبها و لا هيتخنق من عدم السحب ده ، و يا سلام لو كان محمل كمان ناس معاه
العربية كده مش هتطلع أصلا :)
المشكلة إنى بحب أسوق عربية يكون فيها الاول و الثانى روحه طويلة شوية ، مبحبش أنقل علطول ، زى واحد قريبى عنده فيات باليو ال 1000 سي سي لما بسوقها مش بلحق احرك العربية و لازم أنقل عشان صوت الموتور فضيحة
بالنسبة يا حازم للأوبل كورسا انا مش بحبها عشان فعلا قطع غيارها عالة جدا و حجم العربية ضغير
عالعموم مستنى ردود من باقي العضاء اللى يقدروا يفيدونا في الموضوع ده

[معاذ الشرباصى]

انا معايا البولو مو 99

هى نفس موتور الابيزا و الشاسيه, و حاجات كتير مشتركة مع بعض

العربية سحبها حلو, مش وحش بالنسبة ل 1000 سىسى

و التانى ممكن تجيب به لحد 60-70 لو بتحب تحرق, و التالت يجيب ال 100 كمان, و الصوت مبيبقاش فيه مشكلة

العربية ساعات كتير بتبقى راكب فيها 6 او 7 اشخاص و بجيب ال 120 عادى, و ممكن ازود لو عاوز بس مبحبش

[doglas]

ربنا يباركالك فيها يا معاذ ، إنت كده بتطمنى اكتر إنى أجيبها
بس ما قولتليش أخبارها ايه و انت مشغل التكييف ؟

[Hossam_Hassan]

العربية ساعات كتير بتبقى راكب فيها 6 او 7 اشخاص و بجيب ال 120 عادى, و ممكن ازود لو عاوز بس مبحبش

ايه يا معتز؟ حرام عليك يا دكتور، 6 أو 7 راكب؟ أكيد وهما نازلين ممكن ينسوا واحد مدفوس فى الكنبة :lol: :lol: :lol: :lol:

[ahmed1981]

شفت إمبارح إبيزا 1000 CC موديل 2000 مطلوب فيها 47 ألف قابل للتفاوض
يبدو إن فيها شغل في الرفرف اليمين وكذلك في البابين الشمال
كاملة مانوال الموتور صوته حلو لونها أسود
موجوده في معرض في عين شمس عند هندسة المطرية

[Ahmad]

بالنسبة للابيزا ال 1000 سي سي. أنا معايا موديل 98 بالتكييف الأصلي.
من وجهة نظري العربية سحبها ممتاز ك 1000 س سي . و علي فكرة اقل من 1500 سي سي مش حتلاقي اول و تاني بنسب كبيرة (بروح طويلة يعني).
العربية برضه فيها ميزة و هي السرعة القصوي ز انا جبت بيها و انا مسافر 145 كم/س و كان لسه فيها زيادة بس انا مكملتش و علي فكرة كان فيها 4 اشخاص من الحجم الظريف :mrgreen: و شنطهم.
بالنسبة للتكييف الأصلي, الأداء مقبول جدا. طبعا العربية بتتكتف شوية بس في الأول و انت طالع لكن مع السرعة تقريبا مش حتحس بالتكييف.وعن تجربة أداء العربية بالتكييف احسن من البولو الفوكس ال1300 بالتكييف بس البولو راكبلها تكييف (مش الأصلي)
أهم نصيحة ابعد عن السيارات اللي راكبلها تكييف مش اصلي علشان الموتور حتقل قدرته بدرجة كبيرة عكس التكييف الأصلي اللي بيبقي معمول حسابه علي عزم الموتور.

[doglas]

أنا شكلى كده هتوكل على الله و اجيب ال 1000 سي سي و ذنبي في رقبتكم :D :D :D
بس انا عندى سؤال عن الحركات اللى في العربية دى (أقصد الابيزا ال 1000 سي سي ما بعد موديل 99) الشكل قبل آخر واحد يعنى ، و انتو كلكو عارفين إنى أحلى حاجة في الإبيزا (و البولو و الجولف طبعا ) الحركات الصغيرة الحلوة اللى تحسسك إنك راكب عربية نظيفة بتحترمك
و على سبيل المثال لا الحصر الحجات الموجودة في موديل 94 GLX

- نور الصالون اللى بينطفى تلقائيا بعد خمس ثوانى من غلق جميع الأبواب
- تغيير إرتفاع حزام الأمان
- غلق الأبواب الخلفية للأطفال
- يمكن ضبط زر الشنطة بحيث تفتح مع السنتر أو لأ
- فوانيس الشبورة الخلفية
- إرتفاع السيارة عن الأرض بقدلر مناسب بحيث يصعب جدا إنك تحك في مطب حتى لو كنت محمل
- إضاءة في الشنطة و في درج التابلوه
- تغيير و ضعية كرسي السائق إنقلابا للخلف أو للأمام

و هناك المزيد طبعا ، بس أقصد هل في العربية دى كمان حركات أكثر من ذلك ( أقصد زيادة مثلا عن المفتاح الريموت و الإيرباج ) ، و هل كل هذا الموديل باور ستيرنج ؟
-

[Omar M]

جبها ان شاء الله مش حتندم عربية وااااسعة بالنسبة لفئتها وثابتة جدا و قطع غيارها معمرة

[معاذ الشرباصى]

فعلا مش هتندم

العربية ممتازة فى الثبات و بتجرى و صاج قوى

ربنا يوفقك و تلاقى حاجة نضيفة

[doglas]

يا جدعان الردود إتوقفت ليه كده ، عالعموم طيب حد يقوللى هى 8 صبابا ولا 16 ؟

شكرا

[qupid_forever]

دوجلاذ انا إنت عارف إنى انا كمان بدورعلى واحده ابيزا
ولقيت واحده 1400 بس لسه مش شوفتها يا ترى من رايك بجد هى احلى من 1300 ولا عادى
هى موديل 94
بس صاحبها طالب 40000
هى سنتر وريموت وتكيفوجنوط اسبور ولون اسود
بس انا بيتهيالى إنها غاليه بجد على 40000
يا ترى اعمل إيه
مستنى رايك بسرعه
كيوبيد

[doglas]

عربية ممتازة

يا باشا انا كن قصدى إنى بدور على 1400 موديل 2000 او 2001 ، مش 94 ، عالعموم ال 1400 سي سي موديل 94 عربية ممتازة فعلا لإنى ركبتها ، و أحلى ما فيها إنها بتنزل بالتكييف الأصلى ، يعنى التكييف مش بيحمل على الموتور غير حاجات بسيطه أوى
بس ياريت لاقي حاجة نظيفة منها ، عشان هى مش موجودة كتر فنطاق اختيارك هيكون على الضيق قوى ، عالعموم ربنا يوفقك

على فكرة أنا سألت واحد مير مبيعات في الشركة الهندسية (وكيل سيات و بورش في مصر ) قاللى إنى مفيش حاجة إسمها 1400 سي سي موديل 2000 او 2001 ، دى كانت غاطة من المصنع في أسبانيا لعشرين عربية نزلو مصر و عمة الموتور كانت غلط ( مكتوب عليها 1.4 ) بس بصراحة مش مصدق كلامه قوى لإنى شوفت ال 1400 سي سي دى كذه مرة ، بس يمكن تكون جاية من بره التوكيل !!!