انتوا فين يا ملاك السيات 133

[dr_radioooooo]

رحتوا فين يا شباب
مبشوفش ليه مواضيع خاصة بالسيات 133
حاجة من اتنين ياما بعتوا عربياتكوا السيات يا اما العربية دى انقرصت و انا اخر ملاكها
انتوا فييييييييييييييييييين

[dr_radioooooo]

على العموم لحد محد من ملاك ال133 يظهر اقلوكوا عل شوية معلومات عن السيات 133
الوزن الاجمالى للسيارة بدون السائق 690 كلجم
تانك البنزين 30 لتر
نيجى بأه للمفاجأة
القدرة الحصانية 34 حصان عند 4800 لفة و ده طبعا الnet مش الgross
وده بيحقق للعربية تسارع من 0 ل 100 فى زمن قياسى يقدر ب 32.2 ثانية
اما اقصى سرعة للسيارة 120 كلم \الساعة
اما متوسط استهلاك البنزين 7 لتر لكل 100 كيلو
نسبة انضغاط الموتور 8 : 1

[windofchange]

طيب بما ان حضرتك من ملاكها ايه رأيك فيها ؟ خصوصا بعد عمل التعديلات الخاصة بتبريد الموتور اللي مش مصمم يمشي في جو بلدنا...العربية مع خالي بس هو لما يجي يصلح او يعدل التعديلات دي مش عارف يابيسترخص يا بيعملها مش كامله فمبتديش النتيجة المرجوة من التعديل ده بخصوص تبريد الموتور \ التانك 30 لتر كويس متهيألي هو بتاع ال 128 كام اعتقد اقل من كده او مساوي \ هي في فتحتين كده فالتابلوه ده تكييف ولا دفاية بس؟
مش عارف ان بحسها عربية كويسة ومحترمة بس هي مع خالي خصوصا ان مشاويره قليلة جدا بتعطل جامد بسبب حوار السخونية مع ان في حلول ليها بس الزيتونة هنا ان التعديلات اللي معمولة عشان السخونية من 5 سنين مثلا فالعربية مبتسدش في 2011 مع زيادة الزحمة وكده وشايل الفبرتين اللي في غطا الموتور بيقول كده تبرد احسن بقلله معتقدش ايه رأيك؟ ربنا يباركلك فيها وياريت تحكيلنا كمان عنها ياباشا..........ايهاب

[dr_radioooooo]

بص يا باشا بالنسبة لمشكلة السخونة فلو دورة التبريد معمولها صيانة و مية مية عمرها ما هتسخن فى ظروف الاستعمال العادى
لكن بحكم تصميم الموتور و انه مبيجيلوش هوا من بره فانا بنصح ملاكها ان فى الصيف متعملش بيها مشوار اكتر من ساعة و نص متصلة لانها فعلا هتسخن
انا عن نفسى مش عامل اى تعديلات فى العربية غير انى غيرت الراديتير الفبريقة 2 ماسورة و جبت 4 ماسورة و مش هصدقنى لو قلتلك ان الاصلى كان مريح العربية اكتر
الحل للسخونية انه اهم شىء الصيانة لدورة التبريد اول كل صيف و ان شاء الله تمشى ذى الفل

[dr_radioooooo]

بالنسبة للسيات هى عربية مش وحشة لو حالتها كويسة بس ارجع اقولك ان ال127 و ال128 احسن بس لو حالة العربية كويسة و اعطالها قليلة صدقنى ممتعة و ليها احساس تانى غير كل العربيات
بالنسبة لتانك البنزين بتاع ال128 فهو فى حدود 35 لتر و الفتحتين اللى فى التابلوه دول مروحتين بس ضعيفة جدا تقريبا ملهومش لزمة

[dr_radioooooo]

بالنسبة للعربيتى فانا بعتز بيها جدا مع انى معايا فى نفس الوقت باسات 99 الا انى عمرى مهفرت فيها لانها ليها عندى زكريات كتير
الناس بتستغرب ازاى انزل من الباسات اركب سيات
اقولهم السيات بحبها اكتر ميصدقونش مع ان بينى و بينك التكيف بتاع الباسات بيخلينى افضلها فى الصيف
العربية دى عزيزة عليا اوى لدرجة ان لوحد حب يستلف منى عربية اقوله باسات اه سيات لااااااااااااا

[dr_radioooooo]

واضح انى بكلم نفسى و انا اخر ملاكها فى المنتدى

[shahin15]

معلش ان ماحدش بيرد عليك لكن انا رديت
على فكرة حاليا بحاول اشتري اول عربية في حياتي
و 133 ضمن خياراتي لكن وطبعا كل اللي اعرفهم واللي
ما اعرفهم ضدي في شراءها اوال 126 لكن الله المستعان
و اقرر.

[shahin15]

وكنت عايز اعرف في ال 127 فيها موديلات سيات

[dr_radioooooo]

خليك فى ال128 موديل السبعينات ال1100 سى سى اللى فانوسها الامامى مدور
احسن من كل دول

[windofchange]

المنتدي عندنا نايم شويه بس انت منورنا يا د راديووووو شكرا عالكلام الجميل ده بس ازاي الردياتير الاصلي ال2 ماسورة كان مريحها اكتر؟ وفي واحد اعرفه قطع في الصاج من تحت العربية ماحية الردياتير بحيث وانت ماشي يخش للموتور هواء من تحت وبيحلفللي عمرها ماهتسخن معاك سمعت الحكاية دي

[dr_radioooooo]

المنتدي عندنا نايم شويه بس انت منورنا يا د راديووووو شكرا عالكلام الجميل ده بس ازاي الردياتير الاصلي ال2 ماسورة كان مريحها اكتر؟ وفي واحد اعرفه قطع في الصاج من تحت العربية ماحية الردياتير بحيث وانت ماشي يخش للموتور هواء من تحت وبيحلفللي عمرها ماهتسخن معاك سمعت الحكاية دي

انا نفسى مش عارف ازاى الاتنين ماسورة كان احسن
بس فى حاجة مهمة العربية دى علمتهالى
ان افضل حاجة بالنسبة لاى عربية هى الفابريقة بتاعتها - انا بتكلم طبعا من الناحية الاقتصادية و العملية و راحة البال - .

[dr_radioooooo]

نصيحة على الماشى لحد محد من ملاك 133 يظهر
عندنا فى السيات العربية لما بتسخن 99% من الصانيعي بيحصروا العيب فى حاجتين يا رادياتير عايز يتنظف يا طرمبة مية عايزة تتغير
و تعد تظبط فى الاتنين دول و العربية بردو بتسخن
ففالاخر يقولولك اصل السيات من عيوبها انها بتسخن
المهم فى مرة مقتنعتش بالكلام ده و روحت عند واحد غاوى ميكانيكة وواخدها هواية لقا ان الوصلة اللى بين وش السليندر و الخرطوم اللى داخل فيه مسدود لان الحتة دى ضيقة جدا ...... المهم سلكها والعربية بقت زى الفل
الخلاصة العربية دى لو دورة التبريد بتاعتها مية مية مش هتسخن معاك فى حدود التشغيل العادى

[windofchange]

تمام حاجة متجيش عالبال والخاطر حكاية الوصلة دي دي فبر ولا حديد ووظيفتها ايه بتمشي فيها مياه التبريد واكيد طبعا تسمع عن رابطة الغلابة اصحاب السيات علي منتدي آخر والله هم مش غلابة بس هي طرفة من صاحب الرابطة ههههههه

[sab3aawy]

امتلكت 4واحدات من هذة السيارة فى حياتى، وتعتبر اكتر ماركة سيارة اشتريتها، الاولى عام 1995 وبعتها اول عام 1997 وكانت افضلهم، الثانية كانت عام 2001 واستمر ت معى عدة شهور وبعتها فى آخر 2001
الثالثة كانت عام 3003 وبرضه عدة شهور ثم بعتها فى آخر 2003
الرابعة فى 2005 وبعتها فى 2007
الأولى كانت ممتازة
الثانية والثالثة كانوا معقولين وان كانت اعطالهم كثيرة
الرابعة توبتنى عن انى افكر ان الماركة دى موجودة اصلا على وجه الأرض

العربية دى ليها ميزات وليها عيوب

ميزات: ثابته على الأرض ، شاسيهها متين جدا ، صالون مساحته معقولة بالنسبة لحجم السيارة، قطع غيار الموتور متوافرة وبكثرة وكل قطع غيار ال 127 بتركب على موتورها،
عيوب: السخونة المفرطة التى تقصف عمر المحرك بسرعة، نسب تخفيض الجيربوكس بتخلى العربية متجريش برغم ان موتورها قدرته الحصانية معقولة، الجيربوكس بتاعها اعطالة كثيرة جدا وقطع غياره من الصعب جدا العثور عليها زمفيش فتيس غير بتاعها بيركب عليها، المارش بتاعها بيبوظ بسرعة جدا، كاربراتيرها مشاكله كتير ،مشاكل الفلانشات ، القدم الشديد للسيارة يجعلها عرضة لمشاكل غير متوقعة(احد اصدقائى وقع بيه كرسى السائق وهو ماشى بالعربية ولقى نفسه فى الشارع تحت لعربية بسبب البارومة ، وربنا ستر انه لحق فرمل)

تعديلات تصلح لها: تركيب موتور 127، تركيب مارش 127، تركيب كاربراتير 127 (مع تعديل بسيط فى كل من الموتور والمارش علشان موتورها بيلف عكس اتجاه موتور ال127)، ميت ألف تعديل لنظام التبريد وكلها بلا فائدة، تعديل نظام جر السيارة الى كبالن

بمنتهىالامانة ومع كل احترامى وتقديرى للى راكبين هذة السيارة، اللى راكبها اهو عارف بيتعامل معاها ازاى، لكن لو حد بيفكر يشترى يدور على اختيارات اخرى، لأن تكاليف صيانة هذة السيارة مرعبة وقطع غيارها فيما عدا الموتور صعب العثور عليها، انا اخر سيارة سيات جبتها اقسم بالله صرفت عليها فى سنة ونص اكتر من ضعف مجموع اللى صرفته على صيانة صنى 2007 لمدة 3 سنوات +اللى صرفته كورولا 2010 لمدة سنة ونص، (مجموع صانات الصنى +بطارية جافة خلال 3 سنوات 1500 جنيه، مجموع صيانات الكورولا فى سنة ونص +بطارية جافة 1500 جنيه، المجموع 3 آلاف جنيه) العربية السيات 133 انا صرفت عليها 6 آلاف جنيه،عملت لها عمرة موتور(بسبب السخونة)، غيرت الفتيس مرتين، عدلتها كبالن، عدلت نظام التبريد عملته كهرباء وركبت لها مروحة اللادا، ورغم ذلك مافيش مشوار كانت بتكمله للآخر وتتفنن فى ابتكار اعطال لا يمكن تخطر للأنسان على بال ، اول مرة فى حياتى اشوف عربية الأكس بتاعها بيخرج من مكان بياته فىالكوبلن(حصلت معايا فى عربيتين سيات 133)، المارشات دى كانت بتستهلكهم زى البنزين والزيت، كنت كل شهرين او تلاتة اجيب مارش، اول وآخر عربية ااشوفها فى حياتى بدال الدبرياج بتاعها بيفوت فى الأكس بتاعه(حصلت معايا فى عربيتين سيات) ولما الحم البدال فى الأكس بتاعه تقوم الأرضية تضرب تحت منه وآجى ادوس دبرياج ينزل بالأرضية والعربية متفصلش ، ومرة الضفيرة بتاعتها ولعت وانا ماشى فوق كوبرى وكانت لما تخلص كل الأعطال اللى تخطر على بال واللى ما تخطرش فردة كاوتش تضرب ولازم تضرب فوق كوبرى او نفق، يعنى كان العادى بتاعى مع أى عربية انى انزل من البيت ، اروح بيها مشوارى وارجع بيها، مع ال سيات 133 كان العادى انى انزل من البيت ، اخرج بيها، ارجع من غيرها