عايز رايكم فى شراء كاوتش جديد للايبيزا وجنوط

[egman]

السلام عليكم ورحمة الله وبركاته

انا كنت عايز اجيب طقم كاوتش جديد للايبيزا موديل 94 مقاس الجنط 14 وهى جنوط اسبور تفاصيل : 185/60 82 h
على فكرة المقاس ده انا جايبة من على غطاء تنك البنزين بتاع العربية .
كنت عايز اعرف رايكم بين الانواع ده :

1. كومهو كوري
   
   
2. كومهو فيتنامي
   
   
3. هانكوك مش عارف اية بلد صنعه وبيكون منه كام نوع .
   
   
4. جي تي

شوية اسئلة بخصوص الكاوتش :

1. يا ترى اى الانواع افضل وكمان لو سعر كل نوع يبقى تمام اوى ؟
   
   
2. كمان محتاج اماكن بيع تكون معروفة وكبيرة فى مدينة نصر او حدائق القبة الرحاب او المهندسين ؟
   
   
3. واية افضل نقشة ممكن الواحد يجبها ولا هو موضوع النقشة ده بيكون على حسب كل نوع يعنى ممكن نوع ما لقيش فيه غير نقشة واحدة بس ؟
   
   
4. وموضوع النقشة ده فعلا بيفرق فى صوت العربية وهى ماشية او صوت الكاوتش واى شكل من النقشات يكون هادى ؟
   
   
5. طيب هو بالضرورى موضوع انى لازم اجيب الكاوتش يكون 82 اتش ده ولا ممكن اى رقم تانى بس يكون فى فئة الــ إتش لانى سمعت وانا بسئل قبل كده التاجر يقول اية عايز اتش ولا تي لكن مش بيدققوا فى موضوع الرقم الى قبل الحرف سواء الاتش او التي ؟
   
   
6. انا عندى الكاوتش الى راكب كله كله مشقق ما فيش فية سنتى سليم ده الى انا جبت بيها الجنوط لانها مستعملة هل ده يخلى العربية تدبدب وتتهز فى المشي والطارة تلعب منى ؟
   
   
7. هل التشققات بالاضافة على انه ممسوح يخلى صوت الكاوتش يعمل زي تنفيس وانا ماشي بالعربية او صوت اكنه عجلة او بالونه منفوخة وبتريح ؟

شوية اسئلة بخصوص الجنوط :

1. هل الجنوط الاسبور ليها ترصيص لانى اول مرة اركبها ومش عارف اية النظام وبيكون شكلة اية زي العادى ؟
   
   
2. هل ضرورى انى اعمل رنجات للجنوط ؟
   
   
3. طيب انا الجنوط عندى خامة الومنيو يا تىر كويسة ولا اية وهل فى حد بيقوم بطلاء الجنوط او رشها ؟

انا عارف ان الاسئلة كتير بس ان شاء الله هيكون مرجع لموضوع الجنوط والكاوتش عموما ان شاء الله

[تامر.محمد]

السلام عليكم ورحمة الله وبركاته

انا كنت عايز اجيب طقم كاوتش جديد للايبيزا موديل 94 مقاس الجنط 14 وهى جنوط اسبور تفاصيل : 185/60 82 h
على فكرة المقاس ده انا جايبة من على غطاء تنك البنزين بتاع العربية .
كنت عايز اعرف رايكم بين الانواع ده :

1. كومهو كوري
2. كومهو فيتنامي
3. هانكوك مش عارف اية بلد صنعه وبيكون منه كام نوع .
4. جي تي

(انا كنت مركب هانكوك كوري بقى لي سنتين و لسه مؤخرا مغيره ببريدجستون تايلندي (جبت نفس المقاس بتاعك ده بالمناسبة) , الفرق بشع, كأني كنت مركب عجلات عربية كارو)

شوية اسئلة بخصوص الكاوتش :

1. يا ترى اى الانواع افضل وكمان لو سعر كل نوع يبقى تمام اوى ؟

(الأفضل على حد علمي البريدجستون و الميشلين يليهم الجود يير و البريللي, فردة البريدجستون ال14 بتعمل 400 و شوية لسه جايبها من كام يوم و جامدة جدا)

1. كمان محتاج اماكن بيع تكون معروفة وكبيرة فى مدينة نصر او حدائق القبة الرحاب او المهندسين ؟

فروع بريدجستون في الرحاب و عباس العقاد و عمارات العبور , محلات الكاوتش في احمد سعيد و الحي السادس جنب القسم

1. واية افضل نقشة ممكن الواحد يجبها ولا هو موضوع النقشة ده بيكون على حسب كل نوع يعنى ممكن نوع ما لقيش فيه غير نقشة واحدة بس ؟
2. وموضوع النقشة ده فعلا بيفرق فى صوت العربية وهى ماشية او صوت الكاوتش واى شكل من النقشات يكون هادى ؟

حسب انت استخدامك للعربية ايه , فيه نقشات بيبقى ميزتها ان صوتها واطي , و فيه نقشات بتبقى للاستخدام الرياضي , ثبات اعلى و فرامل اقوى , الكلام ده طبعا في الماركة نفسها , انما الماركات نفسها زي ما بتتفاوت بينها في الاسعار بتتفاوت في الامكانيات, اهدا كاوتش معروف لقيته هو البريدجستون Turanza GR 90 , بس غالي جدا , الفردة عاملة حوالي 500 جنيه , بس عموما البريدجستون الرياضي اللي انا جبته اهدا بمرااااااااااااااااحل من الهانكوك العادي اللي كنت مركبه

1. طيب هو بالضرورى موضوع انى لازم اجيب الكاوتش يكون 82 اتش ده ولا ممكن اى رقم تانى بس يكون فى فئة الــ إتش لانى سمعت وانا بسئل قبل كده التاجر يقول اية عايز اتش ولا تي لكن مش بيدققوا فى موضوع الرقم الى قبل الحرف سواء الاتش او التي ؟

ده رمز اقصى سرعة مفروض يمشي عليها الكاوتش , انا مش حافظهم للأسف

1. انا عندى الكاوتش الى راكب كله كله مشقق ما فيش فية سنتى سليم ده الى انا جبت بيها الجنوط لانها مستعملة هل ده يخلى العربية تدبدب وتتهز فى المشي والطارة تلعب منى ؟

في رأيي , طبعا

1. هل التشققات بالاضافة على انه ممسوح يخلى صوت الكاوتش يعمل زي تنفيس وانا ماشي بالعربية او صوت اكنه عجلة او بالونه منفوخة وبتريح ؟

مش هاعرف افيدك في دي

شوية اسئلة بخصوص الجنوط :

1. هل الجنوط الاسبور ليها ترصيص لانى اول مرة اركبها ومش عارف اية النظام وبيكون شكلة اية زي العادى ؟

ليها مفروض

1. هل ضرورى انى اعمل رنجات للجنوط ؟

على حسب قطر الصرة اللي في العربية و قطر صرة الجنط, لو فيه فرق يبقى لازم رينجات

1. طيب انا الجنوط عندى خامة الومنيو يا تىر كويسة ولا اية وهل فى حد بيقوم بطلاء الجنوط او رشها ؟

اظن كل الجنوط الاسبور بتبقى المونيوم , بس طبعا جودة خامة الجنط بتفرق و عادة بتبقى حسب بلد المنشأ , الصيني مش زي الياباني طبعا
بخصوص الرش بتوع الدوكو بيرشو الجنوط ايوة

انا عارف ان الاسئلة كتير بس ان شاء الله هيكون مرجع لموضوع الجنوط والكاوتش عموما ان شاء الله

ربنا يوفقك :)

[egman]

الف شكر لحضرتك على سرعة الرد بس انا كنت عايز اعرف حضرتك لما كنت مركب الهانكوك كان عامل معاك اية فى الصوت والفرامل والمطبات نعام ولا لأ ؟

انا محدد الانواع ده بس مش اكتر علشان الميزانية ..........

[ehab_mansour]

بصراحة بخصوص الكاوتش انا ما ركبتش من يوم ما اشتريت العربية غير بريدجستون ياباني وتايلاندي لأن بقيت الأنواع دي ركبها زملاء لي وتعبانه جدا وانا بصراحة ما عنديش تفريط في موضوع الثبات والفرامل والاتنين دول الكاوتش عامل أساسي مهم جدا فيهم

لذلك ارشحلك بريدجستون وده اللي انا جربته وممتاز
بخصوص موضوع الجنوط الاسبور فأنا ما أفهمش فيه لأني عندي جنوط عادية

[egman]

الف شكر ليك يا باشا جزاكم الله كل الخير وشكلى كده تقريبا هجيب جي تى تقريبا وهبقى اقولكم عملت اية

[تامر.محمد]

الف شكر لحضرتك على سرعة الرد بس انا كنت عايز اعرف حضرتك لما كنت مركب الهانكوك كان عامل معاك اية فى الصوت والفرامل والمطبات نعام ولا لأ ؟

انا محدد الانواع ده بس مش اكتر علشان الميزانية ..........

سيء سيء سيء على الترتيب
صوته عالي , و خشن, و ناشف , و بيزحف مع الفرامل
و بصراحة ما انصحش بيه مطلقا , حتى عشان الميزانية
لو كده هات جي تي مثلا كان ممدوح بيقول انه كويس , انما هانكوك لأ كبيرة اوي

[elpasha1]

بصراحة بخصوص الكاوتش انا ما ركبتش من يوم ما اشتريت العربية غير بريدجستون ياباني وتايلاندي لأن بقيت الأنواع دي ركبها زملاء لي وتعبانه جدا وانا بصراحة ما عنديش تفريط في موضوع الثبات والفرامل والاتنين دول الكاوتش عامل أساسي مهم جدا فيهم

لذلك ارشحلك بريدجستون وده اللي انا جربته وممتاز
بخصوص موضوع الجنوط الاسبور فأنا ما أفهمش فيه لأني عندي جنوط عادية

+111

[SYD]

تجربتي الشخصية

انا كنت مركب كومهو وحش
وركبت هانكوك زيه بردو (وحش)
وركبت نوع مغمور بس طلع حلو اسمه كورسا بصراحة صوته هادي وسحب العربية فرق جدا جدا والفرامل بتاعته حلوة وبيعيش، بمعني انه لو افترضنا واتخرم ممكن تفضل تزود وتمشي عليه شهر علي عكس الكومهو لو قدم معاك ممكن لبانة تخرمه
وملحوظة في موضوع اللحام اوعي تلحم خابور لأنه بجد خابور واتدب في العجل، بيبوز تيل العجل ويضعفه ومع الوقت تعمل معاك ريجة ودبدبة
لو هتلحم استخدم المكوة ، مش هتلقيها عند كل الناس حاول تدور علي حد امين بيعمل مكوة واتعامل معاه وخلي بالك اكتر ناس تعمل شغل هما بتوع الكاوتش، اوعي تزود هوا في المحطة وانت بتمون العربية او حد وانت ماشي يكون واقف ويقولك الفردة نايمة، ولحسن حظك قال تلاقي بتاع كاوتش علي بعد خطوة.
وانتبه لنقطة في غاية الاهمية، 99 في الميه من بتوع الكاوتش بيستخدموا مقياس صيني بقالو عندهم 100 سنة، اساسي بيبقي مخرف بمعني انك تضبط علي 28 وهي في الأصل 42 مثلا هما طبعا بيعمل معاهم مصلحة لآنه لو مظبوط مش هتدفع لكن في كل مرة لازم اكيد هيزود وبالتالي هتدفعله
حاول تدور علي حد بجد امين ونظيف وبيغير مقياسه علي الاقل كل اسبوع زي ممدوح غطاطي في فيصل او محطة عندها مقياس الكتروني زي موبيل الرمايه

[egman]

انا الحمد لله يا شباب ربنا وفقنى وجبت الجي تي الفرده عاملة 350 جنية والحمد لله مرتاح معاه جدا جدا جدا وبنصح الناس بيه لانى كنتى مركب بيرلى كنت بسمع صوت الكاوتش وخرفشته على الاسفلت دلوقتى الحمد لله الموضوع ده انتهى .

[SYD]

مبروك علي الارض
وربنا يسلم طريقنا جميعا

[ehab_mansour]

انا الحمد لله يا شباب ربنا وفقنى وجبت الجي تي الفرده عاملة 350 جنية والحمد لله مرتاح معاه جدا جدا جدا وبنصح الناس بيه لانى كنتى مركب بيرلى كنت بسمع صوت الكاوتش وخرفشته على الاسفلت دلوقتى الحمد لله الموضوع ده انتهى .

مبروك يا باشا
ومتنساش تضبط زوايا ضروري بعد تغيير الكاوتش وأكيد طبعا رصصت الفرد مع تركيب الكاوتش الجديد وربنا يباركلك فيه

[macgiver30]

السلام عليكم
محدش عندو ابيزا 94 - 98 حالة جيدة جدا للبيع ?

[egman]

الله يبارك فيكم والف شكر ليكم يا شباب

[behman]

موضوع 10/10 ... الله ينور يا شباب