الوش اتفشكل

[SYD]

السلام عليكم ورحمة الله وبركاته

من حوالي شهر (اقل من شهر والله) روحت سمكرت الوش عندي عشان الفحص ونقل الملكية
الصراحة الراجل عمل الي عليه وعمل زرجينة وانا بنفسي الي كنت بعملها (انا الي كنت سايق العربية)

وبعد ما خلص وركب الفوانيس والشبكة وظبط علي الأكصدام والكلام دة ، الوضع اتحسن كتير وتوزيع الأنارة فرق بشكل ضخم جدا

امبارح كنت في مشوار في وسط البلد وكانت المسافة بيني وبين العربية الي قدامي لا تتعدي النص متر
تقريبا سرحت وطلعت بالعربية بسرعة لا تتخطي ال10 كم/ ساعة
المهم ريحت علي الزبون ومن خفة الصدمة لا انا ولا هو نزلنا حتي نبص

بعدها اتفاجأت ان الوش باظ تماما وبليل الفانوس اليمين ضارب في الأرض بعد الأكصدام بحوالي 60 سم

المهم بليل فرجت واحد صاحبي علي العربية واتفقت معاه هروح لواحد بتاع فيبر عشان الأكصدام من الحادثة (مع انها لمسة) اتقطع وشرخ من ناحية الفانوس اليمين

وبعد ما ركب معايا وكنت بوصله لعربيته لمست شيكارة اسمنت متعبي فيها رملة ورتش وكلام من دة وانا بلف وشي وتقريبا الشيكارة لمست العتب الي تحت الأكصدام الأمامي
بعد ما لفيت وشي وماشي لقيت الي بيجر تحت العربية نزلت ببص لقيت العتب (الكساحة) مخلوع نصها وبمجرد ما بشدها طلعت كلها في ايدي وحطيتها علي الكنبة ورا

الخلاصة

انا عايز اعرف ليه الأكصدام وراه فاضي ومفيش اي تدعيم للمنطقة دي ؟؟؟ يعني من اول لمسة (غيرلي سنيني) الوش يحصله كدا !!!!!!!

ومن اول لمسة ، الكساحة تتفك بالسهولة دي !!!!!!!!!

أرجو الأفادة

والله المستعان
،
،

امضاء ،

محمد منير

[ehab_mansour]

يعوض عليك يا هندسة

الخلاصة في هذا الموضوع ان اللي ظبطلك الوش و الاكصدام ممفكرش ان مع اول لمسه كله هيضيع
حضرتك اللي بيحمي الفوانيس و وش العربية هو الفل المضغوط اللي تحت الاكصدام(واقي لامتصاص الصدمات) لأن المفروض الاكصدام هو اللي يتحمل الخبطة ومتوصلش للفوانيس ولا الصدر اللي راكبه عليه وده كان ضايع عندي في الابيزا اللي فاتت اللي زي عربيتك
وانا بسمكر العربية دي و بضبط وشها انا اللي فكيت الكصدامات و انا اللي عملتلها فل مضغوط تحتها و انا اللي ركبتها و قفلتها هي و الفوانيس عشان لما يحصل اللي حصلك ده ملقيش كله في الأرض

وفضلت معايا ما يقرب من سنتين سليمة بفضل الله سواء دخلت في حد او حد ريح عليها خفيف وهو بيركن

فيه حل أخر وهو تغيير الوش كله تماما و اللي تشتريه هييجي بالحديد اللي تحت الاكصدام و بالفل المضغوط راكب عليه ومعاه اكصدامه و حاجته

[SYD]

اولا شكرا ياباشمهندس علي الرد

بس حضرتك جبت الفل المضغوط منين ؟؟

وهل لو روحت لواحد بتاع فيبر ممكن يتصرفلي فيه ؟؟؟؟\\\


والله المستعان
،
،

[windofchange]

يعوض عليك يا هندسة

الخلاصة في هذا الموضوع ان اللي ظبطلك الوش و الاكصدام ممفكرش ان مع اول لمسه كله هيضيع
حضرتك اللي بيحمي الفوانيس و وش العربية هو الفل المضغوط اللي تحت الاكصدام(واقي لامتصاص الصدمات) لأن المفروض الاكصدام هو اللي يتحمل الخبطة ومتوصلش للفوانيس ولا الصدر اللي راكبه عليه وده كان ضايع عندي في الابيزا اللي فاتت اللي زي عربيتك
وانا بسمكر العربية دي و بضبط وشها انا اللي فكيت الكصدامات و انا اللي عملتلها فل مضغوط تحتها و انا اللي ركبتها و قفلتها هي و الفوانيس عشان لما يحصل اللي حصلك ده ملقيش كله في الأرض

وفضلت معايا ما يقرب من سنتين سليمة بفضل الله سواء دخلت في حد او حد ريح عليها خفيف وهو بيركن

فيه حل أخر وهو تغيير الوش كله تماما و اللي تشتريه هييجي بالحديد اللي تحت الاكصدام و بالفل المضغوط راكب عليه ومعاه اكصدامه و حاجته

فعلا حضرتك جبت منين الفل المضغوط؟ :) وعموما الصدر الاستيراد باكصدامه ده قليل مهتلاقيه فالحرفيين (وده اكتر مكان شفته قطع غيار ايبيزا49ل99)اللي شفته من فترة قصيرة صدر من غير حاجة صاج بس وطبعا الفل الملزوق عليه مش موجود صاج بس

[ehab_mansour]

يا جماعه واقي الصدمات ده انا صنعته من الفل المضغوط اللي بيتعمل بيه أطباق الورد الصناعي عملت منه طبقتين او ثلاثة مش فاكر وطبعا لزقته في بعضه وفي الاكصدام من الداخل بشمع وبس
وبعدين بدأت أخف منه في الأماكن اللي المفروض يكون قليل فيها و أزوده في أماكن أخري عشان لما يركب علي الصاج يكون مضبوط مع الوش ومش خارج لبره

الأدوات المستخدمه :-
1- فل مضغوط اللوح تقريبا متر في متر تقريبا ب 3 او 5 جنيه او أقل مش عارف لأنه كان عندي مشتريتهوش
2- مسدس شمع او ممكن تستخدم سيليكون بس هتسيبه فترة عشان ينشف وانت ضاغط علي الفل جوه الاكصدام
3- كتر لتقطيع الفل و تخفيفه حسب الحاجه بطول الاكصدام

وعلي فكرة الموضوع ده انا مشفتهوش قبل كده ده من تفكيري الشخصي عشان أحاول تصنيع واقي اكصدام بديل للأصلي عشان لما تركب الاكصدام ميقعش من أقل خبطه و يفضل ثابت و قوي مع اي ترييح وانت بتركن او و غيرك بيركن

ملحوظة يجب لزق الفل المصنع بالاكصدام في المكان المقابل للوش الصاج و بزيادة مثلا ثلاثة سنتيمتر فوق و تحت أعرض من الصاج عشان تتأكد ان الواقي اللي صنعته يقابل الصاج و يلامسه جيدا عشان ميتخلعش من اي خبطة لأن واقي الاكصدامات الأصلي بيكون مثبت علي الوش الصاج نفسه وليس داخل تجويف الاكصدام

والله الموفق و المستعان

[windofchange]

جزاك الله خير يا بشمهندس اه خسارة مكنتش اعرف الفل ده نظامه ايه رشيت حاجة كده بتتجمد وتبقي شبه الفل المضغوط بس الفل المضغوط حاجة تانية ان شاء الله اعمله بالاكصدام الخلفي الامامي عندي ربنا يستر عليه بفكر اركبله ديفيندر والله