محتاج مساعة كل الابيزاوية - ضرووووووووووووووررررررى

[Mohamedseddeek]

أنا أول مرة اشترى عربية
وبعد تفكير كتير
كتيير
كتييير
كتيييييييييييير
قررت انى اقتنى حبيبتى الابيزا 2000 او 2001
بس طبعاً كلام الناس كتير اوى اوى اوى ... قطع غيار غالية ... عربية مش حلوة ... مالهاش ميكانيكى ... كده يعنى بس انا بصراحة بعز العربية دى والموديل ده اوى اوى اوى وخايف اندم بعد مااشتريها.
انا قريت كتير عن موضوعات الابيزا اللى فى المنتدى ... بس طمعان فى معلومات اكتر من الرجالة الابيزاوية ... ياترى هتساعدونى ؟؟؟
عايز اعرف منكوا :
1. مميزات العربية
2.عيوبها ومن الاخر كده ايه اهم حاجة ممكن تقرفى وانا معايه العربية دى.
3.اسعار النضيف منها دلوقتى
4.لو فى حد منكم بيبعها يقولى
واسف على الازعاج ...

[Ahmed Mubarak]

السلام عليكم
قرار موفق ان شاء الله واختيار جيد

1. مميزات العربية
موفرة جدا فى استهلاك البنزين - قطع غيار متوفرة جديدة واستراد ولو نزلت الحرفين بنفسك هتتاكد -ميكانيكية كتير جدا واى حد ممكن يشتغل فيها ( وممكن تعمل بعض الصيانات بنفسك - بفضل الله انا بعمل كدة بمساعدة الاعضاء هنا فى المنتدى )
2.عيوبها ومن الاخر كده ايه اهم حاجة ممكن تقرفى وانا معايه العربية دى.
العيب الوحيد ان الشنطة بتاعتها مش كبيرة اوى زيها زى اى عربية هتتش باك
3.اسعار النضيف منها دلوقتى
اعتقد 42 الف
4.لو فى حد منكم بيبعها يقولى
انتظر رد الاعضاء لو حد ناوى
واسف على الازعاج ...

لا ازعاج ولا حاجة
ربنا بوفقك للخير

[Mohamedseddeek]

متشكر جداً يا أحمد بيه ... بس انا معرفش الحرفيين دى فين مع العلم انى مش من سكان القاهرة

ومستنى آراء باقى الأعضاء الإبيزاوية الجامدين اوى

[SYD]

اولا اهلا بيك عضو جديد معانا

استاذ احمد مبارك حبيبي طبعا قال كل الي ينفع يتقال في كلمتين باختصار يعني بكلمتين جاب الزتونة زي مابيقولوا

هي فعلا كمميزات
اقتصادية لأبعد حد في الأستهلاك
قطع غيار معمرة جدا ومتوفرة
شبابية
عزل صوت ممتاز


كعيوب
قطع غيارها اغلي كتير من عربيات كتير اوي كوري وياباني والماني حتي
مش كل الصنايعية بيفهموا فيها للأسف - انت محتاج ميكانيكي فولكس
شبابية
العربية مفيهاش العيوب الي بتبقي مشهورة زي باقي العربيات

ازاي شبابية مميزة وعيب ؟؟؟
ميزة لآنها حجمها صغير وشكلها شيك وعصري
وعيب لأنك هتلاقي منها كتير مسقط مواتير وراشش حوض ومبهدلها

السعر
بيتراوح من 38 لحد 42 علي حسب الحالة والكماليات
ونصيحة لو الحالة شاذة والعربية استوك (استوك يعني كل حاجة فبريكة الموتور الأستوك 1000 سي سي) ادفع فيها الي يقول عليه لو طلب 48 ادفعهم وانت مغمض
العربيات دي لما بتبقي نظيفة بتريح اوي اوي اوي ولو فيها مشاكل مش هتعرف تلمها وهتكلفك كتير اوي

الكماليات

تكييف
باور
4 زجاج
اير باج (سائق وراكب)
سنتر لوك هوا (مش كهربا)
مرايات كهرباء
فوجات قدام وورا
مفتاح مشفر بالريموت (عشان السنتر)
4 مخادع راس
نور في الشنطة


ملحوظة
مش شرط تلاقي كل الكماليات في العربية
يعني الغالب منها هتلاقي تكييف وباور و2 زجاج ومفتاح مشفر بالريموت ومخادع راس والسنتر


ربنا يوفقك

والله المستعان
،
،

[minicooper20]

دور على 1400 منها تحفه
هو ياعنى ايه سنتر هوا

[SYD]

سنتر الهوا يعني الصباع بتاع السنتر الي بيشد السقاطة مش بالكهرباء - لا مربوط بخرطوم هوا وبيديله هوا ينفخ قربة تقوم رافعة السقاطة والعكس تسحب الهوا تقوم منزلة السقاطة

وفي شنطة العربية الطرمبة بتاعة الهوا
بتبقي مكنة شغالة طبعا بالكهرباء وبتنفخ هوا زي البلاور

ودي صورة الطرمبة بتاعة الهوا ومكانها في شنطة العربية ورا الفانوس اليمين بجانب التانك



الفتحة الي فوق علي اليمين بتاعة الفيشة بتاعة الكهرباء
والفتحة الي تحتيها بتاعة خرطوم الهواء الي بيوزع هواء للعربية كلها علي جميع الأبواب

عيبها الوحيد
ان لو باب بينفس هواء بيخل بالنظام كله في العربية وبالتالي السنتر بيتعطل تماما

والله المستعان
،
،

[minicooper20]

طيب و ده ايه الميزه فيه

[Mohamedseddeek]

ناس كتير بتقولى ان العربية دى مالهاش ميكانيكى ومش حلوة اوى يعنى ممكن بتمنها ادور على فيرنا او لانسر كريستالة (المنتشرين بغباء) بس انا راكب دماغى وبصراحة خايف اجبها واندم بعد كده...

إيه رأى الرجالة فى الكلام ده ؟؟

[Mohamedseddeek]

متشكر جداً على اهتمام الرجالة

انا نويت خلاص على ابيزا 2000 - 2001 بس بدور عليها بقالى مدة مش لاقى خالص وقررت انزل سوق القاهرة - مدينة نصر ... إيه رأيكوا ؟؟؟

[SYD]

طيب و ده ايه الميزه فيه

شياكة ليس اكثر
ولو سليم وشغال بيبقي دليل علي انك محافظ علي عربيتك ومش لاعب فيها

والله المستعان
،
،