حكايتي المفصلة مع السيات ابيزا

[SYD]

لو دخلك الشعور بان العربية قدمها وحش عليك بيعها احسن أنا حصلى نفس القصة من عربيتى وبقيت مروش منها ومارتحتش غير لما بعتها

والله انا اساسا مش بقتنع بموضوع النحس والقدم والشؤم والكلام دة
بس ماهو لازم يجيلي التفكير في الكلام دة لما الاقي نفسي مش ملاحق عليها دة وانا بصلح حاجة حاجة تانية بتبوظ في نفس اللحظة

صلحت الردياتير الكوعة اتخرمت
غيرت الكوعة الباور باظ
غيرت الطرمبة الفتيس باظ
صلحت الشكمان جوان التاكيهات ضرب
ركبت الجوان - مسامير وش التاكيهات نعمت ومش راضية تربط
غيرت جوان التاكيهات شجرة المية باظت
روحت اشوف موضوع البوجيهات طلعت اسلاك البوجيهات بايظة
الموتور نفسه كان بايظ

وفي الحلقة الأخيرة خالص

فيشة الموتور سايبة وبتوقع لوحدها
فيشة الدينمو
البطارية نامت من كتر محاولات التدوير
طرمبة الزيت باظت
الشريحة الموجودة في طرمبة البنزين بايظة والمؤشر بيلعب

الحمد لله رب العالمين

والله المستعان
،
،

[SYD]

الحمد لله و قدر الله و ما شاء فعل.

كلنا بيحصل لنا مصايب .. و الفايده ان الواحد بيتعلم .. و ان شاء الله فى يوم من الأيام هيكون معاك عربيى بى ام دبليو فضى الفئة الخامسه الجديدة .. وانت طالع الدائرى هتفتكر حادثة الابيزا .. وتهدى و انت طالع و تقول الحمد لله انى اتعلمت من الابيزا رغم كل اللى حصل لى .. و انها مجتش فى البى ام :-)

و الحمد لله بجد بحد ان الحادثه بتاعتك فى جت فى العربية مش فى بنى ادم .. كان هيبقى موضوع أكبر بكتير.

و الحمد لله انك عرفت تتعامل مع الصنايعية .. هتستفيد أوى من الخبره دى.

و ربنا يأجرك فى مصيبتك و يخلفك خيرا منها.

يسمع من بوقك ربنا ونجيب البي ام

الحمد لله ان انا وزميلي طلعنا بخير منها

انت لو شوفت مكان الحادث لازم هتتوقع اننا وقعنا من فوق الكوبري سبحان من خلي العربية تكسر السور والرصيف يوصل لحد الفتيس والقنطرة الخلفية (القنطرة الخلفية تقريبا تحت الطابلوه) وبفضل الله ترجع تاني وتلف وشها

الحمد لله

والله المستعان
،
،

[SYD]

الله المستعان
ربنا معاك يا هندسة و صدقني هذا قدر الله لك
ربنا يأجرك في مصيبتك و يخلفك خيرا منها
الموضوع مش موضوع عربية صدقني انا من وجهة نظري ان ربنا بيحبك لذلك بيبتليك عشان ترجعله دور في نفسك كويس و فتش علي معاصيك و حاول تداويها وربنا يعينك
أسف اني قلت كلام تقيل و تدخلت في حياتك و لكن ده من خلال الأخوة التي بيننا في الله

ونعم بالله

مفيش اسف ولا حاجة يا باشمهندس انت عارف انت حبيبي ولا يمكن ازعل منك

والله المستعان
،
،

[SYD]

يا جماعة انا اخو محمد و على فكرة محمد بيسوق كويس هادى علطول و مبيتغرش بالطريق و بيسرع لما يعوز بس النصيب احنا ماشيين على هوا
الغلطة اللى عملها و انا قولتله بس مسمعش كلامى هى انه ترك العربية عند السمكرى و سمحله باختيار الميكانيكى و العفشجى و الكهربائى و المعلمين الثلاثة دول كلهم شياطين خرس لانهم ساكتين على الحق و الجميل انهم بيشتغلوا تجارى يعنى ليس ليس كله كويس و الاهم انهم بيخافوا جداً من السمكرى كما لو كان ماسك عليهم ذله
انما الصح ان انا اقوله خلص سمكرة و اخد عربيتى على ونش للعفشجى بتاعى و بعد كدة اقطرها و دا انا عملته معاه اكتر من مره اطرته بعربيتى

اهلا بيك في قسم سيات
انت عارف ان السمكري كان واخد العربية تقريبا مقاولة سمكرة وميكانيكا وانا للأسف مكنتش هعرف اتحرك بيها واخدها وازقها او اقطرها لحد الميكانيكي والكهربائي والعفشجي وانت كتر خيرك بس بردو انت لو فاضي النهاردة فانت مشغول بكرة وانا كنت نفس النظام وظروف شغلي ومواعيدي الي مكنتش مظبطة خالص - يعني لو انا فاضي يبقي مفيش بضاعة ولما انا اتشغل يجيب حاجتها ويزن علي فلوس

الحمد لله
قدر الله وماشاء فعل

والله المستعان
،
،

[wama1903]

ربنا يصبرك على الشقا ده....قدر الله وما شاء فعل

[د.محمود صلاح]

قدر الله وما شاء فعل

معلش اللي يسوف بلوة غيره تهون عليه بلوته

العربية كانت حلوة وكويسه لحد قبل الحادث

والحمد لله انك بخير وسليم وفداك اي حاجة

[SYD]

ربنا يصبرك على الشقا ده....قدر الله وما شاء فعل

الحمد لله رب العالمين

شكرا علي مرورك

والله المستعان
،
،

[SYD]

قدر الله وما شاء فعل

معلش اللي يسوف بلوة غيره تهون عليه بلوته

العربية كانت حلوة وكويسه لحد قبل الحادث

والحمد لله انك بخير وسليم وفداك اي حاجة

ازي حضرتك يا دكتور
نورت الموضوع والقسم كله

فعلا العربية كانت حلوة (او يبدو عليها انها كانت حلوة) لحد قبل الحادثة
بس الي اكتشفته انها كانت متلصمة لغرض البيع والي حصل فيها كان متوقع ومنتظر يحصل فأي وقت بحادث او بدون حادث

الميكانيكي لما فك وش السلندر عشان يشوف انهي صباب في السلندر الي قاطع ومشغل السلندر الأولاني ضعيف لقي المسامير الي رابطة وش السلندر ناعمة ومش بتربط وكانت ملزوقة بمادة لاصقة قوية عشان كدة الموتور في اللحظات الأخيرة من عمره كان بيجيب زيت من كل حتة ضيف علي كدة ضعف طرمبة الزيت ودة كان مخلي المقياس عامل علامة عالية في حين اللمبة علي طوول منورة في الطابلوه
ناهيك عن دة كله
الميكانيكي وراني امبارح بعيني البساتم وهي بتلعب جوة السلندر بهزة اصبع واحد فمابالك وهي دايرة وشغالة

العربية كانت مستهلكة بشكل لا تخيله وواضح انها كانت بتستعمل بشكل غير أدمي في حين ان الصالون والكيلومتر مش باين عليهم خالص الحالة دي

الحمد لله

والله المستعان
،
،

[ashoub]

ربنا يسطر طريقك وخلى بالك من بتوع قطع الغيار لان كل واحد بسعر انتا لما تحب تجيب حاجه تنزل تلف فى الحرفيين وتجمع اسعار وتشوف شكل الحاجه متهانه ولا سليمه وتشوف ارخص واحد وتفاصل معاه برده ومتخليش ميكانيكى يبعتك لكهربائى او سمكرى روح لكل واحد لواحده حب يشترى حاجه انزل معاه وانت بتشترى
وطبعا بعد ده كله الحمد لله ان حضرتك سليم ومش مشكله الفلوس لان الفلوس بتروح وتيجى الحمد لله انها بتصرف على عربيه مش على مرض فاحمد ربنا وحمد لله على سلامتك

[SYD]

ربنا يسطر طريقك وخلى بالك من بتوع قطع الغيار لان كل واحد بسعر انتا لما تحب تجيب حاجه تنزل تلف فى الحرفيين وتجمع اسعار وتشوف شكل الحاجه متهانه ولا سليمه وتشوف ارخص واحد وتفاصل معاه برده ومتخليش ميكانيكى يبعتك لكهربائى او سمكرى روح لكل واحد لواحده حب يشترى حاجه انزل معاه وانت بتشترى
وطبعا بعد ده كله الحمد لله ان حضرتك سليم ومش مشكله الفلوس لان الفلوس بتروح وتيجى الحمد لله انها بتصرف على عربيه مش على مرض فاحمد ربنا وحمد لله على سلامتك

متشكر لحضرتك علي الدعاء والمرور

انا المفروض اني حريص زيادة عن اللزوم ومش بخلي حد يعملي حاجتي وبحب أقف علي ايد الصنايعي
بس تقدر تقول انا كنت في دوامة ودماغي لفة مني والسكينة سرقتني وفي حاجات كتير اوي مفكرتش فيها
يعني ابسط حاجة ان الأكصدام الخلفي عندي من الحادثة وقع من جمب واحد وانا كنت عارف مشكلته من يوم ماجبت العربية وهي ان ودان الأكصدام من الناحيتين كانو مشروخين فمن الصدمة ودن منهم قطعت وسقط من ناحيتها
لما روحت للسمكري راح شادد الأكصدام قاطع الودن التانية ورمي الأكصدام
انا مفكرتش خالص حتي اروح اجيبه والحم الودان المقطوعة عند اي حد بتاع فيبر وخصوصا اني ليا واحد صاحبي جدا اخوه بتاع فيبر وكنت وفرت علي نفسي 500 جنيه ورش الأكصدام الجديد

بس الحمد لله

والله المستعان
،
،

[alzelafy]

انا حاسس ان السمكرى اللى حضرتك اتعاملت معاة انسان معندوش ضمير نهائى عشان يرمى اكصدام ب 500 جنيه و كان ممكن يتظبط و عشان يبيع ااكصدام اامامى بالفوانيس اللى كانو جايين على اسمك و عشان زبون دفع اكتر يبعهملو عموما محدش بيتعلم باساهل و كل انسان منو لله

[jackal]

سوال لو سمحت . مش عارف ليه شاكك ان السمكري ده هوا ايمن بتاع المريوطيه ز اصل كلامك عباره عن وصف ليه لو هوا يبا كفايه الي حصل ومتجبش منه حاجه ابدا .
علا فكره انا ادحك علي مره منه وحاجه بسيطه اوي بس عرفته وبطلت اروحله

[SYD]

المحطة الأخيرة في حكايتي مع العربية

الحمد لله اشتريت الموتور ال1400
جبته عبارة عن البلوك والوش والمنافولد وشجرة المياة وسلوك البوجيهات وفرن الشكمان بالحساس والفيشة وطرمبة المياة وطرمبة الزيت والكارتيرة
وسيبت المارش والدينمو والكنترول والضفيرة والباور والتكييف والأسبراتير والبوابة والفتيس

اول لما الميكانيكي بتاعي فتح وش التقسيمة لقي سير الكاتينة مرخي
قلبه طب وقالي ربنا يستر مايكنش جايب صبابات

بيفك لقي طرمبة المياة مكسورة

المهم

غيرت الطرمبة بعد طبعا مماطلة وعناء
روحت مليت اسطوانة الدبرياج علي 8.5 ممل

وركبتها في الموتور الجديد وسقط الموتور ونقل كل اداوت التغذية من الموتور ال1000 للموتور ال1400 الجديد

المهم الراجل دور الموتور بعد ماجبتله زيت موتور تعاون عشان يغسل بيه الموتور وهغير انشاء الله الزيت والفلتر بعد 250 كم

النتيجة
الموتور مبرجل شوية والأر بي ام بيعلي ويوطي لوحده واحيانا بتبطل
العفشة رايحة في داهية خالص وبتعمل اصوات وتخبيط غير عادي
عوامة البنزين رايحة جاية وبتلعب لعب جامد قوي
عداد ال كم مش واصل شاكك انها الفيشة مهيسة لأنها راكبة في الفتيس

اداء الموتور :
الله اكبر عليه - طلعة وتجميع ماشاء الله عليه وصوته اقوي شوية من صوت ال1000

كل حاجة في الموتور ال1000 بتركب عليه ماعدا طرمبة المياة

المفروض هروحله بكرة انشاء الله عشان يكمل الشغل
هينظف بوابة
هيغير زيت الموتور والفلتر
هيغير فلتر الهواء
هيغير فلتر البنزين

مصنعية فك وتركيب وتسقيط ومشوارين معايا لبتاع قطع الغيار 350 جنيه شاكب راكب بالعيش والسلاطات

بس الصراحة
الميكانيكي نساني كل الألم والمرار بتاع قطع الغيار
راجل أمين
مؤدب
بيفهم اوي في الصنعة
تتصل بيه يقولك عينيا ويجي معاك عند بتاع قطع الغيار ويفك ويركب وكل دة من المصنعية مش بيزود مليم

بيشتغل بأيده ومعاه واحد زميله شغال معاه بردو دكتور فولكس

بصراحة هو دة احسن حاجة في تجربتي دي كلها

والله المستعان
،
،

[SYD]

انا حاسس ان السمكرى اللى حضرتك اتعاملت معاة انسان معندوش ضمير نهائى عشان يرمى اكصدام ب 500 جنيه و كان ممكن يتظبط و عشان يبيع ااكصدام اامامى بالفوانيس اللى كانو جايين على اسمك و عشان زبون دفع اكتر يبعهملو عموما محدش بيتعلم باساهل و كل انسان منو لله

هو ملوش دعوة بحاجة
انا الي كنت تايه ومش عارف افكر الصراحة

وفعلا هو جشع انه يبيع حاجتي لمجرد ان حد تاني اشتري شروة كبيرة لكن انا غلبان ولسه قاعد معاه

بس الحمد لله انها خلصت علي خير

والله المستعان
،
،

[SYD]

سوال لو سمحت . مش عارف ليه شاكك ان السمكري ده هوا ايمن بتاع المريوطيه ز اصل كلامك عباره عن وصف ليه لو هوا يبا كفايه الي حصل ومتجبش منه حاجه ابدا .
علا فكره انا ادحك علي مره منه وحاجه بسيطه اوي بس عرفته وبطلت اروحله

ايمن عنده حاجات حلوة بصراحة بس هو عيبه ان باله طويل اوي
وبصراحة عامل شغل في عربيتي محدش شافه غير لما قالي بجد الي عامل الشغل دة معلم بس الفينش مش عاجبني
وكبضاعة حاجته حلوة وباسعار مهاودة

وتسمع فرق بينه وبين غيره بال200 جنيه في بعض الحاجات وحاجات تانية بنفس سعرها برة

والله المستعان
،
،