1400 جنيه هي تكلفه صيانه 20000 للإبيزا 2011

[atiffshakker]

إمبارح رحت أعمل صيانه الـ 20000 , وصلت التوكيل الساعه 8 و عشر دقايق بالظبط , سألت علي مهندس الأستقبال , واحد قالي لسه المهندس عادل موصلش - الساعه 8 و نص سألته مره تانيه قالي لسا موصلش أنا هشوفلك مهندس مينا , المهندس مينا جالي الساعه 9 تقريبا و بدأت اقوله ملاحظات علي العربيه .

أنا كان عندي تزييق في الأبواب , طلبت منهم يظبطوا زوايا و يعملوا الصيانه للـ 20000 !!

المهندس مينا راجل محترم هو و المهندس عادل , بصراحه ناس محترمه و راقيه في التعامل , المهم قالي التكلفه المبدئيه 1400 جنيه , أنا انصدمت - يعني الحاجه الوحيده الي هيحطوها في العربيه هي زيت موبيل وان و ده تمنه 250 جنيه - معقول المصنعيات توصل للسعر ده ؟

أنا استلمت العربيه الساعه 1 و نص - طلعت جربتها مع فني من الورشه و الطريق بره مكسر جدا , طبعا العفشه عندي قبل الصيانه كانت متدمره من الطرق المصريه الجميله , واحد كمان في بنزينه محترمه عملي ضغط الكاوتش علي 50 - جربت العربيه لقيتها زي الفل الصراحه - العفشه ماسكه نفسها و مريحه جدا و التسارع اكتر من ممتاز و صوت الموتور بقا واطي جدا .

ملاحظاتي علي التوكيل ..

1 - غالي قوي , ضعف التكلفه لما تعمل العربيه بره التوكيل .
2- الضمان الي انت بتاخده لما بتشتري العربيه مش بتستفاد بيه نهائيا لأن لو رحت تربط عفشه هياخد منك 200 جنيه .
3- بطئ جدا جدا
4- المعامله ممتازه
5 - مشاكل العربيه كلها بتتحل ودي نقطه ايجابيه جدا تستاهل التكلفه العاليه
6 - مكان التوكيل نفسه في حته شعبيه و بيئه - الطريق مكسر جدا و في تكاتك
7 - التلفزيون في الاستراحه بيقطع
8 - مفيش نت في الاستراحه - بس لو وقفت بره الاستراحه السيجنال هتلقط

[Mohamed.Ramah]

التكلفة كبيرة فعلا ولاكن انا حوضح لحضرتك هما حسبوها كلاتى :

صيانة20.000= 665جنية تشمل:
تغيير فلتر زيت 65
فلتر بنزين 142
فلتر تكييف 88
فلتر هواء100
سبراى تنظيف15
مياة مقطرة 3
المصنعيات 252

250 تغيير الزيت ودة غير شامل صيانة ال20 فعلا
200 جنية تربيط العفشة وياريت اعرف من حضرتك هما غيرو المذكور فى الصيانة 20.000 بالفعل ام لا
لو تم المكتوب يبقى المجمل 1115 بالاضافة ل 10% ضريبة مبيعات على ما اظن هما اخدو 200 جنية زيادة والله اعلم

ومبروك الصيانة وعقبال صيانة ال 100.000 باذن الله

[Mohamed.Ramah]

عذرا على الخطاء كدة حضرتك دفعت المبلغ صحيح بدون زيادة فعلا

ودة موضوع موضح فية اسعار الصيانة واسعار قطع الغيار : http://www.nilemotors.net/Nile/269254-2012.html

[SYD]

الف مبروك صيانة ال 20,000
اهلا بيك عضو جديد معانا في نايل موتورز

والله المستعان
،
،

[atiffshakker]

الله يبارك فيكم يا شباب .

محمد , هو فلتر التكييف متغيرش بتهألي نضفه بس , الزياده كانت من تظبيط الزوايا و ترصيص العجل و غسيل الموتور بالفوم , هو التوكيل غالي بغباء زي باقي توكيلات العربيات الالماني عموما , أنا غيرت مرايا شمال قبل كده بـ 1600 جنيه و مساحه ورا بـ 375 جنيه مغ اني لقيتها برا بـ 90 جنيه بس طبعا مش زيها .

[ehab_mansour]

مبروك يا افندم انضمامك لمنتدي نايل موتورز و قسم سيات و نتمني من الله ان تشاركنا دائما بكل ماهو جديد و مفيد
والف مبروك عليك صيانة ال 20 الف و عقبال ال 1000000
ياريت تحكيلنا عن عربيتك و عن مميزاتها و عيوبها و خاصة الفتيس dsg لما حوله من كلام كثير

[Mohamed.Ramah]

الله يبارك فيكم يا شباب .

محمد , هو فلتر التكييف متغيرش بتهألي نضفه بس , الزياده كانت من تظبيط الزوايا و ترصيص العجل و غسيل الموتور بالفوم , هو التوكيل غالي بغباء زي باقي توكيلات العربيات الالماني عموما , أنا غيرت مرايا شمال قبل كده بـ 1600 جنيه و مساحه ورا بـ 375 جنيه مغ اني لقيتها برا بـ 90 جنيه بس طبعا مش زيها .

موضوع التغيير بيكون على حسب الحالة ولو فى شكوى ومحتاج يتغير فبيتم تغييرو اكيد وطبعا التوكيلات فى مصر غالية جدااا بس المشكلة ان مش كل التوكيلات بتعمل بالدفعتة والحمدلله ان المشاكل اتحلت وعقبال باقى الصيانات باذن الله

[abouetta]

التوكيل ممكن يكون غالي فعلا، لكن محترم و منظم و بيحاول يظبط العربية كويس، و النت شغال وايرلس كويس في الاستراحة و الباسورد (seategypt) :))

[atiffshakker]

مبروك يا افندم انضمامك لمنتدي نايل موتورز و قسم سيات و نتمني من الله ان تشاركنا دائما بكل ماهو جديد و مفيد
والف مبروك عليك صيانة ال 20 الف و عقبال ال 1000000
ياريت تحكيلنا عن عربيتك و عن مميزاتها و عيوبها و خاصة الفتيس dsg لما حوله من كلام كثير

الله يبارك فيك يا باشمهندس ..

العربيه عيبها الوحيد ملهاش دخل فيه وهو الطرق المصريه السيئه جدا جدا و تأثيرها علي العفشه , للأسف العفشه بتأثر علي ثبات العربيه و خصوصا ان لو العفشه مش تمام العربيه هتتهز جامد مع الحفر و الحاجات الجميله .

الكلام ده مش موجود في البي ام , الكلبسات الي علي الدائري مثلا او عين القطه زي ما بيقولوا مبحسش بيها نهائيا مع البي ام - كأني مش دايس عليها اصلا , مع الابيزا قبل الصيانه كانت العربيه بتتهز جامد جدا و بعد الصيانه الهزه راحت و بقت تمام - انا رجعت دائري مخصوص علشان اجرب النقطه دي .

أنا ركبت عربيات هاتشباك كتير بس اكتر حاجه بتميز الابيزا هي المرونه , العربيه مرنه جداااا و دي حاجه بتتحس جامد مع الفتيس الرياضي , صوت الموتور علي الوضع الرياضي عامل زي البايك , يعني لو انت شاب هتعمل شووووو جامد و انت ماشي في الطريق , بس طبعا دا غلط علي الموتور اكيد .

العربيه ثابته بس لازم تربيط عفشه كل 5000 كيلو .

أنا هاري الفتيس وضع رياضي و بحول عليه و العربيه ماشيه و مفيش اي مشاكل لحد دلوقتي , انا سمعت ان في مشاكل فيه علشان كده قلت اضغط عليه و العربيه في الضمان بس هو طلعلي لسانه , دلوقتي انا بعامله بحنيه .

عموما عيب الابيزا الوحيد هو العفشه الي بتحتاج تربيط كل كام كيلو .

الإبيزا معموله علشان تمشي علي اسفلت , مش علشان تمشي في الشوارع المصريه بحفره و نقره و حديده و مطباته .

[atiffshakker]

التوكيل ممكن يكون غالي فعلا، لكن محترم و منظم و بيحاول يظبط العربية كويس، و النت شغال وايرلس كويس في الاستراحة و الباسورد (seategypt) :))

التوكيل محترم جدا علي فكره , وعلشان مش عليه ضغط فالناس هناك بتشتغل بزمه و ضمير عكس توكيلات كتير , يعني لو عندك مشكله في العربيه هيعملوها 100% و هتجربها و تتأكد كمان قبل ما تدفع فلوسك .

النت شغال في الاستراحه ؟ هههههه واضح بقا ان جهازي هو الي تعبان