الي خبراء الابيزا أرجوكم

[Vierry32]

السلام عليكم ورحمة الله وبركاته :

بعد اذنكم يا رجالة الابيزا معروض عليا ( ابيزا 2002 كامله مانيوال 1400 سي سي بسعر 45000 جم) وسيات اخري ( ابيزا 2002 كامله مانيوال 1000 سي سي بسعر 42000) عاوز اعرف الفرق في السي سي بتاع الموتور يفرق في ايه بالضبط ؟؟ مع العلم اني من القاهره ومش من هواة السفر لمحافظات اخري بحكم شغلي يعني معظم تحركاتي بها ستكون ان شاء الله داخل القاهره الا فيما ندر , تنصحوني ب ايه ؟؟ الله يباركلكم

[SYD]

السلام عليكم ورحمة الله وبركاته :

بعد اذنكم يا رجالة الابيزا معروض عليا ( ابيزا 2002 كامله مانيوال 1400 سي سي بسعر 45000 جم) وسيات اخري ( ابيزا 2002 كامله مانيوال 1000 سي سي بسعر 42000) عاوز اعرف الفرق في السي سي بتاع الموتور يفرق في ايه بالضبط ؟؟ مع العلم اني من القاهره ومش من هواة السفر لمحافظات اخري بحكم شغلي يعني معظم تحركاتي بها ستكون ان شاء الله داخل القاهره الا فيما ندر , تنصحوني ب ايه ؟؟ الله يباركلكم

اولا اهلا بيك في قسم سيات

طبعا تختار ال1000 بس بشرط تكون حالتها نظيفة وتكشف علي الموتور

السي سي هيفرق في التجميع والسرعة القصوي

وطبعا استهلاك البنزين جوة البلد

لكن لو ال1400 حالتها انظف يبقي تختار ال1400

الحالة هي الفيصل وليس السي سي

والله المستعان
،
،

[Vierry32]

شكرا لك يا ( syd) علي الرد لكن بفرض ان الحالتين متشابهتين هل فرق السي سي يكافئ فرق المبلغ (3000) وبيبان في سحب السياره وسرعتها ولو استعمالي ليها هيكون في نطاق المحافظه تقريبا يبقي ال 1000 سي سي افضل ؟؟؟ رجاء الرد وجزاك الله خيرا

[ehab_mansour]

العربية دي كانت نازلة فبريكة بالموتور ال 1000 سيسي لذلك هو الاوريجينال يعني لو العربية ال1000 دي حالتها كويسة و أفضل من الاولي و ماشية كيلومتر قليل يبقي توكل علي الله لأنها ولا سقطت مواتير ولا اتلعب فيها
وعلي فكرة المحرك ال 1000 سيسي أفضل بمراحل في استهلاك البنزين ولكنه بالتأكيد عزمه و قوته و سرعته القصوي أقل من ال 1400
وفي النهاية أنصحك بالاستخارة فهي خير هداية في هذا الموضوع وثق بعدها ان الاختيار الذي سيقع من نصيبك هو الخير لك دائما ان شاء الله

[Vierry32]

جزاك الله كل الخير م/ ايهاب منصور وربنا يوفقني في الاختيار

[SYD]

شكرا لك يا ( syd) علي الرد لكن بفرض ان الحالتين متشابهتين هل فرق السي سي يكافئ فرق المبلغ (3000) وبيبان في سحب السياره وسرعتها ولو استعمالي ليها هيكون في نطاق المحافظه تقريبا يبقي ال 1000 سي سي افضل ؟؟؟ رجاء الرد وجزاك الله خيرا

طالما مش بتسافر كتير ومشاويرك جوة البلد يبقي توكل علي الله في ال1000 بس المهم الحالة
صدقني الحالة اهم من اي حاجة
يستحسن تاخد معاك حد بيفهم يقولك حالتها حلوة ولا لا
معظم الي بيتفرجوا علي عربيات بيهتموا بالصاج وبس
يعني بيشوف الدواخل والكلام دة
طبعا دة امر مفروغ منه
لكن بردو حالة الموتور والفرش والصالون مهم جدا
فحضرتك هتقارن بين العربيتين من حيث حالة الموتور والفرش والصالون والكيلو متر

وطبعا لازم تعمل زي المهندس ايهاب ما بيقول لازم تستخير ربنا في البداية وربنا يقدم الي فيه الخير

والله المستعان
،
،

[Vierry32]

شكرا يا بشمهندس محمد ودايما متألقين في المنتدي الرائع ده ,,,, جزاك الله خيرا

[alzelafy]

لو لاقيت الحالتين متقاربين طبعا تجيب ال 1000 ..... ووانتا بتتفرج سيب السمكرى يعيش حياته فى الصاج و الدواخل وركز انتا على الموتور و الصالون و كهرباء العربيه التكييف السنتر الانزار الزجاج الكهرباء الاشارات متستهترش بالحاجات دى فى العربيات الالمانى

[Vierry32]

معلش يا جماعه استفسار صغير إزاي ابص علي الصالون ؟؟؟؟ يعني اركز علي ايه بالضبط فيه ؟ شاكر جدا ليكم ومعذرة تعبتكم معايا

[ehab_mansour]

معلش يا جماعه استفسار صغير إزاي ابص علي الصالون ؟؟؟؟ يعني اركز علي ايه بالضبط فيه ؟ شاكر جدا ليكم ومعذرة تعبتكم معايا

الدواخل و فرش العربية :-

تتأكد ان حالة التابلوه جيدة ولا يوجد به تجريح او تشقق
تتأكد ان فتحات التكييف سليمة و بتتحرك و تفتح و تقفل
تتأكد ان الكاسيت سليم و الأجزاء اللي حوله حالتها كويسه و مش متجرحه
تتأكد ان شاشة العدادات سليمة و شغاله و كل المؤشرات شغاله و لا تعطي اي لمبات تحذيرية بعد تشغيل المحرك
تتأكد ان كرسي السائق و الراكب الأمامي بيتحركو بسهوله في كل الاتجاهات و فرشهم حالته كويسه و بفرش الفبريكة

واهم شيء في دواخل العربية دي هو فرش الأبواب و أزرار التحكم في رفع الزجاج و ضبط المرايات و تشغيل السنتر دول لازم تتأكد ان حالتهم كويسه لأن العيب الشائع في العربية دي هو ان فرش الأبواب من الداخل بيطلع و يتقطع بسهولة ولو لقيت عربية فرش أبوابها سليم يبقي تأكد ان صاحبها فعلا كان محافظ عليها وان حالتها كويسة

الموتور :-

الموتور أعتقد ان لو فتحت كبوت العربية أكيد هتعرف الدنيا مبهدله و ملعوب فيها كتير ولا بحالة الفبريكة و طبعا لما تدوره تتأكد انه بيدور من اول مرة و تتأكد انه لما بتضغط عليه و تزود بنزين جامد مبيخرجش اي دخنه ولا اي شيء ممكن تنقيط مياة لكن غير كده مافيش
تسمع صوت الموتور هل هاديئ ولا فيه خشونة و تشوف الموتور عليه زيوت كتير ولا جاف تماما من كل أجنابه و من تحته و تركب العربية و تشوف سحب الموتور و تتأكد انه في السلانسيه مضبوط و مبيلعبش ال rpm تجرب الباور و تجرب التكييف و كل حاجه كهرباء جربها

وطبعا المفروض بتكشف علي العربية كمبيوتر و تشوف هل الكنترول مسجل أعطال ولا لأ عشان تتأكد ان الدنيا كلها سليمة

حالة الصاج :-

بص دايما في الصاج علي خطوط العربية يعني فواصل الأبواب بينها و بين بعضها و بينها و بين جسم العربية - فواصل الشنطة - أطراف الأبواب من تحت - أطراف الأبواب من فوق و قفلها مع سقف العربية - فواصل الرفارف قدام مع الأبواب و مع الكبوت - فواصل الاكصدامات مع جسم العربية في الأمام و الخلف و تقفيلهم مع الصاج و كذلك تربيطهم مع الكارتيرات اللي تحتهم
كل اللي انا كتبته فوق ده تأكد ان كل الفواصل دي مضبوطة و مافيش فيها تعرجات و اختلافات فوق من تحت و جنب عن أخر او رفرف منفخ عن أخر او اي شيء مش منتظم

بص علي عتبة العربية و علي طرفها من تحت وشوف مطبق كتير ولا سليم و لا ايه نظامه
بص علي وش العربية و شوف الكبوت لما يقفل متساوي مع بعضه و مع الشبكة و وش العربية ولا فيه مشاكل

بعد كده عشان تعرف البوية دي من بره فبريكة ولا لأ هتلف علي كل الفواصل بين الدواخل و الخوارج و تشوف هل فيه حز بوية ولا لأ و في كل اتجاهات العربية
موضوع البوية ده مش هينفع يتشرح لأنه العين اللي بتشوفه مش الكلام و مينفعش يتوصف صح
و متنساش تشوف أرضية الشنطة و المنطقة عند الاستبن هل فيها مشاكل ولا لأ

ده اللي قدرت أقوله عن فحص العربية ولو نسيت حاجه ياريت الأخوة يكملو
و ربنا يوفقك لما فيه الخير

[SYD]

طبعا المهندس ايهاب قال كل حاجة الله اكبر عليه

بس هي مسألة الصالون دة ونظافة صاحب العربية بتبان اكتر لما تركب العربية
مش بتكلم انه سايبها متربة ولا ملمعها

ممكن تبقي متربة بس هي الماظة من جوة

انا بيعت عربيتي وكانت عبارة عن -عذرا في اللفظ- صفيحة زبالة
بس لما تفتح الشنطة وتشيل فرشها تلاقيها زي اللألماظ

كل حاجة فيها بتاعة الفبريكة ومش ملعوب فيها فأي اختراع ولا اي حاجة
لدرجة بايعها بردياتير المصنع الي عليه كلمة ok

المهم

بالنسبة للأبيزا
لو لقيت طبات المسامير مثلا
عليات الكبوت والشنطة (بتبقي عبارة عن قطع كاوتش اسود من كل جانب عشان الكبوت او الشنطة يقفل من غير صوت ويكون متساو الأطراف)
درج الطابلوه مش مكسور
عصاية الفتيس مش ملووحة او مخلوعة
الرف الخلفي سليم مش مكسور
فرش السقف والشماسات واللمبة بتاعة الصالون
الدركسيون مش ملحوس ونعم من كتر المسكة ومكان صباعه علي الكلاكس

الحاجات دي صغيرة وتافهة بس انت الي هتلاحظها مش الي بيكشف علي العربية وبتبين مدي اهتمام صاحب العربية بعربيته

والله المستعان
،
،

[Vierry32]

ما شاء الله معلومات من خبراء بجد , ربنا يجزيكم خير علي هذه المعلومات الرائعه وأكيد أي شخص هيقرأ الموضوع هيستفيد طبعا ,,,,,,,,,,,,,,, سأتوكل علي الله واعرفكم عن تجربتي مع السياره أكيد , ودايما في تواصل مستمر عشان الكل يستفيد .