استشارة فى الابيزا 98

[mdk_26]

السلام عليكم يا جماعة انا قدامى عربية ابيزا 98 و العربية فيها موتور 1600 بالتكييف من غير الباور... و فيها شوية خبطات خفيفة....العربية مش متهانة بس انا عمرى ما ركبت ابيزا و عندى 3 اسئلة اتمنى اللى راكبين الابيزا يجاوبونى
1. ممكن اركب لها باور عشان الدركسيون تقيل شوية لما سوقتها و تكلفته اد ايه
2.الدبرياج تقيل ده ليه حل ولا لأ
3.سعرها تعمل كام


شكرا ليكم يا جماعة

[magdy_momo]

أبعد عنها يا باشا الابيزا 99 بتبقي نازله يا أما 1000 سي سي أو 1400 أنما المكنة دي متسقطة و بتاعه الموديل الاقدم منها
شوف واحده فابريكا أحسن و بتكون نازله بتكييفها و قولنا معروضه عليك بكام

[windofchange]

اعتقد تعمل من35 لو فابريكة دواخل يزيد السعر او يقل والعربية انت بتقول 1600 لو موتور انجكشن يبقي الموتور حديث وبيبقي راكب فيه عادة طرمبة الباور,فهو صاحبها احتمال مسقط الموتور من غير الباور كطرمبة ومشتملاته من علبة دركسيون باور وخزنة زيت الباور والخراطيم وكده ودول مش هيكلفوا كتير ان شاء الله ممكن تقول 1000 جنيه او اكتر شويه والدبرياج تقيل شويه وده له كذا احتمال ممكن سلك الدبرياج او طقم الدبرياج او الدواسة نفسها عايزة تتظبط والله اعلم

[mdk_26]

شكرا يا جماعة على ردودكوا و انتوا فعلا افادتونى... هو الراجل قالى انه مسقط فعلا مكنة 1600 انجكشن بالتكييف و هى فعلا الراجل بيتكلم فى 35 زى ما الاخ Wind of Change بيقول بس انا حاسه كتير شوية... على فكرة الراجل ده جارى و مش عامل حوادث ولا حاجة فى العربية و كمان اول يد ...انا بس عايز اعرف اتكلم معاه فى اد يه مع العلم فى رفرف مخبوط فيها و فيها بعض الخبطات و قصة الباور ديه و تقريبا فيها كوبلن بيطقطق...انتوا شايفين ان سعرها مناسب ولا ايه؟

[windofchange]

والله اول يد ده شيء ان شاء الله يكون كويس وجوز الكبالن عموما ب400 جنيه كورام ايطالي جديد والعربية فيها سنتر فابريكة وانذار فابريكة وريموت فابريكة تبقي كاملة و يبقي كده السعر ماشاء الله كويس انا شايف كده والله اعلم

[mdk_26]

ربنا يخليك يا Wind of Change هى مافيهاش انذار بس سنتر ولا ريموت انا لما فتحت كان عادى مفتاح كدة بس شكرا يا باشا للافادة

[magdy_momo]

انتا لو زودت ألفين ع ال35 هتجيب الموديل اللي بعده السعر ده عالي شويتين

[mdk_26]

انا مش بشترى اى عربية انا عايز اشترى بتاعة الراجل ده عشان عارف انه معملش بيها حوادث .....عشان كده بدرس حالتها بس قولى طيب انتا شايف ايه السعر المناسب ليها من وجهة نظرك

[magdy_momo]

31 ألف جنيه بالكتير أنا بتكلم معاك في سعر السوق

[mdk_26]

31 الف دول بالكتير يجيبوا اكسل انا شايف انه قليل شوية

[magdy_momo]

31 الف دول بالكتير يجيبوا اكسل انا شايف انه قليل شوية

الكلام ده كان زمااااان انا شاري عربيتي ب 29 ألف من تاجر كان شاريها أصلا ب 26 ألف

[SYD]

اولا السيات ابيزا ال98 بالموتور الأستوك بتعمل من 28 لحد 35 علي حسب الحالة والكماليات
ولو متسقط فيها موتور 1400 بتعمل نفس الرينج
لو متسقط فيها المكنة ال1600 - لو متسقطة صح ومعمول كل التعديلات بتاعتها صح يبقي ممكن تعمل نفس الرينج او تزيد حاجة بسيطة (ملحوظة التسقيط مش مستحب ساعة الشراء ويفضل تعمله لدماغك وعلي ايدك) لو معكوك فيها بالكتير تجيب ال32

حضرتك بتقول طالب 35 يعني تقريبا وصل معاك للحد الأقصي
طب هل العربية مفيهاش مصروف ؟؟؟
هل العربية كاملة ؟؟؟؟

اولا حضرتك بتقول انها عايزة سمكرة وبالتالي عايزة بوية
ثانيا بتقول مفيهاش باور وعايزة شغل عفشة (كبالن)
ثالثا مش كاملة (تكييف - باور - مرايات - زجاج - سنتر وانذار بالريموت في المفتاح الأصلي)

انصحك لو انت متمسك بيها انزل معاه لل32 بحد اقصي
اكتر من كدة ماتستاهلش لأنك هتصرف عليها اكتر اصلا من ال3000 الي خفضتهم

دة رأيي الشخصي

والله المستعان
،
،

[mdk_26]

شكرا ليكم يا جماعة و حضرتك جبت المفيد يا اخ سيد syd

[ehab_mansour]

اولا السيات ابيزا ال98 بالموتور الأستوك بتعمل من 28 لحد 35 علي حسب الحالة والكماليات
ولو متسقط فيها موتور 1400 بتعمل نفس الرينج
لو متسقط فيها المكنة ال1600 - لو متسقطة صح ومعمول كل التعديلات بتاعتها صح يبقي ممكن تعمل نفس الرينج او تزيد حاجة بسيطة (ملحوظة التسقيط مش مستحب ساعة الشراء ويفضل تعمله لدماغك وعلي ايدك) لو معكوك فيها بالكتير تجيب ال32

حضرتك بتقول طالب 35 يعني تقريبا وصل معاك للحد الأقصي
طب هل العربية مفيهاش مصروف ؟؟؟
هل العربية كاملة ؟؟؟؟

اولا حضرتك بتقول انها عايزة سمكرة وبالتالي عايزة بوية
ثانيا بتقول مفيهاش باور وعايزة شغل عفشة (كبالن)
ثالثا مش كاملة (تكييف - باور - مرايات - زجاج - سنتر وانذار بالريموت في المفتاح الأصلي)

انصحك لو انت متمسك بيها انزل معاه لل32 بحد اقصي
اكتر من كدة ماتستاهلش لأنك هتصرف عليها اكتر اصلا من ال3000 الي خفضتهم

دة رأيي الشخصي

والله المستعان
،
،

الله ينور يا هندسة مافيش كلام بعد كده