عملت عمرة عفشة

[SYD]

السلام عليكم ورحمة الله وبركاته

اخواني الأعزاء
شكراً

في البداية احب اوصفلكم حالة العربية قبل العمرة
مع كل مطب تزييق - خبط - شخلله - اصوات مش عارف اسمها
من الأخر
حدث ولا حرج عن حالة العربية

كل لما ابص للعربية وانا مثلا واقف برة بسخنها
الاقيها مطاطية وراسها مدلدلة وخجولة اوي

ابص لباقي العربيات السيات
الاقيها بسم الله ماشاء الله ولا قوة الا بالله
حالتها النفسية مرتفعة ورافعة راسها وواقفة زي الأسد

وانا يعيني عربيتي غلبانة وعينها مكسورة (مكسوفة مني اكيد من عمايلها)

المهم ..

بدون تطويل عليكم

امبارح روحت للميكانيكي بتاعي (الأسطي عصام - خُط الفولكس "زي خط الصعيد كدة")
رفع العربية وبيكشف
ضرب المفك تحت المقص وعمل الميزان رافعة من الدرجة الأولي وبيهز المقص لقاه مرجيحة مش مقص

قالي "شايف يا استاذ محمد؟؟؟"

وهو لسة رافع

مسك السوستة وبيهز المساعد
لقاه بردو طالع نازل زي الحلاوة في ايده

قالي انت عربيتك عايزة
جوز بطاحات
وطقم جلب للمقصات
والجلب الحديد

نزلت عند الشيخ علاء في فيصل عندنا
وجبت الأتي
طقم بطاحات الماني febi ب 170 جنيه
طقم جلب مقصات الماني febi ب 70 جنيه
طقم جلب صاج ب 16 جنيه

المهم
ان البطاحات طلعت بتاعة جولف 2
ودة عايز احذر منه
لما السيات بتسقط موتور اكبر وبتعدل عفشة
بتركب بطاحات الجولف 2 الكبيرة ام صاجة

لكن السيات لحد 1400 بيركب لها بطاحات صغيرة بتاعة البولو وبتتباع البطاحة ببلية او البطاحة بدون بلية
ملحوظة (البلية مش بتتباع لوحدها)

طقم البطاحات الصغير الماني febi بالبلية ب 170 جنيه
طقم البطاحات الصغير الماني febi بدون البلية ب 90 جنيه

بس بصراحة
البطاحات الي طلعت من عندي كانت متأكلة بشكل لا يوصف وحالتها يرثي لها
والمفاجأة انها كانت بتاعة العربية الأصلية ومكتوب عليها SPAIN يعني اسباني اورجينال
وتمسكها تلاقيها زي الحجر - ما شاء الله عليها - حاجة فعلا اصلي

الجديدة بقي - طرية زي الكاوتش بتاع الكوبلن كدة
بس اهي شغالة

ودي الملحوظة التانية الي عايز احذر منها
لو هتعمل عمرة عفشة في عربيتك
اشتري جنب كامل
مساعد + سوست + بطاحات
هتبقي انضف واحسن من الجديد

النتيجة بعد العمرة

- الحمد لله العربية بطلت جميع الخبط والأصوات المذكورة بعاليه

- الحمد لله بفضل الله رفعت راسها من تاني وبفضل الله الحمد لله اللهم صلي علي النبي وقفت زي الأسد زي باقي السيات

- بتحدف وبترف طبعا لأنها عايزة ظبط زوايا من العيار التقيل
ودة هيبقي في موضوع منفصل ان شاء الله عشان اعرفكم ببتاع الزوايا بتاعي

بس بصراحة بقي
الي مش عاجبني في الموضوع ان الصنايعي الي اشتغل (دة ليه قصة تانية لوحده هبقي احكيلكم عليها في وقت تاني) طلب مني مصنعية عالية حبتين واضطريت اديهمله لأنه من طرف عصام ومحبتش اصغر عصام في النص
الراجل كتر الف خيره اشتغلنا في ورشته وبعددته وببلادوسه وبكوريكه وبجفلتتاته وكمان شربنا شايه في كوباياته وببراده بسلاطاته ببابا غنوجه

اشوفكم علي خير ان شاء الله

والله المستعان
،
،

[agaty1st]

ألف مبروك يا باشا على عودة الأسد لعرينه
و ملاحظات بسيط كده على ما أوسم:
- بطاحات الأبيزا 94 هي هي جولف 2 لأني اشتريتهم لعربيتي مرتين اما ال98 فهي هي البولو
- جرب رضا بتاع العفشه اللي في الحرفيين و صدقني هاتعرف ان الراجل ده كنز بمعنى الكلمه وانا كاتب عنه في موضوع ورشة سيات المتكامله

[kar!m]

الف مبروك يا بشمهندس .. عقبالي .. بس اما أخلص من اللى أنا فيه الأول.

[ehab_mansour]

مبروك يا هندسة تظبيط العفشة و هي عربيتك فعلا كانت محتاجه العمرة دي
مقلتليش عملت ايه في موضوع الكوبلن الداخلي و الصوت اللي كان بيظهر و احنا مع بعض ؟ فاكره ؟

خوفي بس من العمره دي من قطع الغيار لأن العفشة بالذات لو قطع الغيار مش أصلية مبتعمرش و الأصلي أصلي طبعا و الله الموفق

[SYD]

ألف مبروك يا باشا على عودة الأسد لعرينه
و ملاحظات بسيط كده على ما أوسم:
- بطاحات الأبيزا 94 هي هي جولف 2 لأني اشتريتهم لعربيتي مرتين اما ال98 فهي هي البولو
- جرب رضا بتاع العفشه اللي في الحرفيين و صدقني هاتعرف ان الراجل ده كنز بمعنى الكلمه وانا كاتب عنه في موضوع ورشة سيات المتكامله

فعلا يبدو ذلك
الأبيزا 94 بيركب لها بردو بتاعة الجولف 2
ودة الي لخبط الراجل وانا لما لقيته متلخبط اتصلت بعصام
راح الراجل مدخل عصام في متاهات وقعد يقولوا جولف ولا باراتي (اتاريها علي نفس البطاحات هي كمان)
فعصام اتلخبط وخلاه ادالي بتاعة الجولف في الأول
وبعد كدو روحت رجعتها وجبت بتاعة البولو

ربنا يسهل الحال وماحتجش شغل عفشة تاني في الوقت الحالي

والله المستعان
،
،

[SYD]

الف مبروك يا بشمهندس .. عقبالي .. بس اما أخلص من اللى أنا فيه الأول.

الله يبارك فيك ويعينك علي عربيتك
طمنا وصلت لأيه في عمود الكامة

والله المستعان
،
،

[SYD]

مبروك يا هندسة تظبيط العفشة و هي عربيتك فعلا كانت محتاجه العمرة دي
مقلتليش عملت ايه في موضوع الكوبلن الداخلي و الصوت اللي كان بيظهر و احنا مع بعض ؟ فاكره ؟

خوفي بس من العمره دي من قطع الغيار لأن العفشة بالذات لو قطع الغيار مش أصلية مبتعمرش و الأصلي أصلي طبعا و الله الموفق

الله يبارك فيك يابشمهندس
العربية كانت ضايعة

والله يا باشا زي مانا
غيرت فردة ولسة الفردة التانية
لما سألت عصام ايهما مقدم علي الأخر؟؟
عصام قالي "العفشة اولي"
فبصراحة روحت عامل العفشة الأول

وفعلا معاه حق
العربية ماكنتش عربية بصراحة

وكمان ان شاء الله انا حاططها في الحسبان

هنعمل ايه طيب يا باشمهندس
كل الموجود في السوق مضروب

الحل الوحيد في الأستيراد

عارف انت
انا كنت لسة مغير جلب المقصات من حوالي 3 شهور
ولقيت احمد مبارك بيكلمني وبيقولي ان هو كمان لسة مغيرها من شهر وباظت وغيرها تاني
واحنا الأتنين كنا جايبين النوع المعفن الي اسمه توبران

ربنا ييسر الحال

والله المستعان
،
،

[zika99_eg]

الف مبروك يا هندسه
معلش لي طلب رخم
ممكن تصور المساعد الامامي من فوق من داخل الموتور يعني عشان انا لحد دلوقت مش فاهم المساعدين بتمسك ازاي في جسم العربية انا حاسس انها مفكوكه مع اني مش بشتيكي من العفشه خالص
كان معي دوجان قبل كده وكان المساعد بيمسك بثلاث مسامير اما مع السيات كل اللي شايفه الطبق المعدن اللي فوق بس وفيش ربط اي حاجه
هل الكلام ده مظبوط ولا انا عندي في حاجه ناقصه
وشكرا ليك وياريت اصحاب الخبرة مايبخلوش علينا

[SYD]

الف مبروك يا هندسه
معلش لي طلب رخم
ممكن تصور المساعد الامامي من فوق من داخل الموتور يعني عشان انا لحد دلوقت مش فاهم المساعدين بتمسك ازاي في جسم العربية انا حاسس انها مفكوكه مع اني مش بشتيكي من العفشه خالص
كان معي دوجان قبل كده وكان المساعد بيمسك بثلاث مسامير اما مع السيات كل اللي شايفه الطبق المعدن اللي فوق بس وفيش ربط اي حاجه
هل الكلام ده مظبوط ولا انا عندي في حاجه ناقصه
وشكرا ليك وياريت اصحاب الخبرة مايبخلوش علينا

الله يبارك فيك يا باشا
بالنسبة للتصوير ان شاء الله في اقرب فرصة اصورلك الدنيا كلها

المساعد بيمسك ازاي ؟؟؟
بص يا سيدي وتخيل معايا

المساعد بيمسك من تحت في الطنبورة بتاعة العجل
ومن فوق
اولا هو داخل جوة السوستة
ومن فوق السوستة في البطاح
البطاح بتبقي مخرومة
المساعد طالع منه بار مخروم من فوق علي شكل الانكيه (سداسي الشكل) والبار دة قلاوظ
بيتربط في البار بتاع المساعد صامولة بوردة
وبالتالي الصامولة بتربط البطاح في السوستة واساسا هي بتربط في المساعد
ويجي فوق كل دة
الطبق المعدني الي حضرتك بتبقي شايفه من الكبوت

هتقولي امال السوستة من تحت مربوطة بأيه
هقولك السوستة بتبقي قاعدة علي حاجة شبه الطبق في نهاية المساعد

هحاول اجيبلك فعلا صور للكلام دة عشان تبقي متخيله

والله المستعان
،
،

[S O P H O S]

الف مبروك يا باشا

[SYD]

الله يبارك فيك يا باشا
بالنسبة للتصوير ان شاء الله في اقرب فرصة اصورلك الدنيا كلها

المساعد بيمسك ازاي ؟؟؟
بص يا سيدي وتخيل معايا

المساعد بيمسك من تحت في الطنبورة بتاعة العجل

ومن فوق
اولا هو داخل جوة السوستة
ومن فوق السوستة في البطاح
البطاح بتبقي مخرومة
المساعد طالع منه بار مخروم من فوق علي شكل الانكيه (سداسي الشكل) والبار دة قلاوظ
بيتربط في البار بتاع المساعد صامولة بوردة
وبالتالي الصامولة بتربط البطاح في السوستة واساسا هي بتربط في المساعد
ويجي فوق كل دة
الطبق المعدني الي حضرتك بتبقي شايفه من الكبوت

هتقولي امال السوستة من تحت مربوطة بأيه
هقولك السوستة بتبقي قاعدة علي حاجة شبه الطبق في نهاية المساعد

هحاول اجيبلك فعلا صور للكلام دة عشان تبقي متخيله

والله المستعان
،
،

دة بالظبط الي حصل عندي امبارح
















تمام كدة يا باشا ؟؟
في لسة كدة حاجة عايز تستفسر عنها ؟؟

الله المستعان
،
،

[SYD]

الف مبروك يا باشا

الله يبارك فيك

ربنا يخليك

[gomaro2]

مبروووووووووووك يا محمد بيه
هو ده الكلام .. وان كنت فعلا بافضل تجيب الحاجات دي استيراد .. اعتقد انها كانت هتبقى افضل بكتير
وبعتذر عن اختفائى الفترة اللى فاتت بسبب شوية مشغوليات على خطوبة على على على ..
وانشاء الله نتجمع قريب على خير ... أحمد سميح

[SYD]

مبروووووووووووك يا محمد بيه
هو ده الكلام .. وان كنت فعلا بافضل تجيب الحاجات دي استيراد .. اعتقد انها كانت هتبقى افضل بكتير
وبعتذر عن اختفائى الفترة اللى فاتت بسبب شوية مشغوليات على خطوبة على على على ..
وإن شاء الله نتجمع قريب على خير ... أحمد سميح

الله يبارك فيك يا احمد بيه يا فنان
والف مبروك الخطوبة
ربنا يتمم بخير ان شاء الله

والله فعلا الحاجات دي كانت اتجابت استيراد احسن
بس هنعمل ايه ؟؟ محدش بيتعلم ببلاش

انا ان شاء الله العمرة الجاية هتبقي استيراد
بالمرة اغير المساعدين والسوست والمقصات

أشوفك علي خير ان شاء الله

والله المستعان
،
،

[matrix012]

اولا الف مبروك على تظيبط العربيه
و والله يا باشمهندس انتا عداك العيب بكتير قوى
وربنا يستر طريقى وطريكم