عفريت في الفتيس

[ahmad_salama]

ابيزا 94
اعراض المشكله:

1. الفتيس بياخد المرشدير عادي والعربيه بترجع لورا عادي
2. لما اجي امور بعد كده ميرداش يمور وتبقي العربيه بين المارشدير وبين المور ( ياعني لاتجيب ورا ولا هي مور)
3. بعد محاولات كتير بتوصل لدرجه اني احس ان العصايه ممكن تتكسر الاقيه العصايه تتمور لوحدها
4. كل الغيارات شغال عادي المشكله دي بتحصل مع المارشدير بس

حد عنده فكره العفريت ده ينصرف ازاي ؟؟

[alzelafy]

روح لعفشجى يظبطلك الامور

[ahmad_salama]

روح لعفشجى يظبطلك الامور

المشكله انها قافشه دلوقتي تحت البيت مش عارف اتحرك بيها

[ehab_mansour]

العصاية محتاجه ضبط او تغيير كامل او تغيير الاتياش و تظبيطها

الموضوع بسيط لكن محتاج حد بيفهم يظبطها

[SYD]

العصاية محتاجه ضبط او تغيير كامل او تغيير الاتياش و تظبيطها

الموضوع بسيط لكن محتاج حد بيفهم يظبطها

1+

كدة اما التيش راكب عكس (بالمقلوب)
او فبرة العصاية عايزة تتغير

لأن المرشادير لوحده دون عن باقي الغيارات ليه فبرتين خاصين بيه بيركبوا في العصاية من فوق عشان يعملوه سوستة ويخلوه يمشي في مجري لوحده ومايدخلش علي الأول

[ahmad_salama]

مفيش اي حل مؤقت يخليني امور العربيه علشان اقدر اتحرك بيها اروح للميكانيكي ؟؟

[ehab_mansour]

طالما حصل و قفشت في غيار و انت مش عارف تمورها يبقي التيش تحت اتكسر او اتفك من الوصلة الرئيسية

ازاي تفك التعشيق :
هتنزل تحت العربية هتلاقي عمود خارج من الفتيس و متوصل بوصلات الي عصاية الفتيس هزقه للأمام قليلا و سنه سنه و انت بتجرب تحرك العربية لحد ما تلاقيها فكت التعشيق

خلي بالك ان اتجاه سحبك للعمود ده هيناسب الغيار اللي متعشق وانت مش عارف تفكه
يعني الغيارات اللي لقدام اللي هي : الأول و الثالث و الخامس و المارشيدير دول هيبقي عشان تفك التعشيقة من تحت هتحتاج تزق العمود لقدام
و الغيارات اللي لوري اللي هي : تاني و رابع دول تفكهم بانك تسحب العمود اللي تحت اللي خارج من الفتيس للخلف

يارب تكون فهمت قصدي ولو مش عارف رقمي في البرفايل بتاعي كلمني و انا أتابعك لحد ما تفك التعشيقة و اوعي تشدها و هي معشقها عشان هتبهدل الفتيس و ألات الجر للعربية

[SYD]

طالما حصل و قفشت في غيار و انت مش عارف تمورها يبقي التيش تحت اتكسر او اتفك من الوصلة الرئيسية

ازاي تفك التعشيق :
هتنزل تحت العربية هتلاقي عمود خارج من الفتيس و متوصل بوصلات الي عصاية الفتيس هزقه للأمام قليلا و سنه سنه و انت بتجرب تحرك العربية لحد ما تلاقيها فكت التعشيق

خلي بالك ان اتجاه سحبك للعمود ده هيناسب الغيار اللي متعشق وانت مش عارف تفكه
يعني الغيارات اللي لقدام اللي هي : الأول و الثالث و الخامس و المارشيدير دول هيبقي عشان تفك التعشيقة من تحت هتحتاج تزق العمود لقدام
و الغيارات اللي لوري اللي هي : تاني و رابع دول تفكهم بانك تسحب العمود اللي تحت اللي خارج من الفتيس للخلف

يارب تكون فهمت قصدي ولو مش عارف رقمي في البرفايل بتاعي كلمني و انا أتابعك لحد ما تفك التعشيقة و اوعي تشدها و هي معشقها عشان هتبهدل الفتيس و ألات الجر للعربية

مش بس الفتيس والات الجر دة ممكن اعوذ بالله تجيب صبابات لو زقها وهي معشقة غيار

ومش لازم ينزل تحت العربية
لو فتح الكبوت وقعد علي الصدر ونام علي الموتور هيعرف يمد ايده يوصل لعصاية الفتيس وبمنتهي السهولة هيفك التعشيقة
وممكن علي التجربة بمعاونة احد الأصدقاء
يخلي زميله يقعد جوة العربية ويحاول يهز العصاية لقدام وورا وهو من خلال الحركة هيفهم الأتجاهات وبناء عليها هيعرف يمور او حتي يديها غيار

الموضوع ان شاء الله سهل بس عايز تركيز

ولو انت بتحرك العصاية من جوة ومفيش اي تأثير يبقي كدة التيش اما ساب من بعضه او الفبرة اتكسرت تماما

خلي بالك في فبر لحشو العصاية ودة بيبقي في الصالون من جوة ودة الي كنت اقصده لتحديد اتجاهات المارشدير تحديدا

وفي طقم فبر تاني للعصاية من تحت العربية ودة بيبقي معاه التيش الي بنتكلم عنه

الطقم التحتاني بيعمل حوالي 75 جنيه جديد
الفبرة الداخلية الي من فوق ممكن تعمل 30 او مايقارب ذلك

والله المستعان
،
،

[ahmad_salama]

الحمد لله العصايه اتفكت والعربيه اتمورت بطريقت محمد سيد " اني انام علي الماتور :) "

متشكرين يا ابو السيد ومتشكين يا هوبه :)

وربنا يسهل بكرا اروح للميكانيكي يشوف ايه الي بايظ بالظبط وربنا يستر طريقكم وطريقنا ويارب العربيه تبطل دلع بقي علشان كل ما حاجه تتصلح حاجه غيرها تبوظ

[Mstfun]

ان شاء الله حاجه بسيطه

هاتلاقي تيش الدبرياش اتكسر بس وانت بتشتريه خد القديم معاك لانه اشكال كتيره

اصل الموضوع دا حصل معايا

[ahmad_salama]

للاسف دي كانت حاجه جوا الفتيس. حته حديده كده ماسكه ترس المارشدير كانت اتنت .جبتها ب 70 جنيه و 100جنيه مصنعيه و 80 جنيه زيت :(

[Mstfun]

الحمد لله انها اتعملت والحمد لله انها جات على اد كده

[ahmad_salama]

الحمد لله انها اتعملت والحمد لله انها جات على اد كده

الحمد لله

[windofchange]

الحمدلله بس الميكانيكي هو اللي عملهاللك؟ واسمها ايه الحديدة دي ؟ وجبتها جديدة ولا استيراد؟

[ahmad_salama]

الحمدلله بس الميكانيكي هو اللي عملهاللك؟ واسمها ايه الحديدة دي ؟ وجبتها جديدة ولا استيراد؟

• الي عملهالي ميكانيكي بتاع فتيس بس
• وقالي ان الحديده اسمها قلابه - بس هي حته حديده عامله شكل حرف y كده بتكون مربوطه بمسمار من خارج الفتيس هتشوف المسمار لو بصيت علي الفتيس من برا تحت حساس الميا كده
• هو جابهالي استيراد بمعرفتو علشان انا عارف اني لو دوخت عليها محدش هيردا يفكهالي من جوا الفتيس