نصيحة فى الابيزا 94 من الافاضل

[ابن الحتة]

السلام عليكم
اهلا اخوانى
انا نازل السوق ان شاء الله الاسبوع الجاى و محدد هدفى سيات ابيزا 94 باذن الله
انا شايف انة متوسط السعر ليها من 28 الى 30 الف وانا عامل حسابى على 30 باذن الله بس عايز حاجة تكون كويسة ومتتعبنيش خصوصا انها اول عربية ليا

انا خبرتى فى السيارات متوسطة وخايف ينضحك عليا
طبعا انا هاخد ميكانيكى بيفهم فى الالمانى معايا

بس عايز اكون فاهم ازاى اتاكد ان العربية سليمة مفهاش اى مشاكل
وازاى ابقى واقف واسئلة على حاجات فيها معروفة انها عيوب واكشف عليها ازاى

ياريت احد الافاضل يساعدنى واكون شاكر افضالة

[SYD]

وعليكم السلام و رحمة الله وبركاته

اولا انت المبلغ الي معاك يركبك لحد 98 فاضية

ثانيا انسي خالص حاجة اسمها عداد كيلومتر وخليك في حالة العربية
في حاجات تانية بتدل علي الكيلومتر بتاع العربية زي الدريسكيون - زي فرش الأبواب والكراسي

ثالثا الي اهم من الميكانيكا هو حالة الصاج والبودي والدواخل والقوايم
الميكانيكا امرها سهل مش محتاجة ميكانيكي يكشف علي العربية

اهم حاجة تكون عارفها ان الأبيزا لحد 97 كانت 1300 كربراتير (او بيسموها هاف انجيكشن)
من اول 98 نزلت انجيكشن 1000 سي سي

اخرك تشتري لحد 1400 اكتر من كدة يبقي هتفاصل ودة بيقلل مش بيزود في العربية لأنه بيضطر يعدل في حاجات كتير في العربية والله اعلم عملها صح ولا غلط
لكن ال1400 مش بيعدل في أي حاجة تقريبا ولذلك بتبقي نوعاً ما مقبولة ومش بتعيب العربية

شيل فرش الشنطة وبص كويس في بارومة او صدأ او ما شابه ذلك

لو الموتور انجيكشن يستحسن تحطها علي كمبيوتر وتشوف الأعطال

وفي الأخر تصلي استخارة والي فيه الخير يقدمه ربنا

وفي انتظار اراء باقي الأخوة بردو يمكن اكون ناسي حاجة

والله المستعان
،
،

[matrix012]

والله انا مع اخويا وحبيبى المهندس محمد سيد فى كل كلمه قالها بس موضوع ان ال 28 او ال30 يجيبو 98 فاضيه مرتاحه
انا شايف ان الاسعار شاده شويه مش عارف ليه رغم ان مفيش بيع سبحان الله
حاجه تانيه احب اعلق عليها وهيا حالة الصاج بتاع العربيه يعنى لو ينفع ترفعها فى بنزينه وتشوف بنفسك فو فى لحام او تكسير او حاجه مش طبيعيه
وانتا بالنظر كده تبص على القوايم وعلى الحوض وتحت فرش الشنطه لو فى شكل لحام
وربنا يوفقك وتجيب العربيه الى تريحك
واعزرونى لقلة مشاركتى فى المنتدى وده بسبب انشغالى
وربنا يستر طريقى وطريكم