how to replace timing belt in ibiza 2000

[warfighter2114]

ممكن بعد اذن حضارتكم توفير فيديوهات عن تغير سير التقسيمه وتظبيط الكامه وبليه الكرنك ولكم جزيل الشكر

[SYD]

طب ماتشوفها في الكتالوج
موجود ازاي تغير وتقسم سير الكاتينة

[warfighter2114]

انا بعتبر الفيديو تجربه على ارض الواقع

[ehab_mansour]

شوف المشاركة دي و لك اي استفسار قول

كيفية ضبط سير الكاتينة
1- تفك غطاء السير و قبليه طبعا سير الدينامو و التكييف
2- تدي العربية غيار و هي مبطلة و تبدأ تضبط وضع سير الكاتينة عن نقطة ال zero point و ده نقطة محددة بعلامات علي طمبورة عمود الصبابات (عبارة عن شطف لحرف سنه من احد سنون الطمبورة ) و علي ترس و طمبورة عمود الكرنك (برده شطف لحرف سنة من سنون الترس و نقطة علي الطمبورة اللي راكبه علي عمود الكرنك لادارة السير الأخر )

بتبدأ تضبط العلامات دي علي علامات مقابلة ليها في جسم المحرك بانك تحرك العربية بيدك و هي واخده غيار و ليكن الرابع هتلاقي السير بيتحرك قدامك لحد ما تخلي العلامات اللي علي الطنابير موازية للعلامات اللي علي المحرك

3- بتفك الطمبورة الكبيرة اللي علي عمود الكرنك و اللي بتشغل السير التاني بتاع التكييف و الدينامو (و دي هي المعضلة في الموضوع لأنها مربوطة بصامولة مقاس 24 مشنشر و مربوطة جامد جدا و فكها صعب شوية )
4-بتفك بقية غطاء السير اللي تحت الطمبورة و بيتبقي لك علي طرف عمود الكرنك الترس الصغير اللي بيدور عليه سير الكاتينة
5- هنا بتبدا في تهوية سوستة بلية الشداد بانك بتضغط علي دراع صغير خارج من جسم البلية ...طبعا بتفضل ضاغط عليه و بتلاقي السير بقي مهوي خالص و انت ضاغط بتشيله من علي الطنابير

بتبدأ في تركيب السير الجديد بتسقيطة علي الطمبورة المسننة اللي فوق بتاعت عمود الصبابات و الترس المسنن اللي تحت علي عمود الكرنك

بترجع تربط كل شيء بالعكس مع التأكد ان الطنابير و التروس مضبوطة تماما علي العلامات بعد التركيب حتي تتأكد ان السير راكب مضبوط

و ممكن خلال هذه العملية تفك بلية شداد الكاتينة و تشوفها كويسة ولا محتاجه تتغير
و ممكن تشوف طلمبة المياة و ترسها سليم ولا محتاجه تتغير عن طريق لفها بعد فك السير و تتأكد انها بتلف دون مشاكل و ترسها سليم

طبعا سير الكاتينة بيعمل تزامن للحركة بين عمود الكرنك و بين عمود الصبابات و في السكة بيدور طلمبة المياة و مشدود ببلية الشداد و بالتالي بينظم حركة البساتم مع الصبابات ليحافظ علي كل منهما لا يقترب من الأخر و بالتالي ضبط ال timing للمحرك