افضل انواع البطاريات الجافه للسيات عموما

[warfighter2114]

ما هى افضل البطاريات للسيات عموما ويفضل امبير اد ايه

[warfighter2114]

متابع

[SYD]

مفيش حاجة اسمها افضل نوع
اي نوع هيشتغل معاك كويس - طالما سمعته كويسة وطبعا لو دنيتك مظبوطة من دينمو وكابلات واواطيش والكهربا عموما

لو موتورك تحت 1600 هات 55 امبير هتكون كويسة اوي ان شاء الله علي دينمو 70 امبير
ولو موتورك 1600 فيما فوق وعندك تكييف وباور وزجاج يبقي هات بطارية 70 امبير علي دينمو 90 امبير

والله المستعان
،
،

[ehab_mansour]

طبعا كلام ابو السيد زي الفل و لكن لي تكمله بسيطة و هي ان اختلاف الأمبير لبطارية العربية بيختلف حسب عدد الكماليات اللي موجوده فيها ومش حسب السعه اللترية للمحرك

بخصوص الأمبير فأنصحك تشتري ال 70 أمبير مباشرة لأن اساسا معظم البطاريات كتصنيع حاليا معدتش بالكفاءة انها تعطي الامبير اللي مكتوب عليها لذلك دايما خليك في الأعلي و في ال safe side و الفرق بسيط بين ال 70 و ال 55 و خاصة ان تقريبا كل سيارات فولكس اللي بنتداولها في مصر الدينامو فيها 90 امبير فبيكفي و زيادة و كمان كلما كانت البطارية امبيرها اعلي كلما تحملت معك لو اضطريت تضغط عليها و عندك عطل مثلا و حاولت تدور اكثر من مرة او عندك اي مشكلة

بخصوص النوع فطالما العربية نفسها كهربيا مضبوطة يبقي اي بطارية هتعيش معاك و هتبقي زي الفل و لكن أنصحك ب acdeleco لأنها بطارية محترمه و كويسه عن تجربة ولكن لو اي نوع متاح مش مشكلة

و بالتوفيق ان شاء الله

[SYD]

معلش يا بشمهندس ايهاب
انا ليا وجهة نظر مختلفة وعشان كدة ربطتها بسعة الموتور

انت البطارية دورها ايه ؟؟؟ والدينمو دوره ايه ؟؟؟

البطارية دورها تقوم الموتور - فقط لا غير
واول لما الموتور يقوم ويدور الدينمو - بيبقي العبء كله علي الدينمو

وطبعا الكلام دة ساري فقط ما اذا كانت الكهربة مظبوطة والدنيا تمام
يعني الدينمو بيشحن والسير تمام والمارش كويس والدنيا كلها زي الفل

لكن في حقيقة الأمر انت مش بتحتاج البطارية تماما طول ما العربية دايرة لدرجة انت ممكن تشيلها وتمشي من غيرها طالما العربية دايرة (طبعا الكلام دة مجازاً ولكن ممكن الحدوث)

نيجي بقي لربطي للأمبير بالسعة اللترية

لو موتورك 2000 مثلا - اعلم انك هتاكل البطارية في خلال شهرين لو كانت 55 امبير
ولو المارش هيس معاك فانت بالكتير هتحاول 5 او 6 محاولات وهتلاقيها خلصت وعايزة تتشحن
وبالتالي لو موتورك 2000 فانت اقل ما فيها 70 امبير

انا شخصيا عربيتي كاملة 1400 سي سي (تكييف - باور - 4 زجاج - مرايات كهربا) وبطاريتي 55 امبير علي دينمو 70 امبير
وشوفت عربية تويوتا كاملة ايضا شغالة ببطارية ماتكملش 40 امبير وشغالة زي الفل وحتي يبدو ان العربية مصممة لذلك لأن المكان المخصص للبطارية لا يتحمل اكثر من ذلك (البطارية ارفع بكتير من عندنا)

دي وجهة نظري الشخصية وطبعا كل ما كان الأمبير اكتر فدة مش هيضر ولكن لو في فرق في السعر او الدينمو 70 فانت هتضطر تجيب 55 امبير
لكن لو الأمبير بتاع الدينمو كبير زي 90 مثلا فهات 70 امبير مفيش مشكلة

تحياتي

[windofchange]

ac delco الجافة حلوة ماشاء الله داخلة عالسنة الثالثة معي وهي اللي معايا 65 امبير

[warfighter2114]

الف شكر ياايهاب باشا وشكر للمهندس سيد